歲晚, 繼續節外生枝。

還欠最後一日柬埔寨未寫。

最近終於開始學電單車, 上了兩堂, 第一堂覺得好難, 架車又重, 我成日停車企唔穩跌腳, 第二堂卻好多了, 因為原來我之前冇踩腳break, 搞到剎車好chok。

(真臘風土記) day 6 金邊

今日冇乜非做不可既事, hea 到十一點幾十二點先出門。

話說尋日tuktuk司機問我今日會去邊, 佢想我今日都包佢車. 但我尋日已經覺得貴, 加上我想自己行下, 所以拒絕, 我仲話自己第二日會有朋友黎搵我所以唔駛tuktuk. 雖然我咁講完佢都應該唔信, 因為佢繼續游說我包車.
然後今日一步出旅館就見到佢係門口, 佢仲笑騎騎咁問我 "你個friend呢?"
嗚啊, 完全感受到佢個股恥笑味. 媽, 好柒啊!

皇宮冇開門, 應該係因為假期, 送水節連放三日。

皇宮隔離就係博物館, 有開, 但入場費五蚊, 覺得貴, 冇入去。加價加得咁快, 早兩年旅遊書寫兩三蚊咋嘛。

行去中央市場, 途中好受tuktuk司機歡迎, 沿路不停揮手問我要唔要坐tuktuk, 通常笑住話no佢地就微笑住咁收聲, 唔會糾纏。就黎行到中央市場時,又有司機向我招手。
司機: tuktuk?
我: no~
司機: no? Where are u going?
我: (指住前面中央市場的方向) there!
司機: ha? There?
佢個表情話畀我知佢覺得我係一樣好新奇既生物。

又去中央市場, 又平又好味, 鑊氣即炒貴刁, 好足料仲有隻煎蛋, 蔗汁都好味, 燒魷魚都想食但要三蚊。

炒緊貴刁

好香好大的魷魚, 但要USD3

中央市場隔離就係六層高大型商場sorya shopping centre, 講係咁講其實也不大, 香港人見慣大商場。商場有超市, 仲有好多間炸雞店, 我在暹粒吃的lucky 炸雞也有。

商場電梯口經常擠了一堆人, 第一次見時以為有甚麼意外例如電梯壞了, 走近才發現d人係唔敢企上電梯, 他們好不容易壯了膽子跳上去, 安全著陸後還會跟朋友笑作一團, 似乎沒甚麼用電梯的經驗。我在暹粒都遇過這情況。我本來沒想到柬埔寨人會覺得電梯是新鮮事物, 後來想想也明白, 金邊作為首都, 暹粒作為旅遊重鎮, 商場和高層建築也這麽少, 民眾接觸電梯的機會的確不多。

angry bird丸, 孤陋寡聞, 第一次見

成個貨架冇一樣野係made in cambodia

行去郵局, 寄明信片郵費不貴, 比旅館的報價便宜一半, 旅館還說他們的收費跟郵局一樣, 騙人。

郵局附近有kfc, 本來諗住寄完明信片去睇下有乜香港kfc冇既特色雞, 仲可以涼下冷氣 (因為柬埔寨冇乜餐廳會開冷氣), 可是行過龍費事行返轉頭, 冇去到。

河邊同尋日一樣好多人野餐, 好多車仔檔。

炸蟑螂

忽然有堆氣球飛晒上天

買豆奶, 有個路過既阿姐見我同小販溝通唔到, 主動用普通話同我講野, 幫我翻譯, 真好, 遇到好人。

返旅館休息一陣, 上網睇下仲有乜想做想食。

又再去河邊, 找到想吃的包子, 又買了盒炒麵(因為多本地人買)。多本地人幫襯真係好味d。

金邊連續兩晚都落左場好大既雨, 雖然一陣就停雨, 但我發現d人係唔帶遮。落雨都係得我開遮。

河邊有幾個流動廁所, 不過見到個樣已經唔想去, 排隊的人都掩著鼻很痛苦的樣子, 所以我都無謂行近。觀察左一陣見排好耐(即係臭好耐)先有得去, 真慘。

我問賣包老伯可否影他的包, 他馬上將包子疊到靚一靚畀我影. 好友善.

