Day 48: puno 去玻利維亞拉巴斯la paz

又是晨咁早六點幾去車站坐巴士，三個幾鐘後抵達copacabana關口，心情緊張，害怕進不了玻利維亞。關口由幾間小屋組成，兩間是秘魯office，辦好離境手續後便向前行去玻利維亞office小屋，門口先有一人初步看看passport，入內再有另一人負責蓋入境印。門口那人只是很隨便地看一下passport便放行，入屋後，蓋章員問：china? 
V 答：no, British Hong kong
蓋章員： yes, ok 

然後便給我們蓋入境印了！順利到難以置信啊，哈哈，太開心了，飲蘋果汁慶祝下先。

其實根據二零一三年八月三十一日最新版的bno免簽證表，玻利維亞也榜上有名，按理根本就是免簽證，可是網上見過有些人的失敗經驗，讓我瞎擔心了，我還預先想好這關口不行便去另一關口，還催眠自己是居英多年的少女，結果這麼順利就入境了，哈，向天空之鏡邁進一大步。

事後我們討論，其實過關程序是：大巴載我們來，放下我們自行走入各小屋辦出境離境手續，辦好就自行爬回車上，大巴就將我們載入玻國。

所以，只要你夠薑，你可以不走進小屋辦手續，根本沒人會盯著你，誰在車上司機就車誰入玻國，到離境的時候，回到這關口依樣葫蘆再做一次就行，理論上很可行啊。

進了玻國，在copacabana待個多小時等一點半去拉巴斯的大巴(30 bob)，趁這時看一下玻利維亞這邊的lake Titicaca ，吃點東西。

去拉巴斯的巴士很特別，中途要下車換快艇過河，巴士也由大船運到對面岸，挺有趣。

去拉巴斯的路又窄又九曲十三彎，因為塞車的緣故，四小時左右才到拉巴斯，拉巴斯是一個鑊形的城市，山上房子建得超密集，看過去很壯觀。因為是鑊形，整個城市都是斜路，往上走時有點吃力，畢竟海拔三千六啊。

玻利維亞物價低，東西都不貴。在市中心走走，行人路都是擺檔的小販，有點像深圳東門，感覺挺親切。

教堂前的廣場上有麵包節，有很多賣麵包的攤檔，見到奇怪的人頭麵包，味道一般。

有班細路在街市一角玩足球機，很歡樂。周街都賣腸仔，可是不太好吃。

晚上很多人在路邊攤吃麵，麵包，豬雜，很熱鬧，豬雜好吃。

買生果仲難過買果汁，在路邊買了杯即榨橙汁，正，舊橙果然夠甜，才三塊錢給你榨了三個橙呢。

雖然聽說拉巴斯危險，但我覺得還好，只是這裡很多人不會英文。

玻利維亞關口小屋

Day 47 puno：lake titicaca的的喀喀湖

車子六點九準時來酒店接我們去碼頭坐船。

Lake Titicaca 都挺漂亮，藍藍的，波平如鏡，但遊船就有點無聊，因為冇乜特別野睇，就是湖啊。

船開了很久，終於到蘆葦島，是一個用蘆葦人手織成的島，島比想像中小，一眼望得晒。雖然我不明白為何島民要住在這鳥不生蛋的島，但還是佩服他們無中生有的能耐。 他們每天的生活就是等遊客上鳥，向他們推銷手信，但他們不太會做生意，手信都沒太多人買。我們坐在島上閒著沒事，見島民們吃雪條，便跟他們買了一根，他們應該將雪條拿出來賣，相信銷量會比手信好。

船又開了很久，到了另一個島，這島並非蘆葦島，只是普通的島。一直往上坡走，累死了，但山頂風景挺不錯，海天一色，湖水閃閃。

在島上用餐後後船就駛回puno，咁就一日。

晚上又是吃chifa, 因為想吃粉絲，可是後來又嘔了。

明日決戰玻利維亞，希望順利入境。

圖為炒粉絲。

Day 46 cuzco to puno普諾

晨早check out 坐巴士去puno，點知臨走畀酒店職員煩住要我地畀返未畀既房租，明明早兩日佢同事話六十蚊一晚我地先繼續住，佢而家話佢同事唔識英文，總之要我地畀多百幾蚊，拗左十幾分鐘，係咁易畀左少少錢佢算。

