Day 17 歸隱田園的農場精靈 13

如果你問我仲想唔想做農場工我認真答你我唔想。 自從做過農場精靈，我重新評估自己level，係lv -100。慢，冇力，唔踎得耐，唔鍾意昆蟲。

係，我以後唔會再妄發豪語話自己愛自然，真正愛自然係唔應該介意塊面撞落蜘蛛網同埋劉明一身蟻，我唔驚昆蟲但肌膚之親可免則免。有d野真係眼不見為乾淨，所以我而家唔會四圍望。之前仲諗呢度d昆蟲生物多樣性咁豐富，但未見過有蟑螂，原來都係有，今日廁所見到兩隻。

黎之前都預左辛苦又有蟲，都仲係要黎，未試過既野都係要試下。

早上除草，成個人沒入七里香灌木群中，好多蚊。之後挖洞，未來種百香果用。今日我既大陸蹲好似持久左。

下午阿伯去送茶，擺我一個人係百香果園收果實。打算佢返黎前收晒，大成功，冇野做於是將果實擦亮，為方便也稍微分了類（分開靚，普通，爛）。

阿伯最後四點半先返，佢好驚訝我咁快收晒果仲分埋類兼擦左一堆，哈哈哈。

然後是繼續挖洞。

阿伯有樽自製水，敏感時（例如被鏟草機的草噴到）往身上噴噴就好了不癢了。材料一公斤果皮（乜果都得wor)，一公斤黑糖，十公斤水。

最後兩日，努力耕埋佢。

睇返自己blog，我竟然日日都打左咁多字，我冇電腦，全都用手機打，不容易啊，好習慣要繼續，雖然全部都係臨訓前趕住打完去訓，都平鋪直敘兼混亂（其實以前打xg都係咁混亂，哈），相信得我一個會覺得好睇，希望遲些有機會重新整理做有主題的文章。想起友人引用三毛的話：要儲，要蘊釀。

隻蛙咁隱蔽都畀我發現到。好似叫白頷樹蛙。

旅行是我的快樂泉源

錢我覺得值得花就不是無謂，而且我根本沒花多少，因為我本來就沒錢。

Day 16 歸隱田園的農場精靈 12 休耕去集集 水里

阿伯和阿姨去有機農戶聚會，所以是日休耕。從二水去集集。去到剛好走左班車，要等成個鐘之後先有佢地二水好似冇乜好行，行左一陣。

火車沿路風景不錯，都是田，諗下人地花左幾多工夫先有塊咁靚既田畀觀光客睇。

一到集集先食香蕉酥，炸菇，炸香蕉皮。蕉皮都拎埋出黎炸，好有生意頭腦，又低成本又有噱頭，鹹鹹地唔覺係食緊蕉皮。我食過的奇怪食物list又多左香蕉皮呢樣野。去未去過既地方，食未食過既野。

五十嵐的芒果青茶少糖味道真係唔錯，青茶裡有舊芒果雪葩。

飲完食完想食既野，開始踩單車。我揀單車店既方法唔係格價而係以貌取人。有個向我兜生意的叔叔有笑容好禮貌而且個樣係我鍾意既類型，即係我中五班主任個種樣，戴眼鏡的瘦的好人的樣，就揀佢。

紙箱王，這已是我本次旅程去過的第三間紙箱王，每次都係咁岩經過見到。

武昌宮，921地震遺址，見到堆瓦礫諗起之前去四川汶川地震遺址。d人黎呢度主要係行對面市集，佢地係遺址影張相就當睇左。廟畀兩邊市集夾住，好唔清靜。有免費山粉圓和綠豆沙，個個爭住飲，真係好唔清靜。

有善心大嬸主動揼水畀我洗手。

食越南雞河。自從去完越南好想搵返那味道，但在香港仍未找到，希望可以在台灣找到，台灣以前都幾多越南人嫁過黎。呢碗河，湯底只有鹹，不是這味道。開始想其實係咪我記錯那越南味，為何都找不回。

去集集隧道，上坡路，好難踩，之後有落坡，去綠色隧道，但踩了一會都未有牌寫住到左未，我估到左掛，兩旁都係樹，綠樹林蔭應該係啦。唔想再踩，因為有咁耐風流有咁耐折墮，而家下坡即係回程上坡。為左唔想踩太長的上坡路，於是再踩一陣就回程。咁既腳力如何環島呢。唉。

回到市中心，見到有肉圓檔，想起某友人曾說肉圓好好味，我就試一試。幾特別，估唔到係咁既樣，味道不至叫人難忘但係幾好食。邊食邊看火車時刻表才發現下班車就到，如果錯過要等成粒鐘。趕快食完衝去交車走人，搞到辣親嘴。

