Logically Ridiculous: 2015

2015年12月30日星期三

飢餓遊戲3, 同班同學

以下係兩部睇到我好想中途離場既戲, 邊睇邊諗自己究竟睇緊乜鳩野, 不約而同地, 兩部戲我都係豪華戲院睇。

同班同學
其實一見到導演是她就完全冇性趣要睇, 猶記得預科時竟有同學神推鬼㧬買了她的書, 內容極無聊, 全是鹹濕低俗版的姣婆遇著姿粉客, 痕閪碰著打硬鳩。幾個短篇, 同一女主, 但男主次次新款。當年幼小的我純情, 未聽過"公廁"這個詞語, 所以沒能簡而精地說出我的感想。當然, 色情無不可, 以"職場故事"包裝亦無不妥, 但我真心覺得最終效果很cheap, 而這種cheap並非多用幾句洋文對白就能趕走。

還記得書裡其中一個情節, 大約是這樣:
男女主打得火熱, 男的伸手往女主背上摸, 想除人個爸爸, 女主輕輕抓住男主的手, 說: "baby, not this way, 我今天是前釦。" (楊友人則記得女主的口頭禪是"oolala "...)

fml, 我竟他媽的記得這本作者的半自傳式小說的內容, 嚴重浪費腦袋記錄體。

多年後的今天, 同班同學繼續色情, 雖以青春掛帥, 但被裸露性愛鏡頭溝淡不少, 一如三位少女的情誼。跟當年那書一樣, 最終效果很cheap。

儘管我亦曾是名青春少艾, 但仍經常不理解主角們的各種行為, 實在投入不了。

雖然如此, 三位女主的演出還是很不錯, 只是為這電影露點有點浪費。

另外我跟蒼井空似乎也有點緣份, 繼泰國愛情喜劇"我很好愛死你"後, 再次於此戲見到她演出。

飢餓遊戲 (毫無保留的劇透)

本來純粹覺得悶, 不好看, 而且不只我一個覺得悶, 坐附近的一個大叔更是睡到扯鼻鼾。但聽了黃洋達的觀後感之後, 反而覺得挺有趣, 雖然其觀點被視為偏激, 未必每項都得到大眾同意, 但確實值得思考. 早知聽完佢講先去睇。

1. 個人主義貪圖光環一味鳩衝
katniss唔願意做花瓶/只在鏡頭前出現, 作為一個頗具號召力既人, 佢覺得自己一定要上前線. 其實反抗軍既領導一直都阻止kat上前線, 因為kat作為精神領袖, 萬一受傷就麻煩. 但kat不顧戰略偷偷上前線, 真勇武, 企圖親手殺死大總統snow.

不過反抗軍當時長驅直進, 已殺至總統府外圍, 形勢大好, 只欠總統府尚未攻陷, 直搗黃龍, 捉拿總統, 指日可待. 根本唔需要katniss潛入總統府都贏硬. katniss而家先去, 唔只阻鳩住人地, 佢既出現更只變成收割光環. 一句講晒, kat而家先黎把撚.

點解佢著hoodies扮難民又唔化妝易容掩人耳目(鳩緊張既部分)? 因為佢需要光環, 拉弓刺殺總統既一刻, 好有可能成為歷史圖片, 梗係要畀人影得清清楚楚我係katniss!

2. 話人殘忍其實自己一樣害死好多人
人地係度諗進攻策略, 諗打仗個陣要炸邊度, kat又衝出黎話邊度邊度好多平民乜乜乜唔炸得, 懶係仁慈, 但其實自己都害死好多人.

kat搞咁多野其實只為左自己可以親手殺總統, 佢自己衝出黎柒既途中 (又係鳩緊張既部分), 仲死左幾個隊友, 為kat既光環而白白犧牲.

原來為kat犧牲既就係犧牲, 為其他人犧牲既就唔係犧牲. 荒謬, 把自己看得那麼高.

3. 射死臨時總統再拎光環
呢幕既象徵意義應該係kat作為一個無黨無派既真勇武素人, 一箭射死左個政棍. 如果話呢位"政棍"(做臨時大總統個女人)既罪名係霸住個總統位又唔太妥當, 因為打倒政權後無論如何要有個臨時總統, 問題只係幾時搞返個大選, 而且老老實實, 場仗確實係由個位女人(臨時大總統)帶領, 江山係由佢打返黎, 人地匿埋組織反抗軍咁多年, 功勞點睇都大過"政治明星"kat, kat最多只係一個契機, 抓住呢個契機乘勝追擊個位明明係個位女人.

如果話因為佢一打完上任就露出真面目, 想重啟hunger game, 但人地明明有畀機會kat同其他人投票, 只要kat同男友peeta兩票反對已經可以即刻否決.

kat其實騎劫左反抗軍既呢場勝利, 更因為純粹自己覺得呢個女人已經變左質, 就自把自為隊冧左佢.

射死佢另一原因係因為佢派架機去炸總統府間接害死kat個妹, 即係報仇, 即係私怨.

4. 唔畀做總統既人有權慾
其實用法律/其他方法限制總統權力就得. 冇權慾既人應該唔會/唔適合做總統.
以為自己唔做總統返鄉下/無黨無派/無政治利益就好清高, 清高到判決別人生死隊冧臨時大總統, 殺完人拍拍屁股返鄉下.

5. 含淚投票重啟hunger game然後做瓜臨時大總統
最關鍵個票明明係kat度, 但佢唔投反對, 佢含淚投贊成票然後殺左(佢自己認為)變左質既臨時大總統.

6. 痴左線既peeta都有得投票

係喎, 點解一個痴左線既人可以有份投票做一個影響全國人民既決定?
仲有另一女子明明都係有精神病, 但同樣有份投票.

7. 族群仇恨依舊在
臨時大總統只係提出左一個唔太好既方案(重啟hunger game), kat就覺得人變貿質, 就做瓜人.本來

重啟hunger game原意係處決貴族, 但kat殺左臨時大總統後, 問題其實依然係度, 留待新領導人解決.

8. 信念傳播, 媒體於抗爭的重要性
頭兩集hunger game帶出既訊息.

2015年12月16日星期三

遊樂人間活得好談何容易

最近好冇趣, 放工只想訓覺, 一事無成。

搞搞叮飯新煮意

2015年12月10日星期四

北野武齣新戲竟然咁快冇夜場我好唔開心 / 我其實幾鍾意薛凱琪不過唔鍾意佢而家個樣

北野武的新作風雲耆英會, 12月3日上映. 今日, 12月10日, 才上映一星期, 已經沒有夜場. 屌喇星. 雖然這不是新鮮事, 在香港發行電影就是這樣, 讓小眾更小眾 (儘管我根本不覺得北野武算小眾, 所以才沒想過他的戲也屬於一上畫就要仆倒去看的類別. 我誤判, 我愧疚!!)(又其實我也不是北野武迷, 他的電影我只看過壞孩子的天空), 但這也更是我想屌喇星的原因. 所以想看的喜歡看的值得看的電影, 都盡量(和盡快)入場支持吧. 很多電影, 都絕對值回票價.

唉, 不要再說了. 晨早流流畀我發現左冇場次, 我好傷心.

剛剛看了踏血尋梅的trailer, 想起曾經聽過薛凱琪一個電台訪問, 談及曾有兩齣戲同時找她當女主, 一齣是喜劇爛賭夫鬥爛賭妻, 另一齣是真人真事改編的慘案. 如果出演後者, 對演員自身絕對是大好機會, 既是演技的考驗, 又能更受大眾關注.

偏偏薛凱琪選了喜劇. 她說不想對案中受害人的家人造成二次傷害.

然後我又想起一位讀編劇的朋友.
那年, 海嘯奇蹟正盛大公映, 有人問他有沒有看, 他說他不喜歡這類片在遇難者家屬的傷口上灑鹽.

然後對方說, 所以你不會發達.

大概朋友沒想過這尋常的日常對話, 會有人記得.

雖然我沒他們高尚, 有興趣看的還是會看.

2015年12月7日星期一

on this day

FB的當年今日功能真好, 每日重溫自己的遠古歷史. 雖然通常都讓人不勝唏噓.

如果現在教授再問一次周秀娜有沒有梳理自己的過去, 她可以答有了.

我好驚訝自己出過這種帖子.

2015年12月2日星期三

Day 51 (下) 伊斯法罕: 搖晃塔, Restaurant Shahrzad

(好野遊記終於有進展... 仲有好多日未打...嗚啊)

- 被逼睇左好多齣av後, 好不容易終於抵達搖晃塔. 搖晃塔, 顧名思義係識得搖晃既塔, 我心諗, 好地地一個塔竟然會無啦啦識得搖, 幾有趣, 幾神奇.

- 好客的夏搣再度發揮好客之道, 佢冇畀錢, 直接伸手入去小食亭個爆谷機拎左一大堆爆谷出黎食, 仲分左一堆畀我., 手法純熟到我以為個小食亭係佢開. 但職員淨係望下我地又冇出聲, 完全冇打算收錢.

- 夏搣說, 過多十五分鐘個塔就會郁. 我好期待, 對呢個塔充滿幻想. 個塔唔單止識郁, 仲識得係特定時間郁, 諗下都覺得amazing.