趕住去巴士站，又行錯路，幸好最後都趕到。

七個鐘後抵達puno，隨便找家旅館安頓好，報了明天去lake Titicaca 的團，然後去市中心走走，吃了chifa，有味道很廣東的粉絲湯，很久沒吃過粉絲了。

晚上可能受高海拔影響，將chifa全嘔了出來，只好馬上睡覺，明天又要晨咁早起床。

Day 45 cuzco：武器廣場

幾乎每位旅者都是為了天空之城馬丘比丘才來到庫斯科，可是要去天空之城所費不菲，火車票巴士票入場費加起來接近二百美金，既然我去年已感受過，今次就不再花費重遊了，讓v自己去，我今天就獨自在城裡亂蕩一下好了。

由於v報的是一日團即日來回，所以要凌晨三點半起床，天未光，氣溫還低，雨仍在下，甚是可憐，我就繼續倒頭大睡到自然醒。

本來打算起床下樓吃完酒店免費早餐便縮回房間繼續睡，結果睡不著，酒店又停電，結果九半左右便外出了，很早。

任務一，去洗衣店洗衫。冒微雨捧著大袋衣服走了廿分鐘，結果發現洗衣店沒開，又捧著衣服往回走廿分鐘回酒店，嘖，白走一趟。

任務二，去郵局寄明信片。 我指住郵局門口個紅色筒問阿姐係咪入落去，佢話係，但入完之後我發現郵局內有個位堅係郵筒，寫住international...再問多次阿姐佢都指著那紅色筒，希望寄到。

任務三，買巴士票去puno，非常迅速地買到了。

接下來就是因為得閒無事所以周圍去手信檔亂殺價。本來就沒打算買甚麼，去殺價只是因為太得閒，不過殺到好價錢便買少許吧。

腳程太快，才三小時便逛完回到酒店了。窩在房內hea到v六點幾回來，一起吃晚餐。v 說他去馬丘比丘時超級大雨，都沒心機行，幸好我去年是在晴朗的一天出發。

Day 44 cuzco:莫利梯田moray，鹽田maras

一起床頭有點痛，不知是不夠睡還是高原反應。酒店有免費早餐，但因趕時間出門，只吃了個炒蛋。

比約定時間早了十五分鐘到達，原來武器廣場的大教堂九點前參觀不用門票，趕快看了一下，教堂內正進行彌撒，怪不得免費開放，不欲打擾別人彌撒，待了幾分鐘便走了。旅遊車遲到了，害我八點半等到九點半。

先被載去購物點，然後再去莫利梯田，很高興，很期待，一直因為去年沒去到而耿耿於懷，我對梯田本已有情意結，何況今次是圓形的梯田。現在一大個圓形梯田出現在我眼前，不能說不感動，印加文明太引人入勝了，只是梯田比想像中禿，不像相片般綠油油。

然後去鹽田maras，也是震撼，沒看過鹽田，景色很漂亮，建在這陡峭的山上，採鹽的工作真辛苦。

三點半左右回到武器廣場解散，餓瘋了，但要慳錢，只好取出之前吃剩的飛機餐小吃：朱古力和脆蠶豆。

走路回到酒店附近吃chifa，就是秘魯口味的中菜，又便宜又大碟，如山般高的炒飯，吃得很飽，我叫了錦鹵雲吞炒飯，味道很不錯，裡面還有叉燒呢。

跟這家chifa的老闆們聊天，他們是福建人和台山人，開餐館一個月搵到一萬蚊美金，真不錯呢，但在這裡長居應該很悶吧，有錢冇地駛。我們跟他說覺得chifa好味，他極度訝異，說：唔係嘛，呢d整畀d鬼食嫁wor。

食完碟飯，超飽，一直到睡前都沒覺餓。

回酒店不久便落狗屎，幸好今天較早回去，不用冒雨在外，雨一直下到半夜還沒停。

Day 43 庫斯科cuzco：武器廣場

晨早六點幾來到庫斯科，機場的travel agent 極落力sell tour ，聽她說了半小時，本來我們以為挺便宜，最後才發現價錢由最初的peruvian sol講講下不知何時變成us dollar ，太貴了，走人。