(真臘風土記) Day 5 金邊

早兩天金邊去暹粒，在巴士上也睡得很好，但這次倒過來暹粒回金邊，路不知怎地比去程顛簸許多，夜裡我幾次被晃到醒過來，不過精神還是充沛。

再一次，很準時地，六個半鐘就到站。其實旅館離車站不遠，就25分鐘左右的腳程，但想起昨天旅館老闆和洋女的被搶包經歷，還是淆底，覺得揹著大包在路上走太招搖，還是選搭tuktuk。司機叫價六美元，太貴，還到五元，其實我還是覺得貴，但又想起友人說可以隨便給你便宜價錢的Tuktuk有可能會跟其他摩托車約好在乘坐中途來搶包。於是我又淆底了，五元好了。

到了旅館，時間還早著，六點幾。反正時間充裕，等到九點check in，洗過澡涼個冷氣再出去。

坐tuktuk去殺人場, 門票已經漲到六美元了。

那個放著大量頭骨的塔沒想像中恐怖, 反而有點安詳, 可能因為日光日白, 個塔又新。

戴著講解機繞一圈, 看看樹, 草地, 水池, 逝者遺物, 全場遊客都好靜。我腦裡最有畫面的是揪住細路頭髮fing佢撞樹。

坐車途中唔小心訓左, 好彩冇人搶我袋。

S21監獄博物館, 可能因為室內關係, 我覺得好陰森, 好多間房仲貼滿遺照, 他們長相也很像, 看得心裡發毛。這裡本是學校, 操場那個做引體上升的架, 成了絞刑場, 人類很恐怖。這裡也有到堆頭骨, 還有一個上香紀念先人的金房間。

中央市場, 好多乾貨賣, 電子用品, 衫, 珠寶手表都多, 反而手信只有少量。我最感興趣自是濕貨街市和熟食區那邊。題外話, 話說我發現柬埔寨人好識歎, 好鍾意到處掛吊床睡覺, 路邊攤檔主, 街市檔主都鍾意係自己檔掛個吊床邊睡覺邊看檔, 好寫意。連街市好窄既檔口都會唔知點樣搵到個位訓覺。

熟食區好多野食, 又不貴, 好多野想食, 吃牛丸河還送一杯冰涼的茶, 然後又吃了用粉皮包著的春卷, 裡頭有菜和叉燒, 再吃了蛋皮包芽菜雞肉。吃蛋皮時鄰座阿叔跟我聊天, 他是公務員, 去過很多地方, 想去香港。佢仲幫我畀左蛋皮和熱情果汁的錢, 好好客。

要撈勻黎食

這個放在地上, 或許是供奉用?

最初同tuktuk司機傾價時, 我本來只打算去殺人場和監獄博物館兩個地方, 但去埋中央市場的話司機開價都一樣, 於是就去了這三處然後回旅館, 其他地方我想自己行去。

廣告無處不在

可是由於送水節封路關係, 司機在一個不知名路口放低左我, 行返旅館途中見到廣場好多攤檔, 又有試食, 像嘉年華會, 當地人一家大細咁黎, 好熱鬧, 不過冇乜野岩我買, 而且太熱, 行左一陣返旅館避暑。

兩個鐘後我又彈返落街。沿河邊走, 那段路變了行人專用區, 滿街都是人, 河邊好多人野餐。

求其搵左間餐廳坐低hea, 食左類似咖喱飯既野, 味道普通。次次去親餐廳野食都冇乜水準, 餘下日子都係街邊食算。

Hea夠, 走路回旅館, 河上忽然放煙花, 放左好耐, 半個鐘都有, 真走運, 遇上送水節。

成功曬黑, 好滿意

(真臘風土記) day 4 暹粒

尋日兩樣野唔記得講, 一係我暹粒間hostel有free pick up, 佢會舉住一塊寫左我名既牌等我, 但佢個牌係寫住
Sce
Hang wang

我email畀佢個陣明明唔係咁串法...