- 過左陣, 夏搣話佢要上去塔頂, 叫我企係地面睇, 仲叫我要拍video. 我覺得好奇怪, 點解淨係佢一個人上去, 我冇得上. 而呢個時候, 在場既所有人都圍晒埋黎塔下等睇表演咁既樣. 半分鐘後, 夏搣上到塔頂, 開始用力搖/推塔頂既一條木柱, 搞到成個塔都微微咁抖動.

- 現實同幻想之間, 真係往往都有條鴻溝. 我想像中既搖晃塔, 係會無啦啦好似啪左丸咁狂fing喪fing猛fing左fing右fing, 而且參觀者仲會入去個塔度感受個塔既晃動. 點知原來只係因為有人搖佢, 先至輕輕咁抖動, 抖動幅度連一個尿震都比唔上. 而且參觀者仲只能在塔外空地觀看, 冇得入內參觀.

- 由於我覺得太震驚, 兼且誤以為呢d抖動只係序幕之後會更加搖, 所以冇拍video. 一場黎到, 原來係冇得入去參觀個塔既結構, 淨係睇個塔震到尿震都不如. 真係大開眼界, 好彩唔係特登黎.

- 後來上網查, 發現原來因為個塔久經年月有損壞, 所以而家已經禁止遊客隨便上去搖.

左右兩個塔都搖得, 只要搖其中一邊, 就會成座野抖動

- 回程, 路經生果店, 我去挑生果, 好客的夏搣再度表現到好似自己鋪頭咁, 直接去切左幾舊哈蜜瓜黎食, 又分左d畀我. 老老實實超好味, 好甜. 不過重點係間鋪既職員阿哥們又係完全冇話我地亦冇收錢. 仲沖茶畀我飲. 呢班哥哥好驚訝我飲茶唔落糖, 佢地話飲茶一定要有糖, 邊講邊拎粒方糖出黎, 浸一浸d茶, 然後成粒塞左入我口-___- 佢地話呢個浸一浸含一含既招式先係正宗既伊朗飲茶方法. 媽, 好甜啊.

- 呢班阿哥好似對我相當有興趣, 全部人目不轉睛咁望實我, 仲chok一副懶係好型既笑容出黎(王大陸個d咁既笑法), 仲源源不絕咁幫我添茶(不過冇再逼我食糖). 相當好客.

- 買了桃桃和啤梨後, 終於, 回到酒店, 告別夏搣. 被夏搣轟炸大半天後, 身心俱疲, 整個下午都在房裡hea, 好頹廢. 容許自己頹廢都係旅行既一部分吧.

- 晚餐, 去酒店對面既靚餐廳Restaurant Shahrzad, 寂寞星球有介紹. 一入去, 感覺好震撼, 裝修超級靚, 我覺得間店靚到值得變做景點, 唔食野淨係黎睇都值. 可能我太早去(6pm), 成間餐廳得兩檯人 (但tripadvisor見到有人話要四日前訂位).

寂寞星球

有人上載餐廳盛況上tripadvisor

- 寂寞星球推介chelo fesenjun(上網睇話係石榴合桃雞), khoresht-e mast(上網睇話係牛肉乳酪), 烤羊肉. 今次試頭兩樣. 再加罐可樂. 因為係一個被美帝制裁既國家飲可樂, 感覺應該好特別.

罐可樂仲印有波斯文

- 結果碟碟都好大碟, 食到好飽.

- 番紅花飯(附牛油一盒). 食落有股清香, 由於中東米本身都好乾身, 所以D飯粒粒分明, 撈D牛油落去中和下唔只冇咁dry, 仲好香. 原來牛油撈飯咁好味, 返香港要試下咁樣食.

合桃雞

- 石榴合桃雞, 雖然賣相一般, 但味道其實唔錯, 甜甜地, 係有D鞋口同濃味左D. 雞潛藏左係D汁下面, 份量好多, 應該有半隻雞. 雞完全冇吸到D汁, 味道似媽媽煲完湯個D雞. 相信D合桃汁同雞只係分開煮完之後淋埋一齊. 不過味道都唔錯.

乳酪

- 乳酪質地有別於我認知裡既乳酪. 呢個係杰既,有黏性既, 反轉隻匙羹D乳酪都唔會跌落黎. 由於加左番紅花, 味道同飯一樣有清香, 但牛肉我搵唔到係邊, 只係個PAT黃色野入面有一絲絲好似南瓜咁既絲. 印象中唔算好甜, 我鍾意個乳酪多過雞, 味道岩食D.

- 食食下有個洋人一條友入黎食, 手上仲拎住本寂寞星球. 佢個樣懵懵下, 睇完一輪英文餐牌後結果都係指住本寂寞星球上既字畀侍應睇. 而結果, 佢點既野同我食緊既係一模一樣. 仲要都係飲可樂.

- 可能佢都發現到呢一點, 於是係我食完野埋完單起身準備走個陣, 我地展開交談 (又唔一早開始吹水, 走緊先黎傾...). 佢係澳洲人, 而家係布魯塞爾做野, 之前曾係港大exchange讀cs, 仲改左個中文名, 仲曾經係北京做野幾年識普通話, 仲識少少簡體字, 我好驚訝, 咁都遇著個黎過香港exchange既人. 結果吹左大半個鐘, 我呢D唔慣同陌生人交流既柒毒好少會同人吹到咁耐. 搞到佢d野食凍晒都未食完. 不過佢好似唔知頭唔知路咁就黎左伊朗, 佢黎伊朗旅行但連波斯波利斯都未聽過, 好誇張, 仲少做 research 過我.

- 返酒店食今朝買既桃桃. 好甜啊. 好好味啊.

- 房間電話響起, 酒店reception話夏搣搵我, 下一秒我就聽到話筒傳來夏搣把聲. 佢又想游說我包車, 我堅持唔駛, 佢仲話隔住個電話講我唔understand, 叫我落lobby兜口兜面傾. 我才不要, 佢好似嬲豬, 拋下一句ok up to u就收線. 做乜姐佢. 真係講錢傷感情.

2015年11月29日星期日

哪一天我們會飛, A片現場不NG, 滾蛋吧mr tumor, 駕喻人生, 百日告別

哪一天我們會飛

- 沒想像中好看, 我覺得同期的其他青春電影王家欣和我的少女時代較好。

- 最大敗筆是找了林狗當男主, 無論他怎麼演我都覺得他在搞笑, 而且(其實只有我覺得)他貌似本人討厭的一位前上司, 更覺un眼。

- 蘇麗珊很討好, 游學修的賣相很荒廢學業很配合角色, 吳肇軒都係戲中亮點。

- 後來跟一個有份於戲中製作飛機的朋友討論, 皆覺得黃修平相當明瞭男生會用甚麼角度看女生, 例如爬牆時睇人裙底。

- 挺喜歡有蘇麗珊女同學的幾場戲, 大叫對方八婆雖然講唔出乜野大道理, 但我就覺得非常有親切感。

A片現場不NG

- 全齣戲只有一個場景, 就是av現場的化妝間, 以化妝師的視覺去看av行業, 是齣細膩而不色情的作品。

- 部分情節幾好笑, 超級豬西原來係女優, 女優爛訓到訓係地, 導演及經理人超濕鳩, 而我也確信這些情況確實存在而且一點也不稀奇。

- 雖然(不論當紅或是半紅不黑)工作充滿辛酸, 但每人都有各自理由留在這行業, 對未來還是有憧憬。

-片長八十幾分鐘, 日本片來說罕有的短。

- 總結: av化妝間是職場縮影

滾蛋吧mr tumor

- 因為白百何所以要捧場

- 好看, 抗病劇本好難唔催淚, 只係中間加插太多女主的幻想, 略嫌長左d

- (我覺得)選哪張相做遺照, 真是個重要的問題

駕喻人生

- 簡單來說是叫人面對現實相信自己

- 睇完好想快點考到車牌

- 流落異鄉做異鄉人, 不容易

- 我有天會去印度旅行嗎? 我還不確定

- 原來紐約人係好少會幫助別人

百日告別

- 因為林嘉欣, 因為導演林書宇的構思, 所以去看。

- 一百日就要釋懷是有點苛刻, 幾時會好返? 唔知呢, 快了吧。

- 林嘉欣與未婚夫細佬的一幕令我聯想到別的歪東西, 我真不該。

-林嘉欣望住條魚個樣, 令我諗起"救命"時的她

- 林嘉欣找老師的情節雖然略嫌造作, 但效果好, 感動的, 一個人的力量會反彈再反彈地回傳, 影響力遠大於自己想像, 人不在, 但還是在世上留下了一點東西。

- 最後我發現我寫左咁多都冇寫過石頭, 似乎完全被我無視了

2015年11月23日星期一

收皮啦拜拜你條尾

我區連任多年的濕鳩區議員終於收皮. 我好開心

我: a連任失敗喎

母: b靠揭人瘡疤先當選到咋嘛

我: 唔通你覺得你唔應該知道a僭建? 唔通你認為僭建係a既私隱?