成功趕到車，去水里，行菜市場，似香港，室內似香港市政大廈的街市，室外似北角街市，有賣衫有賣菜 。室內有很多空置的檔口。繼上次台中見到豆腐檔賣蜆後又一新發現：魚檔賣鵪鶉蛋。行行下離遠見到豬肉枱上有隻牲口，大驚，台灣都興成隻豬原隻擺上枱？行近先發現原來係隻大狗爬左上豬肉枱訓緊覺。

睇下條河。河邊有人full gear釣魚，香港既河邊釣魚人士大部分都係街坊裝。

火車車長會叫人讓座。其實唔明點解要車長行黎行去問人要唔要補票，乘客落車後搵站職員補唔係方便d?

話說其實如果去集集線濁水，水里呢d非熱門車站，可以輕鬆逃票，冇人查，不過我有買票，哈。在台灣不好意思逃票。

聽說車埕也很值得去, 有機會再去吧.

是日喝了很多飲料，在香港都不怎麼愛喝貢茶之類的東西，覺得飲半杯已經好濟，可是來到台灣就老是很想喝，拚命喝，喝很多都不覺濟。旅行特別需要拎住杯野邊行邊飲，對我這種不找到合眼緣的店就不吃飯的人來說是續命妙方。台灣飲料又便宜，即使肆無忌憚的喝也花不了多少錢，之前在韓國真係唔敢咁放肆。另外台灣飲料選擇也超多，冬瓜茶，冬瓜綠茶，冬瓜紅茶，冬瓜青茶...喝進口裡我覺得都沒大分別。

白痴，張相竟然影到手指而不自知。

用宏偉來形容自己還真不謙虛。

Day 15 歸隱田園的農場精靈 11

早上搬（實情是抱著拖走，因為對我來說有點重）一綑綑的乾草，它們本來放的地方都長了很茂盛的牽牛花（又係牽牛花）, 乾草被牽牛花的藤纏著，根本不能從地上拉起，很不好搬，所以要扯爛花藤再搬乾草。這過程導致我一身泥，兼且親嘗劉明一身蟻的滋味。因為乾草下有蟻群，你忽然將乾草一把扯起的話蟻們會沿著你的勞工手套一直爬到你上臂，d 蟻feel到唔對路就會咬人，感覺好似有人拎支針係你表皮輕輕吉下吉下，雖然不痛，但絕對feel到有野整緊你。

將乾草鋪在茶苗旁，以避免太陽直射泥土，保持濕潤。

搬完乾草就像昨天一樣搬咖啡苗，真係好重。今次冇倒瀉。

然後是拆圍著木瓜樹的網和除去纏著木瓜樹的爛藤植物。暴力中唔小心整斷左木瓜樹兩三條分枝。

然後是除草，將咖啡樹旁的雜草拔掉。一個早上竟然做咁多樣野，我心諗，究竟幾時先十二點（收隊時間）。

下午收集熟到跌左落黎既百香果，然後把它們擦亮（看起來漂亮點吸引人買）。

回去工場後就揀茶枝，之前說過，就是將混在茶葉裡的小樹枝挑出來。d 食物經過幾多人對手，幾多工夫先至擺到入你個口呀，再次跪求各位珍惜食物。

阿伯說我態度很好很認真
哈哈哈
可是他竟然覺得我食飯慢。明明係佢地太快，幾分鐘就食完較腳，我食三個字已經係佢地三倍時間。

一直都覺得很奇怪為何阿嬤每次都在大家吃完飯後才來吃，今天終於知道台灣女人以前要待家裡的男人都吃完才去吃剩下的，現在男女比較平等就沒有這習慣，但老一輩的女人有些仍然默默執行著。

下完田坐車回去，車廂那股夾雜青草味的汗味，是我聞過最令人愉快且不嘔心的汗味。

明天阿伯沒空，休耕一天，放我在集集玩。

Day 14 歸隱田園的農場精靈10

早上去茶園拔茶苗上的花蕾，因為茶苗就死個陣會想開花散播多d種子置諸死地而後生，為左唔好畀佢開完花就死，所以拔晒佢d花蕾等佢冇得開花。

牽牛花呢d爛藤植物，成日kiu住晒d茶苗，用左好多時間慢慢解開佢，呢個時候真係好怨恨個d生命力強既植物，如果呢塊田係種牽牛花一定會好成功。

應該不用再翻土了，因為我和台妹本來就挖得慢，而家得返我一個，應該都挖唔到幾多sosad。

下午繼續拔花蕾，以為爭少少好快拔完，點知拔左個半鐘，頂，已經無間斷咁拔都仲係個半鐘。如果出摩打手應該會快少少但維持唔到好耐所以其實都應該係冇用，都係要有好腰好腳先得，但目前我冇，呢幾日之內都應該唔會有，唉。