仲有黎pick up既tuktuk司機一邊揸車, 一邊不停擰轉頭同我講野, 唔駛睇路...

講返今日。
五點要出門, 包了tuktuk去小吳哥看日出。
可能很難以置信, 但這的確是我第一次睇日出, 我這種人竟然沒看過日出呢, 真神奇。在天空之鏡那時有天司機要我們超早起床說看日出, 可是結果車子一直在駛都沒停過, 而且我在車裡連太陽都沒看到, 只能見證天空由黑變亮, 是這是我唯一看'日出'的經驗, 所以我不當自己看過。
結果呢, 今次也是見證天空顏色的轉變, 但我五點半等到近七點, 直到天都大亮, 也還是沒有正式看到太陽飄出來, 於是轉身走了, 走了幾分鐘, 回頭一看, 幹, 太陽剛在右邊升起來了, 但人們聚集的地方是左邊啊。(但後來我看其他人拍的照片, 太陽確實是在多人聚集的左方升起, 並非我今天見到的右方, 怎麼會這樣) 無論如何, 這也算是看了日出吧, 雖然沒有很漂亮很震撼。

昨天遊了小圈small tour, 今天遊大圈grand tour。坐tuktuk遊吳哥, 比踩單車舒服太多, 所以也較有心機行。

到第一個廟時, 才七點多, 都沒人, 我就自拍了, 玩了一會開始有人, 就沒玩了。

然後我遇見樹窿, 遇見獨行的馬來西亞女孩,  用功溫英文中文的小查票員。

我又神速地逛完吳哥, 回到旅館才十點...
又要搵野做打發時間。

返左尋日食撈麵的阿婆度食粥, 以為要一蚊, 點知佢叫住我找返一千, 好人也。

旅行指定動作: 剪頭髮, 搵左好多間先剪到, 因為間間都淨係招待男賓, 好不容易先搵到一間咁大把係畀女賓。

三個姐姐服侍我一個, 爽歪歪。兩個吹頭, 一個剪, 之後又一齊幫我用電熱夾夾頭。

鳩行去art market, 賣d野同old market一樣。
坐低飲椰青, hea。

行行下又搵到個貴價餐廳集中地, 有pho24, 吉野家, costa coffee, 仲有免費靚廁所。
為左冷氣, 我坐低飲costa coffee, 又hea了一會。
柬埔寨好難搵冷氣地方hea, 周圍都冇冷氣, 餐廳都冇, 要連鎖餐廳先有冷氣。

行去lucky mall, 應該是這裡唯一的冷氣商場。屋村商場咁上下大。超市裡都賣進口貨, 本地產品寥寥可數, 就咁影個貨架出黎, 你會以為係泰國或越南或大陸或台灣或韓國甚至香港, 但你一定唔會估到原來係柬埔寨。

Lucky burger據說是當地享負盛名的漢堡炸雞快餐店, lucky mall頂樓有一間, 味道不錯, 但雞皮毛髮相當旺盛。同埋淨買雞唔買餐都送一個餐包, 唔驚唔夠飽。

慢慢行返旅館, 今日條街好多人, 河兩邊好多路邊攤, 河上又有龍舟, 好熱鬧。後來仲放煙花, 上網check返原來今日係送水節, 暹粒對上一次送水節慶祝活動已經係三年前, 我真幸運。

在旅館附近吃炒飯, 回旅館大堂hea, hea左好耐再坐tuktuk去巴士站, 11pm巴士去金邊。

臨走時旅館老闆一再叮囑我在金邊要小心, 好的, 我會緊緊抱著背包, 我會平安回家的。

再見暹粒, 這輩子或許不會再來了。

(真臘風土記)Day 3 暹粒

對我來說一個健康的旅行需要有單車代
步的元素(因為跑不到,只好選擇單車), 所以今天的重點活動是踩單車去吳哥。

市區踩去吳哥不遠, 半個鐘到, 入左場先係真正既開始, 景區之間距離好遠, small tour繞一圈好像是17km。數字上距離不遠, 但在吳哥廟宇間不停上落參觀, 還要頂著太陽背著背包踩車, 是不輕鬆的。見到tuktuk們絕塵而去, 會覺得自己攞苦黎辛。其實旅行本身都係一種攞苦黎辛, 放棄在家安逸unun腳的機會來節外生枝。不過回看又很高興。