庫斯科依舊是很美麗的山城。

沒有高原反應呢，但還是在酒店先睡一下，畢竟昨晚訓機場，加上來到海拔近3400m的庫斯科，休息要緊。

下午去武器廣場逛逛，跟去年沒大分別，雖然已來過，但還是覺得這裡很漂亮，很多當地人都在此休憩，雖是旅遊區但仍保留到本地氣息，真好。

報了明天去梯田鹽田的團，看了去年沒看的十二邊石，吃了個湯，是我懷念的內有麵條的秘魯肉湯。

今年秘魯好像印了新postcard，去年找來找去只能買到好舊的發黃postcard。

晚上吃名菜: 草泥馬和天竺鼠（Guinea pig ，畿內亞豬，cuy ）。天竺鼠去年吃過，今次只是叫來讓v試試，草泥馬舊年真係完全唔記得左要試，今年補返，味道和質地都像較稔的牛扒，不過還是牛比較好吃。天竺鼠味道普通，就是較嫩的肉，但冇乜肉食，皮也韌。上菜個陣好驚嚇，成隻天竺鼠全體冇斬過咁上，原來係特登唔斬住畀我地影完相先, 好貼心。

吃完飯下大雨。

Day 42 墨西哥城飛利馬

傍晚便飛去秘魯了，這天就在墨西哥城隨便走走。

去郵局寄走了那包篤眼篤鼻的古巴雪茄。

路經一間麵包店，從未見過這麼大間的麵包店，好多客，個個客都買十幾廿個包，仲有師傳托住勁大個幾層高的蛋糕走過，情景很像卡通裡見過的歐美麵包店。麵包店樓上有個蛋糕展，放眼看去，不得了，全層擺滿了一個個十幾廿公斤重的特大蛋糕，又是很像卡通裡的情景。

離開墨西哥，坐飛機來到秘魯首都利馬，熟悉的機場，跟去年一模一樣，麥當勞也沒有加價，吃了個新出的tabasco burger, 然後跟去年一樣在機場過夜等清早飛去cuzco的航班。

古巴：假共產，真資本

一旦決定要去古巴，你已陷入深淵。

首先你要知道古巴有兩種貨幣，一是本地人使用的peso，一是外地人用的cuc，1 cuc 大約等於25 peso ，所以當大家同是買一元的東西時，你已比古巴人花多了廿五倍的錢。正因如此，外地人對古巴人來說是一條條很好劏的水魚。

的士司機，餐廳侍應，手信店老闆，人人爭生意爭崩頭，一見外地人就瘋狂拉客，爭著做遊客生意賺cuc。還遇上一個很熱情的古巴青年，最後原來逼人跟他買雪茄賺cuc差價。不是說古巴行共產主義嗎，共產都要爭著賺錢？

這個所謂的共產主義國，不只人民愛錢，政府也要錢，由上到下都將外地人劏得一頸血。先是入境簽證要usd25，最意想不到是當你在古巴待了數天山窮水盡準備坐飛機著草時，才知道原來得再以現金付25cuc的機場稅，否則不能離境！他奶奶的，去過這麼多地方，從沒試過離境也要付錢啊。

連國家都要搞資本主義來維持共產，註定失敗，共產於古巴根本只是傳說，不知哲古華拉泉下有知會有何感想？

古巴雖然新奇有趣，處處舊車舊建築，猶如回到過去，無奈這裡的人愛錢愛得令人反感，如果閣下萌起了去古巴的念頭，敬請做好被劏的心理準備，還要記謹留點cuc以備便臨走付機場稅。相信我和古巴應該緣盡於此，冇下次。

Day 41 夏灣拿返墨西哥城

因為昨天駛太多錢，為慳錢今日直至上機前都唔會買野食。

約左尋日車我地去食雪糕個司機一點黎酒店車我地去機場，結果佢一點四先黎，都好彩佢有黎，因為佢只收15cuc，如果酒店call車要貴多10CUC。

就係咁，慳左的士錢，所以有錢係機場買野食，太好了。用盡所有剩返既cuc買左兩罐汽水一支可樂一份三文治，一盒乳酪同一包餅，兩個人share食，雖然不多但有東西下肚已夠感動。

以為終於可以離開這瘋狂劏遊客的地方，點知原來臨走要再畀人劏多次，離境要畀廿五cuc機場稅，如果唔係唔走得！佢老味，離境稅不是機票包了嗎？幹嘛又要畀多次，又話共產，共佢條毛，始終都係要靠資本黎維持。