之後將咖啡樹的幼苗移落大d既兜。移左幾棵阿伯嫌我慢唔駛我移，佢自己黎。嗚。一要大陸蹲我戰鬥力又大跌，唉。我負責搬移植好的苗，一次搬兩個，比想像中重，有次不小心拿不穩跌了，泥土四散，立馬蹲下徒手執泥企圖扮冇事，耐何泥已散根本拾不到，徒勞無功只好拿著那兩個冇晒泥的咖啡苗回去說不小心打翻了。真是每天都幫倒忙。

然後提著載滿水的水桶去澆水，又是他媽的重。認真地思索如果我去working holiday 仲應唔應該搵農場工，虧人如我根本做不來，我可以讓自己更認真但氣力這東西並不是我集中精神就會蹦出來的，沒氣力我想勤快點也有心無力。這事實真令人沮喪。

晚上去附近夜市，吃雞屁股，喝很久沒喝的杯裝飲料，還有看小孩打機。好像只有小夜市才會比較多射公仔，拋鐵環，撈金魚，街機這類東西，我只在福科和名間鄉這兩處的小夜市見過，挺不錯，很熱鬧。細路都可以打呢d十六歲先可以入機鏟舖打既機，正（雖然我都係細細個就係樓下茶樓打機房玩過），就是300 in 1那種很舊的街機，倒如kof,sf, 吞食天地，洛克人。見有個細路打機打到唔忿氣係度鳩叫，佢用台語鬧左一大段，唔知佢講乜。

這兒還有很多賣衣服的攤檔，還有賣比薩，壽司，菱角的檔，挺特別，竟然賣菱角呢。今晚又試奇怪組合飲料：西瓜牛奶，就是西瓜汁加了少許奶的感覺。我去旅行經常周圍試食奇怪野，當年去台灣，冬瓜茶係香港仲未興，我當時第一次係士林見到覺得佢係奇怪組合系列，點知一試即愛上。今次則有雞屁股，味道不錯，香港極少人食雞會食埋屁股，台灣人就拎呢樣廚餘黎燒到香口，咁又有人食，又搵到錢。

見到阿伯養的狗，離遠見到個飯兜已經頭搖又尾擺，對眼楚楚可憐咁望住主人，仲要睇主人面色，等一聲令下先食得。日日都係咁，唔知隻狗對自己咁樣既生活有乜睇法。

在田裡拍死了好大一隻蚊。
我都明大家都係搵食，只要佢唔好係我視線範圍揚黎揚去同埋係我耳邊wunwun聲，我由佢咬。 但我出晒warning letter 畀佢，又畀佢咬左三下，佢都仲唔見好就收，係我眼前飛左飛右，咁我唯有出手。千萬不要因為人家給你一點甜頭便放肆，否則你的下場只有死。

究竟要有幾深厚既功力先可以shock爛一隻g shock

Day 13 歸園田居的農場精靈9

一眼就被看穿是不做家務的人，我看起來果然是很笨。可是我明明也挺有煎蛋的經驗，但被人問你是不是從來沒拿過鑊鏟，真係咪話唔沮喪，我咪又係咁煎隻蛋，只係唔知人地屋企慣用咁多油姐，捉到老鼠咪係好貓囉。

加上我的普通話一整個就是糟糕，經常聽唔清人地叫我做乜。今天去百香果園收果實，阿姨指著某處叫我去收那兩行，因為果園有好多行，在我角度看她是在指另一行所以我就去收啦，後來阿姨說我都沒收到時我才知道原來我收左隔離行。噢我收了旁邊那行，我說，但阿姨唔知有冇聽到，自顧自地在說，呀這地上還有，這裡還未收。

