Day 14 棉花堡

七點幾在棉花堡所在小鎮pamukkale找早餐, 呢個鎮好細, 是十分鐘就走完的程度。正好找到一家便宜的小店, Turkish pizza 也只是7里拉, 比其他地方便宜一半, 不過本人不喜麵包類製品, 要我獨自食完整個pizza太辛苦, 就亂點了一砵蕃茄芝士蛋, 老闆親自下廚, 一見我按電話又馬上遞上wifi密碼, 感覺親切。雖然個蛋有點鹹。

在棉花堡下的池塘看阿伯撚鴨, 佢勁大舊硬法包丟落水畀鴨食, 係我諗緊d鴨夠唔夠牙力時, 阿伯分了一舊包給我齊齊撚鴨。我掟包時唔小心掟中隻鴨個頭, 自此以掟鴨為目標, 相當仆街。為左贖罪, 我順道撚麻雀。d麻雀有個共通點, 就係每隻都唔會將塊包就地正法, 而係先鬼祟張望一下, 再極速叼住塊包飛走, 一副想獨食的樣子。

八點幾走進棉花堡, 時間尚早, 人不多, 第一下踩落去感覺好爽好冰涼, 本來36度的天氣熱到個人好攰舉步維艱, 不過一踩到冰涼的石忽然又回復hp值了。大自然實在令人大欽敬, 乜美景都有, 以前睇過白色雪山, 白色鹽湖, 白色冰川, 白色瀑布, 這次是白色石灰岩。回想奇石林的顏色也相當amazing, 光是綠色就有很多不同色的綠色, 一層層, 淺綠深綠墨綠青綠, 層次分明, 很好看。棉花堡的水的那種淺藍色很漂亮, 加上周圍都白色, 感覺很仙境, 不過後來人多, 仙境馬上下凡, 大打折扣。

由於實在太熱,  諗住快快睇埋隔離既遺跡就走, 點知睇完搵唔到第二條路落返去, 要再行一次棉花堡, 朝早行同正午行真係好唔同, 回程呢次我淨係覺得好逼人好熱好吉腳, 曾經冰涼的水也被曬到暖, 我只想盡快逃離, 如果唔吉腳會享受好多。

今餐目標係唔食土耳其野, 於是食了意粉, 其實我都唔特別鍾意食意粉, 可見我真係好唔想食土耳其野。

見到藍色同綠色可樂, 好靚。後來在車站還見到橙色可樂, 唔知有冇黃色?有的話就真係彩虹七色出齊了。

在吃意粉的餐廳hea了兩個鐘, 有開冷氣都唔涼, 真係太熱。之後再去另一有冷氣的中菜館hea了兩個鐘, 又係開住冷氣都唔涼。

台灣老闆娘說, 很多中國人都吃不慣土耳其菜, 有個家庭發現這裡後幾乎每餐都來報到。又曾有個五年級小朋友在這裡一口氣吃了三碗飯, 因為土耳其的飯量很少, 他經過多過連日的土耳其餐洗禮後, 很想吃飯。

五點幾轉去 neveshir 車站hea, 這車站頗有規模, 三層高, 有餐廳, 又多凳, 地下個層仲幾陰涼。陣間坐車成晚流流長, 為免餓死, 勉為其難在車站食左個轉轉牛肉飯, 飯同肉都好油, 不好吃。後
來回想, 我在伊斯坦堡的第一餐, 是我在土耳其吃過的kebab中最好味的。

等待的時間太長, 長到我連書都看完了, 今次睇講北韓既書: 沒有您, 就沒有我們。好不容易, 終於等到十點上車, 車上有雪糕食, 又有tropicana飲, 好感動。咁小事都要感動, 我平時日子有過得這麼慘嗎。

連續兩晚睡巴士, 沒洗澡, 跟桌上的麵包一樣不停被蒼蠅纏繞, 天氣太熱, 沒事幹終日無盡地等待, 吃厭食物, 這一切都讓我想盡快離開土耳其轉換新環境。一想到即將能回伊斯坦堡, 心裡欣喜, 因為這表示土耳其之行要到尾聲了。

尤其剛閱畢一本關於北韓的書籍, 勾起我對高科技事物的眷戀, 例如我踏入外表老舊的車站廁所, 發現裡面意想不到地又大又多位又光猛還有新淨的吹手機, 頓時萌起安全感。