母: 咁又唔係, 但b唔做好自己, 淨係揭人瘡疤

我: 但係呢個瘡疤你有需要知嫁喎, 佢令街坊知道呢個瘡疤, 都係幫緊你地, 而且b只係初來報到, 又冇資金, 未當選前都好難期望佢做好多野

母: 佢乜冇資金呀, 佢xx黨嫁嘛

我: 但睇佢個款又冇乜助選團, 傳單又頹, 都知佢冇錢啦

母: 咁又係, 上屆c選個陣xx黨黨魁都有黎助選, 今次都唔見佢黎幫b撐場

我: 係囉. 其實a抵死啦, 正正常常咁間唔中搞下活動d街坊就開心嫁啦, 佢自己又僭建又多劣行

母: 佢連搞活動都圍威喂嫁, 之前見過佢同佢d黨羽成班人係議員辦公室門口切燒豬, 其實係人都可以去食, 但佢又冇公佈, 又見佢地成班人圍埋, 都唔會無啦啦走去食啦

我: 所以你都覺得係全靠b令你知道a既僭建瘡疤, 佢真係幫到你, 你都同意佢冇資金, 你都同意a真係做得唔好, 但你投a喎

母: 總之b淨係識揭人瘡疤啦

算了, 太監信耶穌既野, 港豬真係唔值得有民主. 冇咪冇囉, 太陽照常升起, 天氣依然大好.

2015年11月22日星期日

愈美麗的HENNA我愈不可碰

既然這麼多人要保守，棄創新，我只好將自己覺得最好最滿意的，全部留給自己。
然後又會有好事之徒撲出來說，身體髮膚，受諸父母，拎隻手黎教飛，不可。

創作本來很美好，偏偏，愈美麗的東西我愈不可碰。我畫得開心又無傷大雅有乜所謂。

白票的意義。

講極都唔能夠令家母明白白票的意義。已經唔係討論立場既問題, 只係講客觀事實, 佢都唔接受。投白票同棄權是不同的, 港豬真係唔值得有民主。

2015年11月18日星期三

[小確柒]哇屌我手臂突然一熱

哇屌
今朝企街等車, 眼尾稍到異物從天而降, 這時手臂突然一熱, 我一睇, 哇屌, 好完美既一坨雀屎四平八穩地登陸在我手臂上, 它有別於一般雀屎的爛和白, 它面積呈圓形, 啡色, 還有少量白邊綑邊, 我還能感覺到其溫度, 相當新鮮熱辣, 完美兼柒得想為之拍照, 但理智告訴我當務之急是抆屎, 所以此post無圖。

這屎, 令我想起自己的童年夢想, 如果要變成一隻動物, 我會選擇做甚麼, 當年幼小的我說要做雀, 因為可以飛還可以隨時柯屎。

今天的我頓悟自己是個好有遠見的天才。

2015年11月15日星期日

解憂雜貨店。

星期日, 要返工, 但其實冇乜野做, 只是坐在公司standby, 所以睇書打發時間。返工可以大模斯樣明張目膽地閱讀, 爽歪歪喔。

我是文盲, 才第一次看東野圭吾, 結果一讀鍾情。故事環環相扣, 發展出乎意料, 那種生命影響生命, 讓別人得到救贖, 為自己找到寄託的玄妙, 實在太叫人讚歎。

就如東野圭吾寫了這故事, 朋友買了看了, 再借我看, 我看後打了這篇blog, 也是環環相扣, 關係

密不可分。

巧合地, 前幾天我忽然發現自己有影響別人決定, 堅定他人意志的能力, 頓悟天生我才真係有用。每個人都是浪矢, 每個人都是咨詢者。

書裡最後的訊息, 有壞孩子的天空的感覺, 很得我歡心。

謝謝讓我讀到這書的所有人, 謝謝浪矢。

可是, 要成功還是真的要靠炒賣股票樓房嗎...

2015年11月6日星期五

[突發] 我又去旅行

返左工五日既時候, 老細要全體同事清今年既假, mark定邊日放。由於年尾好多日子已經畀人揀左, 於是我就擇日不如撞日, 揀左十一日之後放晒佢, 所以今晚就飛日本啦啦啦！

千挑萬選之後又揀返關西因為平過東京, 雖然都係接近摸頂買入, 我最拿手就係摸頂買機票。

今次打算去兵庫縣,
因為個名好型
因為想去日本馬丘比丘
仲有因為有村架純係兵庫縣人yeah

而又不幸地, 同事呢兩日病左, 我今日都好似開始作病。其實我只求唔好影響味覺同胃口, 最好直情唔病, 祈求天父放過我。

2015年10月29日星期四

奇蹟補習社。

又是我喜歡的戲種: 青春, 熱血, 老土。日本仔就是有本事將一早知道晒劇情的老土野拍得好看, 真是吹脹。

有村架純真漂亮, 樣子很純, 加上名字有個純字, 感覺更純了。希望她能保持baby fat, 保持獨特。望住佢有時我會諗起岑麗香。

戲讓人想起那些年的放榜日, 我好像考得好或不好都沒太大情緒波動, 沒有狼嚎沒有尖叫沒有落淚, 連jupas公佈日我也只是睡眼惺忪的按滑鼠, 昏睡的腦袋完全執行不了讓內心緊張的指令, 想起來真有點沒趣。

也讓我想起考車失敗, 原來才一個多月, 感覺已是很久以前的事了。因為覺得自己會成功, 所以才感到壓力。這句話不錯。

話說老師侮辱學生的情況在日本似乎相當普遍, 不只一齣電影中的老師(例如壞孩子的天空)會稱學生為垃圾。

或許天為了補償我臨時被飛機的憤怒, 賜了我一個奇蹟補習社folder, 可以摸著架純的臉蛋做毒撚yeah。

2015年10月28日星期三

心情低落大晒?

當然, 還可以理所當然地甩底
幾好呀 (許大廣tone)

2015年10月25日星期日

吉野家吉你媽。

好耐冇食過吉野家雞飯, 原來而家早餐廿蚊內得d滲雜左粟米芝士加兩三舊雞既雞飯, 傳統野菜煎雞飯已經上到25.5。

一見到碗飯, 我爭d屌出聲, 唔係屌佢黑龍江米, 係雞, 全部雞都冇雞皮, 屌。以前, 吉野家d雞舊舊都經過二百幾度高溫千錘百鍊, 係個焗爐新鮮出爐(唔係煎唔係炸, 健康新人類啊), 塊皮呀, 爆脆嫁, 脆到我次次(記得既話)都要叫汁另上, 費事d汁沾濕d脆皮, 仲要一開動就食晒d皮先, 確保佢地每塊都係脆住咁畀我嚼爛。

讀預科時, 我很喜歡吃吉野家,喜歡到儲起每張收據, 小心翼翼地貼好在schedule 裡, 為自己的戰績感到自豪, 那時的我深愛著吉野家, 更愛屋及烏地喜歡了在吉野家打工的姨姨們, 她們全都好好人屎, 阿妹前阿妹後的呼喚我。

可是近年, 皮林晒, 肉又雪味重都算, 都叫有d野畀我嚼下; 而家過分到連皮都冇埋。吉野家你辜負了我的愛, 儘管一直都只是我一廂情願在單戀, 但你以冇皮雞回應我多年來對你的愛, 真係冇生意頭腦, 唔在乎我呢個商機。當一個人無計可施個陣先至會問人幾時死, 而一個人又憤怒又失望又無計可施個陣就會屌人老母。我丟喱撈帽啊吉野家！

其實究竟有幾多野係難食左過以前好多, 合味道, 炒麵王, kfc... 我都係想食返以前隻味姐, 合味道炒麵王你地幾年前已經離棄我, 合味道就算仲係made in hk個兩隻味都唔係以前個種味, 一樣同大陸版睇齊, 真係心都淡。

又話說原來而家德興打邊爐少左好多野食, 冇田雞冇芝士丸冇雞子, 星期六晚要$205, 又嚴格限時兩個鐘, 好冇癮, 。曾經同過好多曾經既朋友係德興打過好多次邊爐爆過好多粒雞子, 但而家連田雞都冇, 我已失去去德興既理由, 唔值得再留戀, bye。

Between, 樓面阿姐們好好人, 好關心我地提我地快d叫野食, 上菜又快, 抵讚。(雖然廚房出手好重, 兩個人, 樣樣餸都寫1, 結果粟米黎十幾舊, 鮮魷成碗, 花膠仔成碗, 牛柏葉成碗, 山根十幾個...點食得晒啊…)

又話說原來香港仲有商場入面有噴泉。

還我雞皮啊屌

海街女孩日記, 王家欣

海街日記, 是枝裕和。

綾瀨遙和長澤正美很美, 但乜夏帆係咁既樣? 以前明明唔係咁樣樣, 定係我記錯?