啊，她該不會以為我是因為收得求其所以收完好似冇收咁吧，嗚呀。

然後第二次她指住某處叫我收，我也指向那處確認道：是那邊那行啊？阿姨還說是。結果我又係收左隔離行， 嗚啊。

這情況就像玩mc killer, 你明明指住要殺阿明，但mc角度睇就見到你指住阿明隔離既阿強，結果阿強就死左喇。

第三次我問完再問終於去到正確地方收，不過這應該看起來很蠢吧，同一樣野錯完兩次仲要問多兩次先做到。嗚啊。

要努力睇起黎機靈d。

收完果就坐左係個好撚多蚊既地方擦果實，要擦亮些看起來美觀點，一粒果由種子到出現係街市畀人賣，真係好多工序。

蚊聲真係好煩，而且明明我已經係長袖衫褲，但蚊都照咬到。

之後返去挖百香果肉，覺得自己快左。

講返上午，係洗bb墊同挖百香果肉。

今日冇挖土。

仲有六日咋。

Day 12 歸隱田園的農場精靈8

早上還是強耕，沒昨天那麼累。

下午送走台妹，我完左打工換宿之後去台北應該會搵佢一齊玩，係佢主動邀請我，哈。

送完台妹繼續坐阿伯車周圍兜，先去車房換機油，再去零件舖買野。呢度家家戶戶都會貼副對聯係門口。
返去睇阿伯檢查蜂箱和維修唔知乜機。冇野做的下午。

獨守吉房的晚上。好眼訓，聽日再打，晚安。

Day 11 歸隱田園的農場精靈 7

今日耕左一陣已經好累，可能天氣熱，土又黏又濕又重，戰力下降速度同手機電池睇齊。

邊耕邊同台妹吹水，時間快過d，但佢聽日就走，之後就得我自己耕。

阿伯望著自己的田很感慨地說，這裡早晚都是他們的，所以更加不可以下農藥，不可以把一塊爛田留給子孫。
可是我看好像沒有繼承人...唔知第日呢大片田地會點。

下午下雨，非常高興，唔駛耕，哈哈。但係如果聽日要耕就慘，落完雨泥土又黏又濕又重又實，更耕難了。

晚飯後幫忙將百香果袋好一袋袋，望住成堆等住拎去賣既百香果，有修成正果的感覺。

阿伯不喜歡馬英九，說他當台北市長時只做過兩件事，一是改建了唔知乜，我聽不清楚，總之個度本來好旺好似夜市咁，畀佢搞完就拍晒烏蠅。二是建了貓空纜車，都沒人去，快倒閉的樣子。

他喜歡陳水扁，覺得搞成而家咁都是陳的老婆害的，他說很多人都這麼想。

Day 10 歸園田居的農場精靈 6

繼續去茶園翻土。趁阿伯行開左，偷雞搬左舊石黎坐住耕。其實真係踎低易發力d，但腳痛同時都會減低我戰力，所以我都係覺得坐住耕好d，哈。不過對腰都不太好，所以坐耕一陣就算。今日好似又快左少少。下午落雨所以耕左個半鐘就返去揀茶枝。

原來台灣人廁紙唔丟落馬桶。

每日都會經過見到幾台停在路邊的車，車頂有個牌寫著 ：
住
口

我覺得很奇怪這是在叫誰住口是附近的民居太吵嗎，還是說住口其實是地方名呢。
直到第四天我望著那幾台車忽然想通了，那是
售

不是
住
口

晚飯後跟台妹散步走到附近的受天宮，很大的廟。門口還有布袋戲，第一次睇live，但聽唔明佢講乜好像是台語。冇觀眾，其實係做畀邊個睇呢

受天宮那邊風景不錯，望到遠方微弱的燈光。

唔知係咪因為之前土地誕，沿路都掛了紅燈籠，燈籠寫著:
國泰民安 風調雨順

對農戶來說風調雨順應該是構成國泰民安的重要因素吧，農作物都很脆弱。雜草除外，那些被歌頌生命力頑強的草，真係春風吹又生，拔極都有。

看了一個學術性很高的節目，講李白。原來佢同王維係情敵，兩個都鍾意公主，但公主鍾意李白，佢地係姊弟戀。後來李白被流放，李白返到黎發現公主已經出左家，就成日去佢出家個座山，佢好多作品都有提及個座山。李白同公主同年先後仙遊，真淒美。李白之死，一說為醉死，二說為坐船飲醉酒想伸手撈月時跌落水淹死。

Day 9 歸隱田園的農場精靈5

話咁快已經打工換宿第五日

今日冇落雨，又去茶園翻土。上午四個鐘，下午兩個半鐘（挖挖下落雨所以早左收手）。

真係唔係你諗到咁易拎個鏟仔挖挖下就得，呢度既泥好實，要用小耙（槌仔咁大）一下一下鑿落去，識借力就梗係又快又慳力，不過我都仲摸索緊，已經好過第一次嫁喇，但都仲係好很慢，踎住係度幾個鐘腳痛呀嘛，搞到我戰鬥力大跌。始終大陸踎對我黎講都仲係挑戰，你地成日鄙視個d踎係度既大陸人，人地不知幾好武功，踎低都係一項技能唔係本能。都係個句，我已經好過前日，但都仲係未踎到好耐。