吳哥窟真係好大, 好宏偉, 值得睇。冇睇過咁大既遺蹟群, 比墨西哥金字塔群還大很多。不過我在多個因素下, 好快行完small tour。1, 本身係睇得快, 2, 好熱, 3, 好累, 4, 急屎。我朝早八點出發, 結果下午一點幾已經返到旅館。

中途有小插曲, 話說我在吳哥窟泊單車, 隔壁賣衫的小販婦人跟我說, 穿短褲不能入廟, 又指著遠方的遊人, 說他們全都穿長褲。我好似上網見有人講過長褲的事, 又見那些遊人真的全長褲, 於是只好買了。其實我可以照去左先, 入唔到先返黎買, 但這很累人, 所以我先買了, 而結果係, 好多短褲人出出入入來去自如so9sad。被騙了。本身佢仲開價15蚊, 講左價做7蚊先蝕少d。(但第二日旅館老闆係我臨出門時都同我講短褲不能上山, 佢又唔似厄我但我最終都冇遇到短褲禁止區, 這是一個謎。後來回港問朋友, 得知真係有兩個位要衣物過膝才可進, 其中一個我有去, 但守衛沒管我, 哈)

去完吳哥踩到返城, 搵唔到旅館係邊, 走進一有中文名的士多問路, 諗住老闆會識中文, 點知佢唔識(而家諗返, 我都唔記得自己究竟有冇同人講中文, 我淨係記得有問人do u know chinese...唉, 好on9), 英文又溝通唔到, 後來我靈光一閃諗到點認路, 就買了個橙汁(因為擾攘了很久, 都要幫襯下既, 而且又唔係貴), 跟老闆道別。出了店, 我先用了十秒喝橙汁, 然後才騎上車, 準備走的時候, 我回頭看了一下, 發現老闆正站在門邊向我揮手, 眼神還超級關切。人在外, 遇上好人, 份外感動。

然後憑我的天才, 很順利回到旅館, 返房休息完出去行, 搵左兩次都唔見中央市場, 附近見到有個裝修緊既market, 唔知係咪就係佢。酒吧街野食好貴, 而且搵local野食係難過搵漢堡比薩壽司。old market食野平d, 有手信店和街市, 街市好似越南。竟然有人sell我買生雞, 她覺得我似會帶雞回家嗎。btw d雞雙腿超長, 柬埔寨品種。柬埔寨的手信店竟賣著跟泰國和越南一樣的手信, 太沒特色了吧...

就這樣hea了三幾個鐘。是日早睡, 明天看日出。

Day 2 新加坡去金邊去暹粒

因為 hostel十點有免費車去機場, 於是我晨早流流就去左機場hea, 行, 食, check in, hea, hea, hea. 得閒到去玩噢嬋按摩機, 原來部機咁大力。

Tiger冇check行李大細和重量, 正, 不過我都係得7.5kg姐。

三點起飛, 訓覺, 柬埔寨時間未夠五點落機。我好少旅行買電話卡, 不過呢度usd2一星期有1gb, 咁抵屌, 屌啦。

機場好細, 得pho24, 吉野家, 炸雞pizza, costa coffee, dairy queen。食炸雞, hea, hea, hea, hea, 坐車去巴士站, 巴士站有個中國籍細路喊左半個鐘都唔收聲, 仲不停鳩叫, 真係好想拍暈佢。好彩佢唔係同我同車。出去巴士站旁的河邊看了看, 係冇野睇既。好不容易終於等到十一點開車去暹粒。原來係臥鋪車, 巴士環境ok, 至少不會頂腳, 不愧係貴車。