淡淡的愛, 淡淡的恨, 四季分明的鎌倉, 記憶中的白飯魚刺身, 由細睇到你大的街坊。

日本片的細水長流真的很動人。

王家欣, 你係邊度。

黃又南都仲係做後生仔, 諗起十幾年前既一碌蔗。
繼浮華宴後我又再睇吳千語, 雖然兩次入場都唔係因為佢, 而佢都確實係幾靚, 演戲則有janice man的感覺。

其實王家欣都有種港版我的少女時代既情懷, 都係九十年代, 都係懷舊, 都係純愛, 都係青春, 都係幫鍾意既人追女。

王家欣仲多左份變遷既無奈, 小島坪洲都逃唔過發展。戲中充斥大量老野: 豪華, 寶石, beyond海報, 收音機, 電台傳情, 上層座位係3+2既巴士, 大量前輩級歌手演員, 睇個陣我先知道客串陣容咁龐大咁多卡士, 好驚喜。

結局比我的少女時代好。

工作愉快

同事們好好人, 上司好明事理, 實在太好。

返工數天, 遲到兩天, 狗衝埋位, 阿頭仲話有交通問題whatsapp講聲就得, 唔駛咁頻能。

上司表示只要做得晒d野, 話之我上網定講電話, 又話個d自己未走得就唔畀下屬走既老細係傻豬, 佢仲因為冇人想返紅日於是自己頂左個更。哇, 神啊, 呢d先係做實事嫁嘛。

每天還能比實際放工時間早十分鐘走呢, 昨天阿頭唔得閒教我, 仲介紹個電影網畀我, 似是暗示我冇野做既話可以上網睇戲, 結果我看了一個鐘電影, 爽歪歪。

除了法定工時較長外和返工路途波折多, 這份工真係唔錯。感謝幸運神再度眷顧。

2015年10月18日星期日

明天返工了好不安啊嗚啊。

我的少女時代, 一貫的台式青春片風格, 但是因為有我喜愛的宋芸樺; 因為我看完此戲後愛上的王大陸; 因為漂亮的暗紋校服恤衫(為甚麼香港沒有這種靚校服...); 因為九十年代的舊物例如摺疊式磁石電話簿, 麥當勞舊包裝, 有線電話, 海報; 令一切老梗演繹得很美好很美好, 也不禁讓我感嘆自己的校園生活不夠玫瑰色, 有些情懷有些距離香港就是沒有。也許曾經有的, 但現已像香港影壇樂壇一樣一蹶不振了, 華仔和星爺都只此一個。

王大陸真的好型棍子, 那亦正亦邪的眼神, 陽光般的笑容, 一點鬚根也沒有的臉蛋, 一條手毛也沒有的手臂, 嘴歪歪的微笑, 真係chok撚過亡命小巴, 不過姐姐我好buy, 呢個世界就係咁現實, 你的樣子如何就係咁解。(原來王大陸也有份演打噴嚏呢, 究竟何時才上畫啊我等了超過一年喇)

然而現實是, 即使少女時代非常玫瑰金, 投身社區後還是要面對成為一顆螺絲的太空灰。看陳喬恩殘了那麼多(定係因為特登化妝化到咁殘?), 就知道現實有多殘酷, 我們終須歡送十八, 即使以後很平凡, 這一節極美好。

而事實的確是, 我明天終於又要返工了嗚嗚嗚。

雖然我超級不喜歡過上班族的日子, 但, 這工種, 是我兒時志願, 如今算是實現了, 也是我的幸運, 返工要好好用心。

最後, 不爽有人給我劇透了, 害我到了那應該要震驚的一幕時完全叫不出來, 所以我這篇是不會劇透害人的。(結果讓我最興奮的竟然是見到從前的麥當勞包裝, 好懷念啊)

2015年10月15日星期四

滿載了歡欣噢耶意夜伊唷那是藍天與白梅。

白梅
機緣巧合看到有blog寫黃大仙街坊食店, 提到一間當我還是學生妹時常吃的茶餐廳, 我輩古人稱之為白梅的梅園餐室, 提到那裡的天花像威尼斯人, 是藍天與白雲。而我對此卻毫無印象, 於是立馬約了中同楊老抽一起嚐回味, 回味那些年那些飯, 飯仍然很好味很街坊很有鑊氣。

長洲
第二天我去了長洲, 為了避開假日時如鯽的遊人我三年沒做過長洲賓客了。按照本人跟自己約定俗成的習俗, 必先狗衝甘永泰, 自隊白魚蛋和豆卜, 再直奔故鄉吃紅豆餅。

許多年前第一次吃甘永泰時覺得d魚蛋真係充滿彈力直情彈彈波咁彈親我d阿婆牙, 如今我已不再為之驚豔, 只覺是幾好吃的魚蛋, 也不知是造魚蛋的原材料質素差了, 還是我吃過的好西多了不再輕易為美食感到驚歎, 無論如何我只知道我已回不去了。
我很傷心, 繼續暴食, 再隊一串墨丸, 還是沒有彈彈波的猛烈回彈感。
我死心了, 決定專心喪食。紅豆餅由四蚊變成六蚊了, 大魚蛋層皮硬左少少, 芒果糯米糍塊芒果不夠甜(哎, 早知食勝記芒果王啦。又, 我很久沒在香港吃過甜的芒果和桃子和啤梨了, 我媽也說現在的啤梨和桃子放到爛熟都唔甜, 小時候這些全都是很甜的)。幹, 我回不去了回不去了。

我將失落的身軀拖到西灣去, 沿著美經援村前的路上斜, 一婆婆熱情問我要不要吃雞屎藤, 我想這邊人少大概生意不會很好也就買吧。雞屎藤五蚊, 但我沒零錢, 只有三個兩蚊, 婆婆也不介意, 將其中一個兩蚊塞返入我錢袋, 只收了四蚊, 還讚我靚女。婆婆後再又一婆婆向我招手, 問我要不要喝五花茶羅漢果茶, 好吧幫襯了一個婆婆也幫襯埋第二個吧。這婆婆也非常口甜, 連連祝我身體健康, 還叫我下次帶朋友一起來。結果這雞屎藤和羅漢果茶成了本次旅程最好吃的西。雞屎藤超煙韌口感qq的。

我沿路繼續走竟到了墳場, 還是往回走沿西堤道回大街算了。
然後終於去了從沒去過的小長城, 其實沒甚麼好看但總算得償所願。

這些年, 跟好幾個不同組合的人一起去過長洲, 當中很多人現在都沒聯絡了, 望著那麥當勞那北帝廟, 桃花仍能依舊也算不錯, 至少沒跟人面一樣不知何處去。

2015年10月14日星期三

衝天救兵up up up

聽說 pixar最好看的電影是 inside out和up, 由於本人大愛inside out, 所以這次看看up是否同樣岩我心水。

故事背景設定實在sad到極點, 小情侶自小已經夢想去南美某處, 結果一直因為各種原因最後老婆到死都冇去到, 未死的老公還要面對地產商逼遷問題, 這種設定是如此現實, 彷彿是我的人生預言, 尤其我剛旅行回來準備再次跳落火坑返工, 真係好sad好sad。

不過敢想敢做似乎是一條出路, 汽球飛屋充滿童真奇想, 繼續貫徹pixar中指, 大概這也是pixar成功的原因。

總結, up好睇。我好sad。好掛住南美。但也只能move on。更好的, 在前面。

2015年10月12日星期一

Day 51(上) 伊斯法罕: 星期五清真寺, Hammam-e Ali Gholi Agha浴場博物館, 鴿子塔, vank cathedral, 搖晃塔, restaurant shahrzad

這天早上包了車, 繼續由昨天的司機hammid(音: 夏搣)載我到處去.

- 星期五清真寺, 好大好大, 但我對這寺的感覺只流於驚歎, 沒有令我心境平和或有所感悟, 寺裡部分磚不是藍色, 是因為興建時還未研發出藍色顏料.

-遇到兩個上海女生, 夏搣講解時叫埋佢地聽, 都幾大方. 夏搣還留了自己電話和一些相熟酒店地址給她們, 話撻佢朵有折. 真識做生意.

- 清真寺連接著像伊瑪目廣場般的大廣場, 格局很相似, 而且同樣有市集. 這市集主要賣日用品, 衣物鞋子香料等東西, 伊瑪目廣場那邊則主要賣工藝品瓷器地氈等. 幾乎每走幾米就有檔主跟夏搣打招呼. 他真是朋友滿天下.

- Hammam-e Ali Gholi Agha浴場博物館. 就是一個浴場. 浴場裡放了些蠟像人, 將古時的浴場情況還原, 也算挺有心思. 夏搣說待會會有人來帶我導賞, 然後他自己便溜去職員室跟人聊天去. 都唔知係夏搣特別多朋友, 定係個個伊朗人都咁多水吹. 等了一會沒人理我, 我就自己逛. 夏搣發現我自己逛, 就替我去找導遊, 後來大概是找不著, 就自己兼埋導遊帶我繞個圈. 也算盡責.

- 逛完, 夏搣要去廁所, 叫我站在廁所旁等他. 等待期間有一老伯路過, 大概以為我在找浴場入口 (因為浴場真的非常不顯眼), 不停指我行去浴場那邊. 伊朗人真好.

熱情司機大愛SEX

- 拿, 重點黎喇. 夏搣車我去下一個景點, 沿途就開始不停講性愛話題. 係咁話伊朗人個個都一腳踏幾船, 自己都有兩個女朋友, 仲打畀後生個位小女友叫佢同我傾計. 然後又係咁話我一個人黎旅行, 男朋友係香港一定同緊第二條女玩. 我開始唔想理佢. 敷衍下就算. 丫點知佢係都要繼續講, 話冇理由冇第二條女, 肯肯定帽事發生. 唉好煩, 我除左回應 "唔會既" "冇事既" "唔係嘛?" 仲有乜可以敷衍佢, 丫佢係都要糾纏係呢個話題. 又指住D路人話"你睇佢地係一男一女, 拍緊拖, 佢另一個女友唔知呢條女既存在" "呢度一女兩男, 條女腳踏兩船" 我覺得好莫名其妙, 問點解一女兩男出街就係踏兩船, 點解一男一女都可以畀你屈到有第三者, 你點睇得出? 夏搣就一味話一定係踏兩船一定係一定係...