哇大髀而家陰d陰d痛，一發力提腿就身都側晒。仲有冇諗到連條腰都出事，彎腰彎得耐個陣痛感會突然滲透直達患處，我而家想為五斗米折腰都要諗過。

食完晚餐幫忙包裝百香果，批貨聽日會賣。兩斤先至賣到twd100，有機都咁平，直情同農藥貨睇齊。阿伯話冇計，賣得貴又冇人要，有機貨賣相又冇農藥貨咁靚，始終唔落農藥係會多點菌，搞到d果皮外表一撻撻，但係唔代表壞，都冇影響到果肉。但d人揀生果梗係鍾意揀樣靚既，有機又貴又唔靚仔又唔係潮流興，生意難做。

有機耕作真係難過經濟耕作好多，如果你隔離塊地係落農藥咁你就好大機會拎唔到有機牌，因為一定有農藥會污染到你個邊。而且經濟耕作落一落農藥，乜都搞掂，d 植物生得又靚又快，有機就要搞好多野先做到同樣效果，可想而知化學野食落肚幾恐怖。阿伯堅持唔用農藥，因為一落農藥塊地就會壞，始終地對農戶好重要，簡直係佢地命根，佢地好會愛護塊地，但當然都有人賺錢至上所以落好多農藥。之前阿伯試過租田畀人種，結果條友搞壞左塊地，阿伯好嬲，從此唔再租畀人，寧願空置都仲可以養地，地一壞左想再養返好就非常難。畀人搞壞既就係我去挖個塊種茶既田，d 茶苗種左成年都仲係細細棵。 阿伯話養過好多次都養唔大，就係因為塊地唔夠好。

阿伯有十公頃地（好似係），有些地還在荒廢中，因為得佢一個搞唔到咁多，當養下地畀塊地休息下。有種百香果，茶，木瓜，咖啡，肉桂，柑桔，檸檬，茄子等，太多，忘了。

Day 8 歸隱田園的農場精靈4

颱風天兔來襲，很猛的颱風，東部和南部重災區，但這裡只是天陰陰，下了少許雨。

鋤禾日當午暫停一天。我承認我有因不用下田而暗喜，畢竟真的耕苦艱苦。

但唔代表冇野做。

早上挖百香果肉，下午揀茶枝。盡量令自己快左，唔知旁人睇覺唔覺。

成日都唔知做乜同唔知講乜好，看起來像笨蛋，工作又慢，真的很笨蛋。只有吃飯比較快。

Day 7 歸隱田園的農場精靈3

下田去，今次是茶園。用小泥耙翻土，泥很實，耙有重量，耙土要花點氣力，阿伯示範係唔駛點用力，但我就是借不到力耙不到好角度，所以費力了。中指起了水泡。

翻土要一直蹲著，對我這踎低起身見頭暈的人也是極大挑戰，每蹲一會就要企一企起身，架已丟，或者就快不行鳥。

早上耙了三個幾鐘才做好一行（約五十棵茶苗），下午兩小時大半行，這速度超慢，有人一個下午已經可以做晒成塊田，我要有自己是廢柴的覺悟，明天要努力。

做了一天，手不太痠，就是腳很不行，大陸人一天到晚蹲著也是種技能而非本能啊。很想要殺龍巴斯。

飄洋過海來鋤禾日當午。
跪求各位千萬要珍惜食物，開飯祈禱除了感謝上帝也要多謝農夫。
建議打算去農場打工的人來之前先練好大陸蹲，如能連蹲四小時以上則更佳。
還有十二天大陸蹲實地訓練，繼續努力汗滴禾下土。

晚上行夜市。呢度咁鄉下都有夜市，台灣人果然很喜歡夜市，無處不在。在夜市撈金魚，第一次玩，撈到一條，我是天才。因為驕兵必敗，所以之後好成功咁好快整爛晒其他紙網。

第一次吃米血糕，冇乜味，黏黏的糕一塊。

Day 6 歸隱田園的農場精靈2

六點便要起床。

這裡有種茶葉所以阿伯對茶葉也很有研究，晨早沖靚茶

今朝做左百果園e神， 係百香果園執爛果同摘枯葉好似係因為看不到蜘蛛網所以整張臉撞上去是常有的事，伸手去摘樹葉時偶爾會摸著蝸牛，被蚊叮是常識，可是手太髒又不想往臉上抓癢，有些枯果枯葉一撿起感覺黏黏濕濕的應該是昆蟲體液然後哇靠一堆蟻從葉底裸奔出來。
講咁耐其實都係昆蟲（蜘蛛除外）問題，不過預左做農場精靈係咁。