Day 1 新加坡

今次約了自己, 去吳哥窟找個樹窿講秘密, 順道勾結外國勢力。同叻人去旅行會依賴, 所以有時要自己去下。

由於未去過新加坡, 先飛新加坡再飛金邊又比較平, 所以就在新加坡留一天。

晨早七點幾機飛, 買票時只想著要早機, 沒考慮究竟我要幾點起身,我知錯了。凌晨四點就去等機場巴士, 原來將軍澳開過來要九個字咁耐, 架車仲要好full冇位坐。

Scoot冇check行李大小和重量, 機位都闊過jetstar和tiger, 正。

下機後半個鐘就出到去搭地鐵, 九個字就到旅館。跟一個會說廣東話的大叔聊了一下, 佢話柬埔寨玩三日夠, 叫我去埋泰國, 有叫我一齊去食野, 但我想自己行, 拒絕了。

由lavender行到阿拉伯, bulgis, 圖書館, raffle, chinatown, 再行返上去魚尾獅, city hall。行下摸下食下夠搞足一日。

阿拉伯區, 有清真寺, 七彩小屋, 清真野食。

本來打算捱到chinatown先食海南雞飯, 但結果中途食左好多野, 而且原來要行咁耐。

土司工房咖央多半熟蛋, 跟香港分店味道差不多。

一食完就見到對面有肉骨茶, 又食, 好飽。好重胡椒味, 但我鍾意。

國立圖書館, 超大, 外觀好新好cyber, 14層, 讀者全都在看書讀書做功課, 訓覺人數: 0人, 臭體味: 完全沒有, 新加坡人真係乾淨又勤力, 氣氛好好。

路過見到南瓜推介的松發肉骨茶, 又食, 阿伯好humble咁問我要唔要加湯, 所以我連進兩碗, 好飽啊。好味過頭先個間, 胡椒味冇咁哽, 排骨又較稔和滑。

經過亞坤, 吃不下了, 沒吃。

商場hea, 好熱, 要涼冷氣。

五點終於來到牛車水chinatown。有個叫唐城坊既商場, 頂樓竟然係中文圖書館, 入面又係人人睇書冇人訓覺, 連商場都整個圖書館, 好有文化, 間館仲係冇職員, 借書還書全自助。

Chinatown無甚特別, 都是很大陸的食店,還有手信街, 最有特色係maxwell foodcourt, 舊式熟食中心, 野食又平又好食, 天天海南雞飯雞皮薄而不肥, 雞又滑, 最重要平, 值得推介。好多人排, 不過好快排到。

還有一蚊坡紙的蔗汁, 不像香港那麼重糖, 是來自蔗的清甜, 好味解渴, 亦係最重要平。

仲有幾檔想食, 但食不下了。

老巴剎, 翻新了的熟食中心。好飽, 沒吃。

魚尾獅夜景, 好多人。

走到city hall, 有中樂團表演, 指揮先生姿勢好似跳舞咁, 全程投入, 令我對指揮有了新體會。

以為附近冇乜野食, 於是又食土司工房, 今次食喇沙。

食完坐地鐵返去。

本來我卜了旅館八人房, 但結果畀左四人房我而且我獨霸全房, 好野。

總結, 新加坡條街冇乜人, 好靜, 靜到只有汽車引擎聲。d人同香港人一樣搭地鐵做低頭族, 地鐵一張凳七個位有四個都係關愛座。商業區似美國。

神奇旺角。

呢期去過幾次旺角，每次都畀到驚喜我。

近日留守的人少了，彌敦道猶如外國的行人專用區，大家席地而睡，食煙，放狗，自拍，像在公園休憩，很歡樂的樣子。那刻的感想是有公共空間，真好啊。

自拍人士中有不少為媽媽級或以上的長輩，不知我所見到的他們是否支持佔領，但他們那輩反對聲音佔多數是事實，我想，其實大家玩得如斯高興暢快，在彌敦道上大搖大擺擺pose，也是佔領帶來的其中一個好處吧，香港人有幾可可以有咁大咁闊條路行街，又冇車轉入黎，廢氣都少左。如果有哪個自拍人士還要堅持反佔領的話，不想政治也想想今日的愉快吧，這會讓你心情好一點。