- 好不容易終於到鴿子塔. 從前耕作要用新鮮肥料, 所以人們就建了個塔來供鴿子棲息, 繼而收集鴿屎. 夏搣帶我上去. 邊走邊說"我同女朋友試過係呢度扑野!", 再往塔頂走又說"呢度都扑過!", 佢愈走愈興奮, 再走又說"呢度都試過! right here!"

其實來到鴿子塔頂, 我有責任教夏搣唱塔尖仍舊記得這感覺極美好...

- 夏搣擺低我係塔頂就自己返左落地下同一個看住個塔既肥仔吹水. 又係吹水, 究竟佢有幾多水可以同人吹...

- 肥仔沖左杯茶畀我飲. 夏搣話呢個塔唔駛入場費, 所以我應該畀返少少TIPS畀肥仔. 原來請我飲茶係陰謀.

- 驅車去下一個景點. 又係夏搣發表性愛偉論既時候. 係咁問我既性生活good唔good. 唉好煩. good呀good呀. 跟住又問香港人性生活good唔good. 我點知人地good唔good姐. good啦good啦不過冇伊朗人咁good啦, 都冇鴿子塔呢D地方可以扑野, 又成日OT放工都身心俱疲. 好學既夏搣又繼續問咁中國人性生活good唔good...

- 夏搣話, 中國人胸好細, 佢唔鍾意. 伊朗人有D個胸好大不過好肥, 佢都唔鍾意. 然後就不斷指D路人畀我睇 "呢個太肥" "呢個大波" "呢個太瘦冇波" 然後佢忽然望住我話"你身型OK! not small!"　下, 發生乜事, 我冇問你覺得我點喎, 唔駛奉承我, 又其實我著住件XL碼大長袍, 背包又揹係胸前, 佢應該睇唔清我究竟大定細...

- 夏搣除左性愛話題, 仲開始sell我包車包耐D. 本身我包半日, 佢係咁叫我加多少少錢包全日車我去邊度邊度例如祆教遺跡之類. 價錢其實幾吸引, 而我下午都冇乜野做, 但我實在唔想再對住佢, 所以斷然拒絕. 過左一陣佢又問我去唔去. 我話唔去. 再過一陣又問多次, 最後佢話只要我請佢食飯(約十幾廿蚊港幣), 就免費車我去睇搖晃塔. 好似好慘, R生意R到咁. 不過我繼續拒絕.

- vank cathedral, 一個亞美尼亞人既基督教堂. 教堂內的壁畫跟歐美的很相似. 好多當地人參觀, 好熱鬧, 不過依然冇人要求同我合照. 真失望.

教堂天花都幾恐怖, 有D咁既人樣

一個人樣唔夠, 仲要好多個

- 經過四個鐘既性愛話題同游說再包車後, 終於返到酒店門口, 好感動. 我已身心俱疲. 夏搣雖然好煩, 不過佢畢竟冇對我做D乜, 講解景點亦算詳盡, 於是我畀左USD2佢做小費. 夏搣數錢, 發現多左兩蚊, 佢呆左, 然後以試探既口吻問"車費係廿蚊, 呢度有22蚊, 即係兩蚊係小費?" 係啊. "u are so generous!!! so now i can take u to 搖晃塔 for free!" (心中的OS) 呃...又要對住你... 算啦一個景點唔會用好多時間, 反正免費...

- 自從畀左小費夏搣後, 我覺得佢對我好多十倍, 又噓寒問暖, 又問我餓唔餓. 然後夏搣又進入自HIGH狀態, 講佢最愛既性愛話題, 並且更加好客. "係伊朗, AV係禁片, 不過每個伊朗男人既手機裡面都有AV!" 說罷佢就一臉顧盼自豪咁係自己部三叔galaxy開左條AV畀我睇. 無碼! 其實我冇興趣睇, 尤其是而家咁既狀態, 孤男寡女共處一架的士, 我唔想佢睇睇下扯旗! 於是我係咁二睇左幾秒就畀返部電話佢. 夏搣個樣好失望, 佢問"你唔睇喇?條女唔得嗎?" 屌... 係咪咁真心膠啊. 跟手佢又開另一條AV畀我睇, 我睇兩眼又畀返佢. 循環幾次, 鬼妹又有, 伊朗妹又有, 3P又有, 夏搣說, "你睇, 呢個正, 係按摩!" 佢夾硬質部電話畀我睇, 而我發現, 揸緊車既佢, 對眼完全冇望過路面, 淨係望住電話螢幕上既按摩男女. 我:"dun look at the phone, u are driving, watch the road!" 夏搣終於肯收返埋部電話.

- 不過好景不常, 過左陣佢又拎出另一部較舊款既nokia, 冇touch screen, 同樣藏有大量甜片, 佢再度發揮好客之道, 又播幾套畀我歎. 然後好客的夏搣問我要不要喝水, 他去幫我買. 自從佢播AV, 我就好驚佢色心起, 為免佢係水中落藥, 我堅持唔駛佢買水. 於是佢就話自己要去買煙仔, 留我係架車裡面. 好客的他驚我獨留車廂會悶, 仲特登又開條AV畀我睇. 真係好體貼...
而家諗返好後悔冇影低.

2015年10月10日星期六

珠峰浩劫, 特務傻的孖, 見習無限耆, 聶隱娘, 玩轉四字頭, 情迷失控點。

珠峰浩劫。
因為keira有份演所以我才看, 豈料keira原來只是配角, 連山也不用上, 早知唔睇。感覺這就是一齣普通正常合格穩打穩紮沒特別出眾的山難片。老實說, 我很不齒那些不自量力執意上山的人, 你自己死好啦嘛, 又要人去救你去幫你結果害到人地死埋喇。還是崇尚自然相忘於天地間吧, 面對大自然還是該崇敬而非征服, 珠峰會決定自己的天氣啊, 人類。
另, 感謝所有默默耕耘的雪巴人, 你們才最棒。

特務傻的孖。
考車秒炒後第二天, v提議看笑片, 看特務傻的孖。我在完全沒看簡介和完全信任v的情況下進場, 結果笑位不太找到, 只見男主不停冧友劈友激戰連場血花四濺。喂, 原來唔係笑片黎嫁? 我真係傻的嗎。
劇情來說, 條橋都用到爛晒, 又係個d人體實驗, 又係個班fbi。
唯一亮點是女主 Kristein stewart 好有型, 跟paper town的cara delevingne一樣型棍子。這類深色粗眉女真有個性, emma watson也是表表者。

見習無限耆。
係好睇既, 但我覺得可以短一點, 那些耆英爆格伴侶迷途知返的老梗不用硬加或說太多吧。
羅拔迪尼路係精神既, 腳趾外翻既, anne係好多靚衫既, 靚腳既。

聶隱娘。
故事其實可用一句說話概括, 但戲拍得很長, 劇情推進有點慢, 或許這是唯美的代價。最後的空鏡相當侯孝賢。舒淇根本就是聶隱娘化身。

玩轉四字頭。
因為amanda seyfried, 我入場了。戲想帶出的訊息其實挺有意思, 不知道我會否也會有心繫湊b不再貪玩的一天? 哎, 好難以想像, 我現在還是先繼續玩好了。
不過這戲太多東西想說, 有點失焦。後段那些關於紀錄片的意義和本質的討論, 猶如男主拍的那條片裡過多的footage, 不如集中如何玩轉四字頭吧。

情迷失控點。
一貫的活地亞倫。emma stone好靚。有才但沒有人生方向, 然後找到一個很踩界的目標, 人生忽然充滿意義生氣勃勃。好。

2015年10月9日星期五

我好想食好食既烤鴨。

昨晚身痕, 要吃好西, 去全聚德, 回味一個月前在北京喪食烤鴨。

18x半隻烤鴨, 78左右一碟小菜, 以過江猛龍來說不算貴。

點菜後不久價值78的北京炒拉麵就來了, 味道正常, 沒有特別突出。

然後我最期待的烤鴨出現了。明明鴨是分給我檯和鄰檯, 不明白為何師傅要躲在我檯隔離再隔離的位置片鴨, 遠到我看不清他片鴨的手法, 聞不到鴨的香烤味, 看不到鴨油瀉出。唯獨聽到師傅邊片邊用廣東話跟侍應交談, 他的口音不屬於北方人。

而那片好的鴨, 根本不是一片片, 只是一舊舊, 還皮少肉多, 看起來像燒味店燒鴨, 吃起來亦然, 皮太乾不夠鬆脆, 肉太瘦不夠脂香, 不夠熱不像剛出爐, 我很失望。

2012年5月, 我在北京吃全聚德, 皮厚約兩毫米, 多餘脂肪已烤走, 皮脂肉三為一體比例均衡, 咬下去感覺到肉的厚度, 吃得出皮和脂的鬆化, 侍應還建議我們蘸著砂糖吃, 鹹香的鴨伴著一粒粒的甜味, 口感更見豐富, 味道更有層次, 那滋味至今難忘。

如今, 鴨不行, 烤鴨醬太鹹, 沒送上砂糖, 跟北京的全聚德完全是兩碼子的事。

另外還點了88的拔絲蘋果八塊, 皮不夠脆而且太厚, 蘋果不夠入味也不夠軟, 賣相也相當粗糙, 看起來像班塊。

我實在失望透頂, 我這是愛之深責之切啊, 你知道我有多愛吃烤鴨嗎, 第一次去北京時吃了五次, 上個月一個人僅留廿小時也吃了兩次(遺憾沒吃全聚德)。香港的全聚德請你振作點, 你不覺得客太少嗎, 你想只靠接待旅行團來維持營運嗎, 你想撤出香港嗎！

哎, 我很想飛去北京吃烤鴨啊。香港有沒有好吃的烤鴨啊?