摘枯葉摘左成四個鐘先完成一行，好似冇盡頭咁。

下午因為阿伯要外出，就畀輕鬆野我地做：揀茶枝，即係將茶葉裡的小樹枝揀返出黎。揀到好眼訓。尋日同今日出面都不停放煙花，仲有人唱歌，好似係慶祝土地誕。

食完晚飯，hea 下，又一日。

Day 5 歸園田居的農場精靈1

今天出發去南投一個有機農場打工換宿，就是去幫忙幹活，沒有錢但包食住。打工換宿比working holiday 方便多了，因為沒薪金，持旅遊簽證就行，即使過了三十歲還是可以來，而且換宿日期由幾天到三個月都可以，對打工仔來說也很方便。

下午順利抵達農場，阿伯（就是農場主人）很健談。另有一個也是今天才來換宿的台北女生，佢同我一樣冇乜野講，哈。

是日工作為將百香果肉用匙羹挖出來。d果挖極都仲有成籮。

阿伯直認做農場賺錢不多，但他就是喜歡，自由自在，不用上班。見到親手種的植物長得好，會很有滿足感。

順帶一提，新烏日火車站（台中高鐵站隔離）都有紙箱王，經過的話可以順道看看就不用特地去。

Day 4 台中：台中都會公園 大肚山 福科夜市

其實我有完美行山路線：新烏日開始，學田山，王田山，大肚山，竹坑山。但本人再次懶洋洋遲遲不起床，結果改為只去大肚山，就在住處走上坡就是。一直沿著馬路走，所以不太算行山，走了個幾鐘終於到台中都會公園。

公園好大，幾乎冇人，驚喜地有觀星台，是畫滿星座的半球體，這裡晚上應是觀星好地方，但設計有點古怪，到處都是或豎立或倒下的大石塊，感覺像圓明園廢墟。

有班家長帶小孩來玩水，很歡樂。

走過公園繼續上斜，根據谷歌地圖再往上走一下就是大肚山頂。不停行左近三個鐘，前面都唔似有山頂，其實呢刻我已放棄左上最高點，只係想搵個似觀景台既野，眺望完遠景就打道回府，可是找不到。沿途都有d位視野都過得去，算收貨吧，反正整個地區包括都會公園都是大肚山範圍，算去左啦。

成朝冇食野，又餓又累之下我竟然捨得係都會公園twd260食個雞腿飯，不過又有湯有生果有甜品有野飲，算係咁啦。

回程想睇下公園入面有冇視野良好既地方, 但兜左好耐都係冇。都幾多人跑同踩單車上斜，原來呢邊都唔係咁人跡罕至，只係我今朝太早。

五點半回到旅館，好早。諗下今晚個餐點解決.
靜宜夜市今日唔開，逢甲又已經去左兩晚，一中聽講完全不及逢甲。定係去附近求其食。雖然唔多想去太遠但最後打算遠征一中，未去過。一下樓就見到旅館老闆，他就用機車車我去附近的福科夜市了，正，車埋我去，又近又未去過，行去又遠，等車又耐。

第一次坐機車，好爽，我認真考慮考個機車牌，working holiday 揸，或者環台，爽歪歪。想好似等一個人咖啡的李思螢咁型，哈。

同老闆和老闆朋友個仔（一歲半）行夜市，福科夜市好平，唔錯，是平民夜市. 老闆推介雞屁股串燒，幾滑，好似雞髀肉。買回去吃。

有新來的住客，德國人，學左一年中文，識講國語，講得好過我sosad。

明天要check out 了。

Day 3 台中：紙箱王 高美濕地 逢甲

下午才有車去高美濕地，所以早上懶洋洋。

旅館對面就是紙箱王，幾得意，比想像中大，有露天庭園，裝飾品都是紙造，即係不會被雨淋壞啦，厲害。

牛肉麵檔的老伯愛書法，店裡牆上都是他墨寶，臥虎藏龍。阿姨很好人，叫我路上小心。

乘車到了清水站，以為要去火車站那邊轉公車，原來是去公車總站才對，害我走了很遠路。但感到清水人很熱心助人，我只是問路冇幫襯，但人人都笑著回答。

搵完一輪當然錯過了三點四的車，搭四點四那班, 遇到香港男。一睇就知係香港人：print 晒資料，穿havaianas拖鞋。

諗住落車後就同佢講, 如果唔想一齊行可隨時出聲唔駛怕醜，點知落車佢第一句係拜拜。

高美濕地是好地方，有風車，可以行落濕地，唔吉腳，泥也幼滑，不黏腳。男女老幼落水浸下腳行下玩下影下相，開心的地方。喜歡順著風向流動的水，感覺時間在推移，好大風好似fast forward 。

無聊就開始自拍，拍拍下見返香港男。又繼續自拍，拍拍下見到同旅館的馬來西亞男和香港女結伴同來，他們包了的士，每人一千（去了彩虹眷村（山長水遠去到勁快睇完，十五分鐘）,鹿港，高美濕地，一中）。