關帝(還真的見到有人誠心上香)，耶穌，還有各式佈置，那大雜燴的風格真的很旺角，抗爭抗出風格來了。只是忽然發現地上貼了八個大字：[阻塞道路，慘絕人環]。佔領者真大量，還能容下這種質素的反對聲，字都未識寫，真係[慘絕人寰]啊。

遇上綠絲帶踩場，被群聚包圍齊唱生日歌。其實我企得唔近，除了一堆人頭和見到警察一字排開企晒出黎，我乜都睇唔到，不過會有爬左上紅綠燈既叔伯即時報告，前排又有人以自拍棍舉高手機影低當時狀況，由於佢舉得好高，讓我也能在遠方靠望住個mon估到發生乜事，感覺似坐係紅館山頂位睇住個大電視。

站在地上的人：(問爬左上紅綠燈的伯) 有乜睇啊？
伯：自己睇啦
人：睇唔到啊
伯：睇唔到就睇熱鬧囉！

九唔搭八得黎又冇答錯喎。

綠絲帶講野講得好細聲，大家都聽唔到佢up乜，於是大家又開始起哄了。
"綠色和平大聯盟，濫用暴力屈鳩人"
"買過個新咪，咪撚咁弱雞"

真係好撚正。嗌呢兩句個位仁兄仲話文學要黎咁用，哈哈哈。

保重。

李志超先生逝世了。以前天天在家讀頭條日報，總會讀他的專欄。喜歡的作家去世，感覺很爛。我第一次接觸到這種事是時候呢，可能是林振強先生那次吧。

懦夫。

我是懦夫，昨天沒去政總。

有朋友中催淚彈，有朋友罷工（老師和非老師都有），還有很多付出過的朋友，他們都是我心中的魯夫。

今天我去了銅鑼灣。至少也要做烏索普，怎好意思次次靠魯夫呢。

秋分。

前日是秋分，日本人為此放假一天，真是個浪漫的民族。
我得知這天是日本假期，竟是因為當日沒有日經平均指數，多麼庸俗。

考車筆試合格了。原來而家咁先進，一人一部電腦答mc，我以為要用筆將答案畫在紙上，還帶上了幾支鉛筆原子筆塗改液擦膠，都用不上。

把燃燒中的蠟燭直接插在沙上不是比在月餅罐裡煲蠟更差勁嗎蠟會直接滴在沙上污染沙灘啊。

可是我發現直接將蠟燭插在沙裡的人還不少。這樣要不要被檢控？

在月餅罐裡玩，比較乾淨吧。雖然頑皮的話還是會玩到d蠟飛晒出黎。

再等一個人咖啡。

因為各種原因，又看了這電影一遍，仍然很好看。有自信的人，總是散發著異彩，超級臭屁的九把刀，鬼扯也扯得那麼理直氣壯，你又奈他不何，因為事實真係鬼扯得好睇。

出發一周年。

一年前，我展開了101天的旅行。
時間過得真快。
忘了很多，記得很多。
我不肯定自己的心態有沒有改變，改變又孰好孰壞。
我的神去村在哪裡呢。
見了一年沒見的朋友。
第一次抽煙，但根本抽不到。試過就算。 明明只是口吸鼻吸鼻呼三個步驟，我也做不到，煙根本沒能鎖在口裡，它天生要往外溜。而且我夾煙蒂的手勢像執毛筆。
也飲了點jack daniel，光是用口，就沒問題。
我吞下了酒，但吐不出煙。

十本書。

最近fb又流行起tag人寫幾樣野的玩意，其中一個版本是寫十個書名。更明白自己看的書很少，真的， 而且我的文筆還是沒因讀書而進步多少。 面目可憎說是這樣了。這遊戲，真該玩。

Ten books that have stayed with me in some ways
1. 打錯了 - 劉以鬯 （學習意識流+扭橋）

2. 強風吹拂 - 三浦紫苑 （我要的不是速度，一起去看頂點吧）

3. 在甘比亞釣水鬼的男人 - 九把刀 （這是我看過最扯的書，通篇鬼扯而且跑題超嚴重的遊記，可是又扯得很有趣，唔睇到最後都唔知乜野係沒有最扯只有更扯。想學習鬼扯一定要看這本。）