2015年9月23日星期三

[女仔人家學電單車] 耿耿於懷念念不忘悶悶不樂鬱鬱寡歡。

早上醒來發現自己好一段日子都不用練車了, 竟然有點不習慣, 二月快來快點讓我重考吼。距離考車仆街已經廿四小時, 吃屎的景象仍在腦海迴盪陰魂不散。

本來想看 Everest, v說看特務傻的孖笑片沒那麼沉重。結果這特務傻的孖根本不是笑片, 全程不停冧友鮮血四濺, 完全被片名騙了, 下次看戲前還是必需先看一看簡介。女主角 kristen steward很有型, 我喜歡。

午餐的湯濛吃不完。

飯後竟跟了v去護老院探他公公, v的舅父也在。我竟然終於要跟他的親戚見面了, 簡直是醜婦終需見家翁。

窩在v家看書。v窩在自己家看readings。v的堂弟窩在v家打機。

晚上一起去跟v父母吃飯。竟然一天裡一次過見了這麼多v的親戚家人, 啊。這頓飯我完美示範了柒頭的特質, 頭髮插進湯水裡, 花很大工夫才吃力地將鳳爪勉強夾起, 避免夾烏冬, 狼狽吃鵝拆蟹。真是醜婦終需見家翁見~家翁。

7777777。

就這樣, 我過了頹頹柒柒的一天, v過了一個平淡的生日。

FB/IG: 台灣留學爺/爺去的不是旅行是江湖
https://www.facebook.com/yeahtraveltw

https://www.instagram.com/yeahtraveltw/

考車回憶錄:

1. unbelievable 我竟然學車

2. 強制試

3. 瘋狂練車瘋狂路試終會戰勝歸來

考車blog:

1. 轉自動波?

2. 每天都要練車。

3. 今天很乖有練車。

4. 終於以意想不到史上最柒的方式收皮了。

5. 耿耿於懷念念不忘悶悶不樂鬱鬱寡歡。

2015年9月22日星期二

[女仔人家學電單車] 終於以意想不到史上最柒的方式收皮了。

很努力地練了十幾日車, 報到次數多得幾乎整個電單車部的阿sir都認得我, 今朝也六點幾起床七點半去試場練車, 練車也正常發揮, 結果考的那刻卻十秒鐘就收皮了。第一個八字就炒了。落腳了。媽好柒啊。彷彿見到阿sir們頭頂都有烏鴉傻瓜傻瓜的飛過。街都唔駛出考官便中止了考試。啊點解會咁嫁。真係史上最柒, 我從沒想過自己竟然會是這種死法, 阿sir都甚感無奈問我有冇咁緊張。收皮後連天也忽然落狗屎為我哭泣。好柒好沮喪, 我人生五大最柒時刻之一, 就這樣, 完了。明天一定會更好吧? 因為已經沒可能比今次更柒了。

FB/IG: 台灣留學爺/爺去的不是旅行是江湖
https://www.facebook.com/yeahtraveltw

https://www.instagram.com/yeahtraveltw/

考車回憶錄:

1. unbelievable 我竟然學車

2. 強制試

3. 瘋狂練車瘋狂路試終會戰勝歸來

考車blog:

1. 轉自動波?

2. 每天都要練車。

3. 今天很乖有練車。

4. 終於以意想不到史上最柒的方式收皮了。

5. 耿耿於懷念念不忘悶悶不樂鬱鬱寡歡。

2015年9月19日星期六

Day 50 伊斯法罕: bazar honar, Hasht Behesht Palace八重天宮, 夜鶯花園, 四十柱宮, 伊瑪目廣場, 羅德菲拉清真寺, 三十三孔橋, 赫久古橋, sofeh 纜車

早上四點半起來, 準備去機場.

跟昨天半夜剛到時一樣, 弄醒了旅館reception大哥. 大哥為我電召的士, 一臉不放心地看看我, 然後竟取出一些銀紙, 問我這裡有多少錢, 考我懂不懂銀碼. 大概我看起來是個很不可靠的笨蛋吧(事實上直到離境那天, 我都不太能弄懂伊朗的貨幣, 這位大哥真是看穿我的心了), 不過自從來到伊朗, 得到那麼多人關照, 相信我再笨蛋也不會出太大的亂子吧, 而我也只得這樣相信, 就將自己交託給命運吧.

的士大佬問我去哪個terminal, 我不知道, 機票沒寫. 車在路上奔馳半小時後, 的士大佬忽然在漆黑的路邊停車, 我是小人, 馬上猜度他是否想隨便丟我下車. 原來的士大佬非常盡責, 特地下車替我問人去伊斯法罕的話應該去哪個terminal. 我又遇上好人了.

順利登機, 準時起飛, kish air, 機程一小時, 竟然也有飛機餐吃. 麵包蛋糕朱古力蘋果汁.

未夠十點, 來到伊斯法罕, 我最想去的伊朗城市.
taxi again. 這位的士大佬跟之前遇過的所有司機一樣, 不懂英文, 甚至連英文酒店名和地址也不懂. 又同樣地, 的士大佬四處找救兵. 的士站的所有司機圍在一起研究我從lonely planet影印來的英文地圖. 終於有人成功解讀.

由於昨天住的旅館很頹, 這次我決定對自己好一點, 我要住好D (住好D的宗旨只是想房間裡有獨立廁所, 而已). 的士一到酒店門前, 就馬上有人出來替我拉門迎接我, 還成功講價每晚便宜5美金, yeah. 因為還未到check in時間, 所以我坐在大堂等. 大堂好靚, 職員更為我奉上熱茶. 我好感動 (人在伊朗, 經常覺得很感動), 畀多少少錢服務就好咁多裝修就靚咁多住得舒服咁多!

lobby

剛才為我拉門兼幫我講價兼幫我搵壺茶黎飲的男人過來找我, 原來他不是酒店職員, 是司機, 想我包車. 其實我對包車實在沒興趣, 我只想自己去鳩行, 景點去得多與少並不重要. 不過10美金車我去睇夜景和上山坐纜車呢個package令我心動了. 由機場出市區半個鐘車都要6美金左右啦, 包車三個鐘都係10美金好抵屌. 故吾屌之.

check in入房後第一件事是補眠. 下午兩點, 再次出動, 探索伊斯法罕.

伊朗逢星期五是假期, 整個城市亦如傳聞一樣寂靜, 幾乎全城店舖也沒開, 不愧是星期五.
因為行錯路, 走到了三十三孔橋, 原來很近我下榻的酒店.

走進bazar honar旁的清真寺, 大概因為不是旅遊熱點, 裡面只有三個當地人. 雖然我連這清真寺叫乜名都不知道, 而且裡面在裝修, 有點像荒廢了, 但畢竟這是我第一個參觀的伊朗清真寺, 還是滿心歡喜, 有更強烈的感覺知道自己真的切切實實地來了好想去的波斯.

臨走遇到一老伯, 問我從哪裡來, 是不是巴基斯坦. (後來又再有人估我係咪巴基斯坦人, 我有曬得這麼黑嗎?) 歡迎我來到伊斯法罕. 好開心, 我愛伊斯法罕!

走進夜鶯花園, 到處都是野餐的人們. 好溫馨. 可惜沒人邀請我加入, 有點失望. 公園內有一名為八重天宮的皇宮, 但極細小, 繞著它走一圈都不用兩分鐘, 而且從外面也能大致窺見裡面的情況, 所以沒付錢入內.

有兩個女生向我say hello, 好開心.

公園內除了野餐的人, 還有很多午睡的人. 見到有人拿自己對鞋當枕頭, 這... 很特別.

行左好耐, 見到有個世界文化遺產(事後查返先知佢係四十柱宮), 入到去, 好靚, 宮殿門外的天花和牆壁全由鏡子鑲嵌而成, 美麗得夢幻, 望著這個我朝思暮想的波斯建築, 內心很激動. 殿內的壁畫更令我嘖嘖稱奇, 原來波斯畫好似中西風格混合體.

終於來到今天最重要的目的地: 伊瑪目廣場, 是僅次於天安門廣場的世界第二大廣場, 算是大名鼎鼎, 不過街坊們都係當佢樓下公園仔, 大人坐係度吹下水訓下覺, 細路就玩下水池D水, 跑跑跳跳.