等車走又遇香港男，一起坐車吹水。佢話台南鹽田冇乜好睇。原來紙箱王係一個景點，佢特登坐車去睇，點知得咁細（同我相反，我見係旅館對面便去看一看，沒期望反而有驚喜，但又未至於要特登去睇既地步，唔影相五分鐘睇完，哈）好似話台中的士起標一百蚊。

搭車時見到靜宜大學旁有極大型的夜市，像香港花市般，有機會去看看。

又去逢甲，真係好大，野食多商店多，我喜歡這裡，但究竟呢度的學生係點樣可以讀到書？

回旅館跟馬來西亞男聊天。佢識五種語言，福建話都識。馬來西亞人平日溝通係全部話撈埋黎講，有點像香港中英夾雜。有d term已經撈到佢都唔知係屬於邊種話。fresh grad 人工約港幣六千，兩層排房港幣二百五十萬。佢地中文課本都簡體字，有些報紙繁體，所以不讀報未必會識繁體。馬來西亞都用hea呢個term。台灣人不喜歡馬英九，馬來西亞人不喜歡現任政府。馬來西亞家長“驚輸“（一個term來的），就是跟香港家長一樣，怕孩子輸在起跑線，坊間很多補習社，又有甚麼記憶法班，跟香港很像，他說新加坡家長催谷得更勁。他也有看tvb，又聽側田，張學友，古巨基。他說馬來西亞冇乜戲。有個馬來西亞演員叫黎明，阿婆來的。

趁記得寫低先，台中公車首八公里免費，好抵搭，坐成半個鐘都仲係免費。不過下下都成半個鐘先一班車。

Day 2 台中：二十號倉庫, 潭雅神綠園道，第三市場，逢甲夜市

今日本來第一個check point 是去旅館主人推介的店吃早餐，走了廿分鐘左右到了，但沒吃。其實我很怪，一個人時會將可食用（？！）店鋪範圍收到很窄，多人的不吃，貴的不吃，沒標價不吃（當然也會有例外）。明明整個早上沒東西下肚但就是不吃，我實在不是一個人旅行的料，準會餓死。幸好我早知自己會犯賤，有把昨天買的薯片帶出來，就邊走邊吃當早餐算了。

其實旅館附近有公車站，但跟早餐店是相反方向，我不願走回頭路，便繼續向前走，反正順著公車方向走，我總有一天會到下個站。可是少年如我實在太年輕，一直走了半小時，不要說公車站，公車都沒一架。後來我轉到另一街口終於有站，可是班次竟要半小時一發，生於香港交通太便利縱到我壞晒。唉，真的不太喜歡台中的公車，另文詳述吧。

坐了一小時終於到台中火車站，其實還未決定今天要去哪。隨便亂走，參觀二十號倉庫，用舊倉庫做藝術館的主意不錯，最重要是它地理位置極優越，就在台中火車站後，人們候車等人閒著沒事可以順道進去轉個圈，應該可以推廣到藝術。

很走運地我要的公車與我同步進站，非常好，一小時車程後順利到達潭雅神綠園道。

本來是打算去東豐綠色走廊的，可是旅館老闆說那很遠，介紹我去這個潭雅神（雖然我用家報告都係覺得遠）。

綠道全長十二公里，我慢慢踩來回才兩小時。此道賣點為由舊鐵道改造而成，但我覺得只是尾段有條路軌在旁，不如想像般特別，倒是沿路兩旁無邊無際的田地更吸引，還有對父子站在及膝長草裡放風箏，對我來說是電影才有的情節。

這綠道配套不錯，沿路很多廁所涼亭長凳，還有個小市集，很多小販賣食物飲料，很熱鬧。香港的單車徑頂多只有單車伯伯賣菠蘿冰，廁所在大圍沙田段都好罕見。

可是這不錯的單車徑卻人跡不多，星期日都咁少人。可能因為台灣人平時係街都踩夠，唔駛特登入黎老遠踩單車徑？

租車可以搵逍遙（店名），好好人，叫我要幾點返黎搭邊班車，還送到我去公車站。

近起點還有三個老伯表演saxophone，官方活動。真好。

回台中去了第三市場，據說去旅行要去看當地人的街市，因為可看到人民生活。第三市場都幾細，賣豆腐的店竟然也賣蜆，乾貨店有認真看鋪sell客的細路 ，檔販都很友善，我只係行過佢地都問我想買乜。

可能我太晏去，冇乜人。

其實想去第五市場，劉克襄介紹過，但結果冇去，仲有烏日火車站，都係冇去，懶。

回到台中火車站，不太喜歡這裡，人太多車太多, 很亂.