仲用剩左一毫子cuc，v 將佢畀左廁所長，佢話費事孽隨身。

回到墨西哥，v 被扣留了大半小時才成功入境，關員說他美國簽證過期不能入境，可是特區護照入境墨西哥本來就免簽證，而且現在又不是去美國，美簽過期又有甚麼問題？

好不容易終於回到酒店，落街吃吃taco，瘋狂買了幾個麵包，然後回去好好睡到自然醒。

就係用25cuc買左張咁既貼紙，證明畀左離境稅

本來諗住食飯，點知原來連飯都要用taco墊住

這盒奶的味道太淡，難道這其實是一盒人奶？

Day 40 夏灣拿：夏灣拿大學，城堡Real fuerza，城堡san salvador

坐的士到夏灣拿大學，跟司機說好待會在校門會合再載我們到別處，然後我們就走進大學亂逛了。交通不便真麻煩，去邊都要坐的士。

遇到一位很熱心的該校哲學系學生，主動跟我們講解了很多學校的歷史，又帶我們參觀校園，從他的講解中聽得出他為國家感到很自豪，也喜歡社會主義。佢真係對學校歷史非常熟悉，乃至掛在牆上的一幅畫佢都介紹得頭頭是道，這方面我對他是大欽敬，換轉係我只能向人介紹下學校設施，我點記得每個faculty創辦年份同歷史啊。他說畢業後打算做老師，我也相信他會是個好老師，識咁多野，英文雖有口音也流利，有前途。

然後他帶我們去喝特飲，名字忘了，就是由冰，檸檬，可樂，薄荷和不知甚麼混合而成的飲料，味道一般吧，沒甚麼可樂味。古巴朋友仲係張紙幣上寫左幾句野送畀我地，我地又回贈佢一個香港兩蚊銀，仲咁岩係回歸紀念幣啊，算佢走運。

飲飲下野佢忽然閃左去，然後帶住一包雪茄同一個哲古華拉硬幣返黎，啊咁好送禮物畀我地，點受得起啊，太熱情了朋友。

點知點知佢話只係幫我地買，雪茄同個銀加埋要25 cuc!!!!!!!  啊啊啊？！我地冇話過要買啊？！我地都唔食雪茄要黎托嗎？但佢已經買左返黎仲話冇得退錢，我地個腦又係個一刻轉唔切，畀左錢佢先識同佢講唔要，拗左一陣佢都話冇得退貨換貨，買左就係買左，啊。唔應該畀錢佢，應該話冇咁多錢啊，唉。

知唔知佢賺左幾多？古巴有兩種貨幣，一款係古巴人用既peso，另一款係外地人用既cuc，1cuc差唔多等於25peso，即係佢用25peso買包雪茄同個銀，我地而家要畀返25cuc佢，所以佢賺左25*25-25peso=600peso!!! 古巴五球雪糕先至3 peso ，佢賺左1000球雪糕呀你明唔明佢係賺左幾咁多。仲要岩岩個杯野飲，佢一杯我地兩杯，每杯4cuc加埋係12cuc佢要我地畀埋佢個份！我話我地冇咁多錢，畀左7cuc就走了。

真係一講錢就傷感情，岩岩仲好高興遇到咁友善既古巴人，仲對佢咁高評價，原來最後都只係為錢，雖然25cuc不算很多，大約等於hkd250，我亦明白佢應該都係因為窮先會咁做，但畀人欺騙感情真係令我頹左，然後又搵唔返那個說好會等我們的的士司機，車錢都未畀佢wor，唔見左人既。算了，心情不佳，係條街蕩左幾分鐘就坐車返酒店了。

返到酒店都只係一點左右，又冇wifi冇得上網，用酒店電腦又要錢，唯有係咁睇漫畫，好不頹廢，買咁貴機票黎到古巴竟然大好一個下午匿係酒店睇漫畫。諗落覺得唔妥當，於是三點又重新出發了。

等左好耐先有的士，想出個街都咁煩。去downtown食雪糕，其實味道都係雀巢咁，又唔係特別平，只係見黃翠如同項明生都有食雪糕，所以先口痕想食下。今次個的士司機又係好好咁說好會等我地，畀我地未畀車錢就落車走去佢視線範圍外買雪糕。