廣場邊有座清真寺, 叫做羅德菲拉清真寺, 裡面牆壁全由藍色瓷磚砌成, 寺不大, 沿路走進去, 其實甚麼傢俱雕像都沒有, 直至走到盡頭的全藍色禱告室, 依然甚麼也沒有, 但空空如也的禱告室, 反而有種莊嚴, 有種神聖, 有種less is more的感覺. 一走進去自然會啟動冥想模式. 忽然之間, 我感到自己的渺小, 宇宙的浩瀚. 我沒誇張, 我真的有這種感覺. 寺外和寺內完全是兩個世界, 外面很熱有點吵, 寺內很清涼很安靜.禱告室裡有幾個洋人坐在地上發呆. 我也想加入, 覺得坐在這裡絕對有洗滌心靈的感覺. 奈何我沒時間, 我約了司機待會去看夜景, 現在趕著回酒店了.

對此我有點遺憾, 因為完成整個伊朗旅程後我才發現沒一個清真寺的洗滌和頓悟程度比得上這裡. 我應該再走進去, 坐下來, 花更多時間在這裡的.

走過伊瑪目廣場的店舖, 好多瓷器鐵器, 全部很精緻人手製作(親眼睇住鋪頭D人即場製作, 全人手)我很想買, 最想買係瓷磚. 那些波斯風格的藍色瓷磚, 太美了. 好想將家裡的廁所變成波斯風, 但我不可能買一箱瓷磚回家啊. 在一家小店買了handmade彩繪瓷磚磁石, 算是圓了買瓷磚的心願. 後來又係好後悔冇買多D (因為用剩了很多錢, 夠買多十幾塊磁石), 成堆砌埋一齊好靚... 我在德黑蘭和伊斯法罕只見過這店有得賣.

顧店的小男生叫Ali, 英文很好, 他的眼神表情語言皆流露出感謝之情, 我相信他是真心多謝我欣賞這些磁石, 也感覺到他以伊斯法罕為傲. 他更因為我幫襯他買磁石, 說要請我去teahouse飲茶, 請我有空的話務必要讓他請我飲茶. 我心諗, 我才幫襯了他三十幾港幣, 要是他請了我飲茶還能賺甚麼! 更令我驚訝的是, 他想留電話號碼給我, 但沒有紙, 只好寫在廢紙上, 他很誠懇地說: hope you accept my deep apology. i don't have good paper.
這種真誠深深打動了我. 要有多愛自己的城市, 多愛自家店舖的產品, 才能如此謙卑. 雖然我最後沒找他飲茶, 但將來再去伊斯法罕的話, 我絕對會再光顧他.

本來打算原路來原路走, 結果路痴如我當然失敗, 向親切的老婆婆問路後, 走了另一條路回酒店, 1830返到, 小休半個鐘, 1900會合司機睇夜景去.

司機名叫hammid. 先去赫久古橋. 河道缺水, 成了一大片空地, 有人在玩遙控車, 好不愉快. 橋底有一群一群的男人在唱歌, hammid說在這裡唱歌特別應聲, 有環迴立體聲的效果.

本來我坐在車廂後座, hammid叫我坐上前來, 聊天方便. 較特別的是, hammid說在伊朗一腳踏幾船是尋常事, 他自己有兩個女朋友(一個同佢差唔多大都係四十, 一個二十歲, 真係大小通吃). 佢仲話自己好鍾意去秦國, 鍾意去秦國召妓! 當地妓女亦好鍾意佢, 因為佢識按摩! 當妓女幫佢按摩時, 佢問妓女累唔累, 妓女話梗係累啦, 佢就倒返轉頭幫妓女按摩, 於是妓女們就好鍾意佢!

然後hammid就幫我按摩手掌, 佢堅係識按, 不過我唔想同男人有身體接觸, 所以按左幾下就話夠了唔按.

去到sofeh山腳, 見到好多車塞晒係度等上山, hammid說, 因為今日係假期所以好多人上山, 呢條車龍睇怕要等一個鐘先上到去. 我心諗, 佢冇理由唔知逢星期五呢度會人多吧, 咁點解唔建議我聽日先黎睇夜景.

唔上山, 於是去左cafe飲野, hammid請.

最後返去三十三孔橋, 好多情侶, 係拍拖聖地.

返到酒店已是2130, 時候不早, 隨便在附近買了kebab麵包. 條包好硬, 仲成隻前臂咁長, 食極都食唔完, 好飽.

因為晏晝行去伊瑪目廣場發現比想像中遠, 但我有些更遠的清真寺想去, 於是叫hammid聽日車我去. 包車一個早上20美金.

2015年9月16日星期三

兩年了嗎。

Fb的回憶功能無情地提醒我, 南美之行已是兩年前的事了。這兩年, 返過三份fulltime, 去過六次旅行, 連我最想去的伊朗都去了, 算是完成了一些事。不過無論走多遠, 始終還是要回來找工作。唉。

2015年9月14日星期一

男人唔可以窮。情迷月色下。

男人唔可以窮。
我看了原著第一集，比戲好看。

戲裡：
阿正由鵪鶉變到夠膽寸german，轉變之快，有點突然。

沒詳述阿正努力認真炒金，彷彿他的成功是僥倖。反過來，又拍到阿勇好認真地炒金但爆晒倉，急進累事的描寫不足，看起來似乎真的只是欠運。

原著裡Yoyo 的優點好像一項都沒拍出，富同情心，善解人意，孝順，即使用身材吸引客戶還是有苦衷讀者會體諒。可是這些特癥，在戲裡yoyo身上一項都找不到，我看見的只有為r客不擇手段，角色設定除了身材養眼外，非常不討好。

以娜戲分太少，她對阿正的影響只能靠寥寥幾幕帶出。

由於講安兒的部分太多，但與阿正的一段情說服力不足。

廖啟智演得好好。

與其開咁多條線搞到對角色刻劃不深，不如cut左安兒條線，做返原著咁就算。

情迷月色下。

好睇，好幽默，對白夠抵死。

我想講關於你笑容的情緒牽動。

我知道你唔相信自己咁幸運，不過你就係咁幸運。

你可以同一個機智既天才共渡餘生。

你竟然唔要通往天堂既護照？

Day 49 德黑蘭: 伊瑪目霍姆尼廣場

其實修端相當期望這班機可以delay, 因為準時的話就是凌晨三點半到達德黑蘭, 半夜三更, 很麻煩。而不幸地, 班機冇誤點。

修端找了個德國女生一起拼的士, 她一個人來這邊的大學學兩個月波斯語, 修端覺得她很不簡單, 修端激勵自己, 別人可以, 自己也可以. 可是仔細想, 在外國這些厲害的人多的是, 或許是修端大驚小怪。

的士如傳說所言, 時速140公里亡命狂飆, 街上又靜又黑, 修端有點擔心。

先送德國女去 home stay, 的士司機人很好, 下車幫忙找是哪一戶人家, 途中不慎誤按其他鄰居的門鈴, 吵醒了一個老伯, 但老伯完全冇嬲, 仲好熱心幫忙, 的士司機等到有人出黎接德國女, 目送佢入屋先走, 極度盡責。

然後到修端。修端沒有旅館的波斯文地址, 司機抓了些路人來問路, 幾經折騰終於到酒店了。司機替修端喚醒了酒店reception, 目送修端入去然後才走, 修端好感激。而且不知何故司機拒收修端的錢, 修端將錢遞到他面前他也耍手不要,修端不知道是因為溝通出錯, 德國女已經為修端付款, 抑或司機內疚搞左咁耐而唔收, 但無論如何這位伊朗司機, 是修端接觸的第一個伊朗人, 他無疑是個大好人, 這對修端來說總是好開始。

豈料原來事情還未完結。經過一輪溝通後, reception 阿哥說這裡不是修端想去的旅館。這酒店和修端想去那間旅館名字太相似, 串法上只是一個H的不同, 司機搞混了。修端沮喪, 修端怨恨呢兩間野改埋晒d咁似既名。修端本來打算省煩, 企圖先在這裡住一晚, 無奈這間酒店太貴, hkd6xx一晚, 修端想去的那間才usd1x一晚, 相差太遠了。連reception 阿哥也跟修端說, 這裡很貴的, 不如幫你叫的士走吧。

於是修端又坐上了的士, 五分鐘後, 這次真的到了, 可是reception阿哥明明跟修端說的士是120000rial, 的士佬卻收修端300000。dc9他好撚惡, 街上只有他和修端, 修端好無助。修端只好安慰自己: 頭先個程慳左, 咁30萬就由機場黎到旅館都係抵左既。然後修端就霸氣盡失咁畀左30萬。

這時已經五點半, 旅館reception阿哥在睡覺, 他說半個鐘後可以 check in, 然後倒頭繼續睡。修端就坐係張凳上(這旅館沒大堂)鳩等, 等等下成功撞中wifi密碼, 等等下旅館隻貓痴埋黎, 匿係我背脊訓覺。修端就這樣跟波斯貓度過了兩個半小時, reception阿哥才睡醒, 為修端check in. 其實check in手續只是收起修端的護照, 給修端鎖匙. 修端不明白為何他兩小時前不可以先將自己安頓好才繼續睡覺. 不過修端對於終於能順利入住還是很感動, 雖然房間比想像中小和頹, 但還是很感動, 馬上脫掉長袖衫和頭巾, 解除束縛, 補眠去.