4. 風之影 - 卡洛斯·魯依斯·薩豐 （想將老土故事包裝得吸引，可參考此書。比喻也用得不錯。還有一句，意思為：只要有人記得你，你就活著。）

5. 撒哈拉的故事 - 三毛 （不造作的文字）

6. 不去會死 - 石田裕輔 （ 讓我更肯定自己。另外 旅途上有些心境跟作者一樣，感覺親切）

7. 一人一故事 - 蘇鑰機、張宏艷、譚蕙芸（了解一下記者，看會否燃起想做記者的意志）

8. 我們最幸福 - 芭芭拉·德米克 （知多點北韓，終有一天會去那邊旅行）

9. 福爾摩斯 - 柯南道爾（小學睇晒全套，首次接觸推理小說）

10. 青春出於籃 - 陳葒 （小時候最愛的書，中小學六七年間翻看過約十次，非常瘋狂。對當年的我來說，這書地位等同好多人心中最愛slam dunk )

星期六。

通常星期六都沒工作動力，但今天很乖，一口氣完成了要做的事，特此紀念。
我想我寫消閒系列還好，一下就想到要怎樣寫，比寫財經順暢多。

下星期中秋，不會煲蠟，一來同伴沒空，二來大家好像終於過了興致勃勃地玩火的年紀。由小學玩到現在，我知這天終會來臨，只是真要面對時，還是有點戚戚然，不過，這十四年的情誼能維持到今天，已是大恩賜，不玩火，同桌吃飯聊天也很好。

把自己騙倒。

文字可以騙人。

搞個course畀班富二代fu er die, 等佢地擴闊人脈以便他日互相勾結巴結，我寫成：
讓業界翹楚聚首一堂分享營商心得。

搞個活動推廣歷史古蹟畀有錢人，等佢地閒時揸車去到此一遊打打卡，以示自己好脫俗出塵好有品味，我又寫成：
回望我城我根，重溫被遺忘的歷史一隅，在物慾橫流的社會中，上一節慢活歷史課。

真係自己都打個突，假到跳舞。

樓盤廣告更加信一成都失明。
“前迎海峽“只代表該樓盤近海，並不表示有海景，因為有其他樓比你更近海。
“熱鬧與寧靜之間“，根本個盤就係嘈到拆天既超級鬧市，寧靜？凌晨三點打後可能會有既。

不過呢，玩字係幾好玩既。

史詩式災難：開學。

九月來了，暑假完了。雖然暑假離我已經很遠，我很久沒放過暑假，但是九月的到來，也代表這一年已過了三分二。

返工半年，還是一片迷糊。說好的精彩一年，過得有點馬虎，偶爾提不起勁。每天在巴士睡覺。星期六日過得很快。

V 又找到很不錯的新工，我覺得自己有點原地踏步。

十月頭多加一次旅行，去雅加達，係開心既，畢竟好耐冇旅行。十二月都會去一轉旅行，到時戶口大概又會變成一潭死水。
不過，還是期待。

今天竟然邊睡覺邊寫了個稿。

如題，我真是睡覺睡到化境了。

另外，前幾天我報名學電單車了。但家母以為我是要學四個輪那種車。
因為家母很不支持我學車，係咁問學黎做乜，我又冇車blablabla。

為甚麼一定要有用才可以學？可不可以不要只著眼於看得見的得著，量化一切利益。難道快樂不是得益一種嗎。

最新奇是家母說我人學我又學，咦這太冤枉了好不好，其實我去年九月已經動心想學啊，只是一直考慮到現在才確切行動，究竟媽媽你為何會得出人學我又學的結論？我身邊也沒有人在學電單車啊？

由於光是說學車她已經很反對，所以我學的是電單車這檔事，不需說下去了，說出來只是自討沒趣。家母平日常抱怨我乜都唔同佢講，這樣啊，你的反對聲音總是這麼大，我也不可能有興趣開心見誠吧。而事實上，縱然我一直行為脫軌我行我素，還算沒甚麼大問題吧，大家的人生不一定都要走同一條路嘛，脫軌也是一條路啊。