成功食到雪糕，心情好了一點，還在路上見到將銀紙攝在胸罩的女人。過往我一直認為將錢放入胸罩這行為是為了減低錢財被偷的機會，但這女人，只有半張銀紙攝在胸罩，還有半張露了出來，那豈不是全街都知她胸口有錢？要搶走那張銀紙不是更易嗎？完全推翻了一直以來我對攝錢在胸的理解。

一直沿著海走，走過兩座城堡就回去了，因為實在太熱太曬，曬到抬唔起頭做人。平時的士多到係佢yap我唔係我yap佢，今次熱到唔想再行卻又搵唔到的士，好不容易上左架殘舊的士，就係我話五六十年代款個d鐵皮車，未坐過想試下。架車真係好舊，行起上黎仲chok 過林峰少少，都係一個體驗。一日未返到酒店一日都唔可以鬆懈，呀的士大佬去錯左另一間酒店，上車前我已經畀左地址佢睇，竟然都行錯路，我已經分唔清佢真唔識定假唔識，我淨係知明明上車前講好車錢5cuc，但落車時佢話頭先走多左路又唔知乜乜物物而家要收10cuc。西班牙文我真係聽唔明，算喇，要錢你拎去，我要下車回酒店對摺了。

古巴又話係共產，d 人要咁多錢黎有乜用？而家根本已經唔係純正共產喇，個個爭生意爭崩頭，搶住做遊客生意收cuc，好資本呀，共產只是傳說，醒下啦老友。

雖然我地已經返左酒店對摺，但今日既事仲未結束。仲記唔記得我話搵唔返講好係大學門口等我地既的士大佬所以冇畀車錢？夜晚佢終於黎酒店搵我地了，佢話等左我地兩個鐘，冇左好多生意。我又再次分唔清佢講真定假，總之我地當時唔見佢架車，係我地眼大睇過龍定佢真係走左就死無對證了，不過佢睇黎都唔係壞人，畀左上車前講好既車錢佢，佢都冇額外多要就走了，算係咁啦。

用左好多錢係古巴，out晒bud，而家只係捱住餓等聽日快d飛返墨西哥，唔係好想留係度。

古巴少年, 你唔好再叫我做朋友了

這包可恨的雪茄

Day 39 夏灣拿：華人街，舊城區，革命廣場，國會大廈

要去古巴了，全球少數行共產主義的國家，很期待，是本次旅程其中一個我特別期待的地方。

之前看黃翠如地平線上，她好像來不及check in，於是我們特意比起飛時間早三個鐘到機場，結果很順利，古巴簽證也輕鬆辦妥，只需在機場候機室的櫃檯付錢就馬上到手（261 Mexican peso )。

其實之前上網睇過，話中國護照免簽證，有香港人試過博大霧唔用簽證都入到境，因為特區護照寫我地國籍係chinese。我就唔夠薑唔買簽證，但夠膽入境古巴時特登唔拎簽證出黎睇下可否闖關成功，結果係失敗，不過就知道左去到古巴個邊都有得買簽證，唔一定要上機前就買好。

同機有中國人，一問之下原來佢地都要簽證，免簽證神話破滅。

跟她們併車去酒店，因為她們住處與我們不同，就約好之後在舊城區centro historic的哲古華拉像等，到時還她們的士錢，但後來我們找不到這個哲古像，只好在舊城區到處逛一下就回去。

有個寫著中國城的牌坊，那邊有些中菜館，亂走時還發現了黃翠如去過的光華報社和太極學校，還真多人在耍太極呢。

可是不太喜歡這裡，沒有之前美國唐人街的親切感，只有很多中菜館的古巴侍應向你兜生意，也不多見有華人出入。其中一個七十八歲來自中山的老伯，千叮萬囑我們要小心，說古巴很多盜賊，還怕我們聽不懂，在紙上寫下“唔好“二字給我們，嚇得我不敢再拿相機出來。但明明聽說古巴是個安全的地方，不知誰是誰非，後來走著又覺得好像沒甚麼，還是到處拍了一下。說起來，老伯十五歲已經來到這陌生的國度，這些年來究竟過著怎樣的生活？太多尋找他鄉的故事了。