修端睡醒已是中午十二點. 修端躺在床上看天花, 覺得好掙扎. 修端眷戀房間裡的安全感, 但理性告訴修端, 此行目的就是要出街走走. 於是修端給自己一項簡單的任務, 就是買去伊斯法罕的機票和吃午餐, 然後不情不願地出門了.

修端剛才跟波斯貓坐了兩個半小時的凳上, 現在坐了一個男人, 男人用英文問修端是哪裡人, 修端答了, 然後男人竟說起廣東話來, 修端很開心, 覺得很親切很奇妙。男人是旅遊團導遊.

導遊說他正在煮午餐, 問修端要不要一起吃. 修端掙扎, 好不容易才鼓起勇氣決定外出吃地道菜, 現在卻有了變卦. 修端又告訴自己, 還有幾天可以吃地道菜, 難得有人邀請, 應該答應.

修端接受導遊的免費午餐. 修端乘著等開飯的空檔去了附近的旅行社買機票, 本來打算坐巴士, 但經過歐洲多程長途火車及巴士後, 修端坐到想嘔了, 所以決定豪一豪搭飛機. 由於機位問題, 伊斯法罕的行程由四晚減為三晚, 來回五百幾港幣. 修端覺得價錢合理. 坐大巴單程六小時也要百多元, 飛機單程一小時, 二百幾元. 修端覺得付多一倍價錢, 買來多於一倍的舒適, 是值得的. 修端明早要坐八點幾的早機, 天未光就要坐的士去機場, 伊朗逢星期五是假期, 修端有點擔心冇的士.

回到旅館, 跟導遊和團友一起吃茄汁意粉. 導遊不停用廣東話跟修端說話, 修端是全場唯一懂廣東話的人. 修端覺得導遊跟團友不相熟沒交流悶慌了, 所以見到懂廣東話的修端便好像他鄉遇故知. 整頓飯幾乎只有修端和導遊兩人在聊天, 其餘兩男兩女的團友都沒作聲. 女的會普通話, 男的會英文, 看起來都是東亞人模樣.

飯後, 導遊指示團友洗碗, 包括修端的碗, 然後再指示團友煲水沖豆奶給修端. 修端被視為座上客,受寵若驚. 修端捧著一大碗滾燙的豆奶, 覺得很感動, 人在異鄉有陌生人為自己炮製久違了的家鄉食物, 簡直有今生冇來世。導遊邀請修端一起吃晚餐, 還預告會煲雞湯。修端覺得很吸引, 而且這是難得的體驗, 欣然答應.

在房間頹廢了一會, 修端覺得要出去體驗伊朗, 於是又給自己新任務: 視察附近的地鐵站, 還有去伊瑪目霍姆尼廣場走走.

打開旅館大門, 車子響安的刺耳聲, 和著熱浪和渾濁的空氣衝來. 修端橫過傳說中很難通過的車來車往的馬路, 覺得不外如是, 越南車更多, 這伊朗還未需要修端使出青蛙過河的絕技. 順利走到地鐵站, 沿路只有一個人跟修端說Hello, 修端有點失望, 修端以為成條街既人都會係咁hello自己.

來到地鐵站, 修端看路線圖, 一個男人叫修端看另一幅更清晰的圖. 修端覺得伊朗人雖然不怎麼hello自己, 但還是很友善.

修端走到伊瑪目霍姆尼廣場.只有噴水池, 並非想像中像天安門的大廣場. 沒有人找修端合照, 修端有點失望.

時間尚早, 於是修端愈走愈遠。走進地鐵站的商店, 買了紅石榴汁, 女職員知道修端不太懂計算伊朗的貨幣, 不但沒嫌棄修端數錢慢, 還送上溫暖的笑容。修端覺得儘管大家語言不通, 但透過金錢和笑容, 就能溝通了。

修端見到地鐵站外有去皇宮的指示牌, 於是順著走, 經過一個賣西裝的舊式商場, 還有一些清真寺和飲料店。路邊一個男人跟修端say hello, 修端有點高興, 終於又有人跟修端打招呼了, 但不敢表現得太熱情, 怕被摸。

修端又走了一段路, 一個長得有點似蕭友懷的小肥仔跟修端說hello, 修端禮貌回應, 但腳步沒有停下, 因為修端以貌取人, 修端不想跟蕭友懷打交道。where are you from? 修端身後響起蕭友懷的聲音和腳步聲, 修端沒禮貌, 裝作聽不見, 加快步速走開。幾十步後, 修端回頭, 蕭友懷已經沒有影踪。

走了一會還未見皇宮, 修端心想, 反正皇宮現在已關門, 幾天後會去, 不如現在別去了。於是修端折返。邊走邊發呆時, 修端忽然聽見有男人快樂地跟自己說: hey, i see u again!是剛才跟修端say hello的男人。修端覺得打招呼會令人開心, 決定回港後多點主動跟人打招呼。

回到旅館, 修端繼續受導遊和團友恩惠, 黐飲黐食, 而且免洗碗。今餐食炒椰菜, 白飯, 雞湯。雖是簡單樸素的菜式, 但修端很高興, 因為出門以來都沒吃過這種家常菜, 修端想念香港和家人。那刻, 修端甚至覺得那雞湯是世界級, 一整隻雞, 還放了杞子, 一飲就覺得很滋補, 令人忘記德黑蘭的乾燥。

兩名女團友只吃了很少, 雞湯更是碰也沒碰。修端覺得別人為自己做菜, 無論如何也該賞面。

導遊跟修端用廣東話說了很多話, 修端覺得他其實不介意自己有沒有在聽, 他只是需要一個說母語的缺口, 將他心裡憋著的都說出來。修端覺得導遊應該很寂寞。

導遊說: 我地呢個團唔係去玩嫁, 佢地(團友)通常叫我"老師", 佢地就係"學生", 我帶佢地去歐洲, 佢地就留係個邊唔返黎嫁喇。

導遊: 講得白d即係偷渡, 呢班學生係藏人, 係大陸藏人有乜地位? 生活得唔好, 咁咪去歐洲打工囉。尼泊爾都好多藏人呀, 喺大陸有乜好啫。

修端忽然明白為何兩位女學生吃這麼少了。離鄉別井, 前途未卜, 吃不下飯才正常。

導遊: 嗰兩個女仔, 一個十九歲一個二十歲, 唔驚既, 好多學生都有親戚係歐洲。

修端覺得即使有親戚, 始終還是要過截然不同的生活, 而且是非法黑工的生活, 怎可能唔驚。修端很難過, 覺得學生們人生很坎坷, 十九二十歲時的修端, 還在ocamp玩毛毛蟲火麒麟, 而這些學生已經要為生活做黑工。逃出西藏, 去到歐洲, 生活真的會較好嗎?修端好想問女學生去到歐洲其實係咪要賣淫, 但修端不敢問。

修端以前在南美遇過一些來打工搵錢的中國人, 他們都說錢賺不多, 每一個都說後悔來了, 每一個都說想回國。修端問他們來了南美多久, 有兩個阿哥0.1秒就答出完整日期x年x月x日, 他們說, 離家的日子, 記得很清楚。修端覺得自己至少有歸期, 始終是幸福的。

"老師"叫學生為修端斟水, 修端泡著老師帶來的涼茶, 咀嚼著他剛才的話, 不明白自己為何可以這麼幸運, 在異地受到陌生人的照顧有雞湯飲有涼茶飲, 而學生們則要面對飄泊與苦難。

那兩名女學生後來問修端借洗頭水, 語帶羞澀, 稱呼我作姐姐。修端覺得她們都只是小朋友(其實自己都係小朋友), 但要應付不該由小朋友面對的事, 十分唏噓。

晚上十點, 修端跟老師和尼泊爾男學生一起去超市。其實修端要凌晨起床去機場, 應該早點睡, 但覺得晚上有人陪伴外出的機會難逢, 去超市又可購買物資, 於是就一起去了。

尼泊爾男學生原本是尼泊爾山上的導遊, 對修端描述了很多尼泊爾的風景, 雖然修端聽不太懂他的英文, 但感受到他對自己國家的喜愛。修端覺得他很幸運, 能為祖國感到自豪, 又覺得他很不幸, 要離開自己祖國。

去超市的路上, 有人跑過來從後輕觸修端膊頭, 是個伊朗女生, 問修端是哪裡人, 說welcome to iran。修端最期待的畫面出現了, 修端打算以後試試這樣對待來香港的遊客。

超市職員見到修端, 馬上雙手合十說ni hao, 修端覺得自己是個巨星, 萬人say hi。

老師為修端買的麵包和可樂埋單, 修端感動, 因為知道他犧牲了打虎頭得來的錢。

老師對修端好到一個點, 係連尼泊爾男學生都問我是不是老師的 daughter。修端覺得自己真的受人太多恩惠了。

回到旅館, 告別大家, 大概以後不會再見, 這就是人生。回房睡覺, 幾小時後便要離開這裡, 去機場飛伊斯法罕了。