坐一小時車到逢甲夜市，又一小時，程程車都成粒鐘。

呢兩日好多人為睇五月天來台中

逢甲夜市好大，野食種類好多，在這裡讀書的學生們肯定專心唔到. 我總覺得逢甲大學特別多學生騎機車，不論男女。想起等一個人咖啡的李思螢，女生騎機車真有型，或許我也考慮考個牌旅行時騎騎看。很膚淺的原因。

Day 1 台中：東海大學，東海夜市

本想在機上睡覺，點知一個鐘就極速到達，都未訓醒。

順利抵達旅館，交誼廳同傳說中一樣美，廚房設備好齊全，可煮食，浴室都令人樂而忘返，沖得耐過係屋企沖，仲可以免費用洗衣機，不過我貪快，求其用手洗下就算。旅館老闆很詳細地講解附近設施景點和交通，很好，雖然我只記得部分。

同房是一個中年洋女，professor feel, 我今日見過佢做既活動只有上網，佢張床仲有京都大學notes。其實一向不擅長亦沒大興趣搭訕，沈默的roommate正好讓我樂得清靜。

五點左右出發行去東海大學，本來與一個香港女子同行，不過未到東海已經同佢分道揚鑣，她趕著去看五月天演唱會。

走了半小時左右到東海，校園內有牧場，有鹿又有乳牛, 好像是用來做研究。其實香港的大學都可以試下，我小學以前都有孔雀同兔，其實佔地不用太廣，不過浸味就大d，有心搞應該有方法搞掂既。東海不止養，還用那些乳牛的奶造乳製品，雪條，乳酪之類，又能賺錢又善用資源。還有個化肥區，看來這大學挺支持環境保護。

圖書館看起來氣氛像安靜的cafe，用橙色燈，白色書架頂到天花板像pageone，很多沙發，跟香港一樣有睡覺的人。

看了貝聿銘設計的教堂，看起來像帳幕。

東海很大，加上不停走錯路，逗留了很久，一直走到東海夜市。野食冇想像中咁多選擇，都是鹽酥雞，飲料，便當比較多。

在超市買了蚵仔煎味薯片，味道不錯但像醬油味。

Day 0 出發前

新旅程快要來了. 雖然不是第一次獨自出遊, 但仍難免有點上心下心不安. 畢竟賦閒在家的這些天太安逸了, 每天醒來都對床有點難離難捨.

決定去旅行, 一般最大的障礙一是錢二是家人. 錢方面只要加把勁還是有可能會儲到, 可是家人實在是讓我最頭痛的部分. 本來我是沒這煩惱的, 可是很不巧地我不怎麼有錢, 就很不巧地想到要投靠住紐約的舅父借住一下, 就很不巧地舅父原來比我想像中不開明. 

一向都只是輕描淡寫地對家母簡單說一下行程, 事實上她應該不太知道我要去的是怎樣的地方. 因為她不清楚, 所以也沒怎麼說過我. 偏偏舅父尋根究柢地問家母我會去哪, 然後說那些地方很危險, 怎麼會讓我去, 又說為何作為母親都對女兒的行程不清不楚...

結果家母就成了驚弓之鳥, 憂心忡忡, 還觸發起她對我最近夜歸的強烈不滿. 她甚至認為旺角黑夜都絕對是極危險.

我就是知道自己誓在必行. 但又沒可能因為我三言兩語便讓她釋懷, 那又何需讓她徒添憂慮. 只要知道地方名就好, 其他資訊最好都不知道. 我之所以要將行程輕描淡寫, 就是不想發展至這地步. 真是中晒大伏, 早知我花點錢, 在紐約另外找住處好了.

在家長的角度而言, 我絕對是任性. 可是我不想這輩子都被四面牆圍住, 只去那些所謂比較安全的日本台灣嗎, 我不願意. 

行動與家人意見有抵觸, 對此我很抱歉. 可是事情未必就只有錯與對, 誰也沒錯. 難道就只能讓父母為我決定一切嗎, 大家都是成年人, 其實不用老是由別人為自己下決定. 

對不起，這次旅行我去定了，不要太擔心.

為了_____, 大家都去得很盡. 就讓我的______去得更盡, 好使父母能為_____繼續去盡.

祝我旅途愉快, 平安歸來，也希望家人不要過慮

聽說XANGA籌旗成功, 網站繼續運作. 可是今天忽然發現上不到自己XANGA了.
原來那個寫了九年的地方, 不知何時已離開我了.

後來聽說只是搬SERVER而已. 真好. 人生又有了盼望.