在旅遊節目見過的景物忽然活生生在眼前出現，有種'原來真係咁嫁'的感覺。街上都是五六十年代的鐵皮車，好似隨時會跪低咁款；幾乎全城女士的上圍都極豐滿，少女都好早發育；成街都係兜生意既人，包括的士司機，手信店，麵包店，中菜館，睇黎生意好難做，仲有個阿婆係街邊問我要唔要整dreadlock!!!呢度五十蚊港幣左右整到喇啊啊啊，好想整但我呢刻兌唔夠錢手上冇多餘現金畀我咁玩法，嗚啊，聽日有錢個陣再有人叫我dreadlock而又唔貴的話我實整啊。

街上有各種唔同既的士: 馬車，人力車，鐵皮車，仲有正常樣既的士，唔知點解咁多疑似本地人都坐人力車，唔通好平？但每次都見d車伕好似就黎踩唔郁咁款。

見到d巴士架架都好逼人，款式又係好舊，仲好殘，甩晒油仲有鐵銹。

外地人用的古巴錢CUC同美金幾乎一比一，好貴，不過物價冇美國咁高。

只有的士一樣交通工具去到我下榻酒店，好肉赤。

黎到古巴，真係好似回到過去，周圍d野都好幾廿年代，新奇有趣，聽日繼續探索。

Day 38 墨西哥城：三文化廣場，中央郵局，審法廣場，castillo de chapultepec

三文化廣場，顧名思義是個集合三種文化的廣場，包括前哥倫布，西班牙殖民，現代。廣場有個大教堂，綠草如茵但祭壇遺蹟有點像廢墟，沒落的文明。

去中央郵局寄明信片，郵局內裡很華麗，難怪成為景點。

郵局旁的步行街很熱鬧，可能星期日特別多人，很多賣藝人，有個人玩波玩到出神入化，甚有水準，好多人圍觀同畀錢。這步行街較平民化，不像美國名店林立，稍窮都覺得高不可攀。

有幾個中學雞用英文訪問我地，呢種project都幾似香港的，但他們英文不太好。

走進餐廳亂點餐，menu 上冇乜邊個字係識，上菜一刻先知自己點左乜，好刺激。

審法廣場，今日剛好在舉行書展，挺有文化氣息，逛逛附近的舊城區，又去多一個世界文化遺產。d 人真係幾寫意，看檔的姑娘和阿姐都在刺繡。路過博物館，進去繞個圈就出來，都是西班牙文，看不懂。

城堡，係一個大公園入面最高那座建築，因為太多人排隊所以冇入去城堡，在公園走走就好，周圍都係激烈擁吻的情侶，佢地好持久，全部都可以去參加錫得最耐比賽。

食左檔好好味的牛雜

終於買到古巴機票，明天去古巴了

Day 37 墨西哥城：太陽月亮金字塔，瓜達盧佩聖母大教堂

去chinatown，不覺有甚麼中國店舖和中國人，只有一兩間中式餐館。

找不到旅行社，還未買到古巴機票。

去太陽月亮金字塔Teotihuacan ，地鐵和旅遊車上有人賣小食和抱著結他自彈自唱賺錢，呢件事真係好南美。仲有d車一停紅燈就會有人係車間穿插賣小食賣報紙賣藝，秘魯都係咁。

冇買票就入左場睇金字塔，太爽了

冇想像中咁大面積，太陽金字塔都幾高好多級樓梯但我見慣世面（？！）難唔到我既，呢度都唔夠泰山十八盤咁斜，但不停提腿拾級而上都幾要命，希望聽日唔會腳痛。登金字塔而小天下，究竟要幾厲害既一個文明先可以以當年技術建造咁大型既金字塔？仲要對神明好虔誠先至有心機起咁大個祭壇。不過馬雅建築好像比印加粗糙。

有班黎參觀金字塔既中學雞，成班弟弟爭住黎同我影相，我果然係萬人迷，哈哈。

教堂Basilica de Guadalupe，三個教堂並排，其中一個斜斜地，唔知會唔會終有一日倒塌，另一個好似舉行緊佈道會，好多人睇。告解大排長龍，咁多人要搵神父。

睇完教堂忽然下大雨，跳進餐廳避雨順道用膳，同侍應繼續係雞同鴨講，幾好玩。

搭地鐵，一開門d人就爭住逼上車，我心諗，哇，駛唔駛呀。我作為香港代表梗係乖乖等人落晒車先上車啦，就在我上車之際，車門竟猛力關上，好大力度咁夾左我一下，唔怪得d人咁心急要逼上車啦，痴線，車門勁快關門。被夾後我發現全車廂人都用極度關切既眼神望住我sosad，足足望左一個站。剛巧我搭一個站就到站落車，希望佢地唔好以為我因為太羞家所以落荒引逃吧。

最後就係剪頭髮，曾經在越南剪髮覺得很好玩，之後就一直找機會再在旅途上剪髮，今次留住長頭髮咁耐其實係為左黎墨西哥整個dredlock頭，可是太貴，要800 peso ，那只好剪剪髮就算，60 peso, 剪左三四寸，而家頭髮都不過肩，就係要大幅度修剪先夠有趣。剪髮阿姨也是個很友善的人呢。

墨西哥比美國有趣多了。有著到lolita咁既拖地姐姐，又有好多努力洗舖頭門口位洗到成地泡既阿哥，仲有笑meimei用奇怪跑姿在麵包店內慢跑既姐姐，垃圾車一邊行一邊企係垃圾車尾聞住垃圾味位都冇得坐好似好慘但仍然談笑風生既一班阿哥，無啦啦笑住同我講左句唔知乜野西班牙文意思疑似係“等過馬路駛咪企咁出呀屌你“既司機，長期開住窗既地鐵，檔檔都賣風月報既報紙檔，有觀星隧道的地鐵站，味道介乎豬扒，火腿，午餐肉之間既煎豬扒。太有趣了，墨西哥。

Day 36 墨西哥城

終於離開美國了，總括一下美國是:

馬路好多人亡命踩滑板

逼人畀小費，仲要至少一蚊美金

好多乞丐，一係拎住塊牌寫d懶係冠冕堂皇既藉口，一係好惡咁周圍問人要散銀

好多肥人，坐公交時要將自己團肥肉塞入座位

食物好熱氣，薯條，漢堡，薄餅，炸雞

物價好高，仲要加tax

好多巴士司機都係黑人，而且幾好人，唔駛我畀車錢，哈

最喜歡邁阿密，覺得那邊的人較友善，例如巴士司機免費載我們去搭另一條線的車，還下車指點我們怎樣走

又話入境美國好煩要搜身，我乜都冇脫袋都冇畀人查過就輕鬆入左境

遺憾冇去過國家公園，撞正政府收皮，我一離開美國佢又開返，冇緣

美國地方夠大容納到bmx, 直排輪，滑板呢d運動，幾好，香港想搵個roller場都難

都好多人周街訓同跳舞

暫時咁多，諗到再加。

聽講墨西哥城好危險，有點擔心，但很快沒事了，因為好多墨西哥人都好友善，至少唔會好似部分美國人咁見你不擅長當地語言就神色不善，仲好樂於用肢體語言同你溝通，而且雞同鴨講其實好有樂趣。

墨西哥條街好似河內，仲好多街邊檔，物價平過美國好多，太好了。食物都比美國的有內涵和多樣化。

煩惱去古巴的機票，機票真係應該一早買定，last minute又貴左好多。

究竟插係度轉住黎燒那塊肉，可以插係度賣幾多日？

Day 35 邁阿密：小夏灣拿，南灘

小夏灣拿果然很不像美國，充滿中南美氣息，當地人都是中南美洲樣，不是白人黑人，再食埋個飯，哇，個種飯乾身一粒粒既質地，仲有伴碟既煎香蕉，係呢個味道了，舊年去秘魯的感覺即刻返晒黎，就係好掛住香港的米線，呢度d野食汁都冇滴好dry啊。

行到好累，終於到藍灘，大到睇唔到盡頭的沙灘，一望無際的大西洋，天氣又好合作地異常好太陽，真係好適合出海暢泳，無奈冇帶泳衣，只好睇住d浪捲捲下，d 洋妞扭扭下，真係好一個碧波蕩漾的海灘。

晚上v約了黑山朋友一起用膳，廿二歲仔一個人飄洋過海黎邁阿密做搬運工，又唔識英文，真係唔簡單。食完野上左佢屋企參觀，好似香港的豪宅屋苑，高樓大廈，有會所，分別係人地個單位真係好大，實用面積肯定有千呎，三個人租每人每月七百蚊美金。