好了，所以重點是我還是報了名學電單車，要好好用心學

終於等到了：等一個人咖啡。

等這齣戲等了很久，一知道開拍我就期待著，知道做思螢的宋芸樺戲裡戲外都咁似思螢後我就更更期待了（我看了花絮，所以戲未上就覺得佢似），結果刀大真沒叫我失望，再度讓我驚歎他的功力。

劇本幾乎是全新故事，加入了很多九把刀其他作品的元素，而且融匯得很好，還有很多一看就知道是九把刀的梗，令電影更天馬行空，整齣戲，真的很九把刀。

喜歡思螢，喜歡宋芸樺，太可愛了。
本來光看外表覺得布魯斯不像阿拓，但看完戲覺得他一整個就是阿拓。

戲太歡樂，歡樂到我要看到最後那句獻給阿拓，才記起真人阿拓早已不在人世，戲裡讓他在馬路中間英姿勃發，更有意思了。

另外如果將阿拓和思螢放煙花那段拍出來就好了，那段我很喜歡。

我又期待起下齣九把刀電影了，雖然林依晨不像我心中的心心姐姐，但我期待自己看完電影會對她改觀。

柬坡坡。

是說我十一月會去一下新加坡和柬埔寨，主要是想去柬埔寨看還未被超現代技術修過的吳哥窟。因為先飛新加坡，再飛柬埔寨（非轉機），兩程機加埋都平過香港直航飛柬，所以我也去新加坡留一天吧。一天而已是因為沒錢，又聽說沒甚麼好看。就這樣。啊很久沒旅行了。

原來在這公司請假是很乖的事，因為大家都忙到沒放假的閒暇，而公司又一定要大家年尾前清假。當同事們知道自己還有很多假要放時，他們的反應是 “啊 點算啊。“
很慘。

輪迴都要透透氣。

農曆七月，我們來說 輪迴。

公司規定，annual 要年年清，所以我開始計劃清假去旅行了。好耐冇諗過去旅行呢樣野，今日忽然發現原來就黎有得去，心情異常興奮。仲要個十日假仔，聽落好少，駁埋星期六日計落都可以拆到做三次旅行，係三次啊三次啊，wow wow wow ~~~
小小既短途旅行都已經感晒恩，可想而知返工呢個輪迴係點樣將我既生活榨成一片片枯葉。

說好的輪迴呢？明天繼續，每周五日或五日半，定時迴轉。

去年夏天。

去年夏天，是我返工返得最開心的日子。開工就跟同事skype到食飯，然後一起食飯一起打nds，而每次外出用餐，總是浩浩蕩蕩十幾人，偶爾還會帶上nds。吃完飯又埋位skypeeee到放工，還有好幾次放工都繼續留低打nds，這種生活，有今生冇來世，雖然我不思進取樂做得清閒，但我是個獲益良多的冗員。 天天無憂無慮地上班，跟同事進化成朋友，齊齊靈魂盛宴到凌晨，已經無比幸運。

那年夏天，美好得夢幻。

放榜榜。

上學，已經離我很遠了，更何況是放榜。

一直以來，身邊都不乏貴人。中五時黎同學告訴我可以報名做政府圖書館暑期工，結果我有幸中舉，開拓了圖書館理員這事業。有了這經驗，接下來機會就更多，無縫連接地接連做了幾份圖書館工，若要找份full time 混下去也不是沒可能，雖然目前我走了另一條路，但或許有天我會重操故業（？！），誰知道呢。

預科時有楊同學給我很多好筆記，放榜那天更陪我一同回校等死（如果楊同學回校不是為了陪我那就當我自大好了），放jupas那天我還在睡夢中時她已經打電話來我家了，比本尊還要著緊。但我很渾蛋地沒徵求她同意就擅自把她借我的筆記賣掉了，究竟我那時是腦袋放哪了，為何會做出這種爛事。

順利上了大學又順利在大學裡遇到更多貴人，因為一班可靠又有義氣又著緊本尊成續的朋友，借我筆記教我功課默許我做freerider，我的大學生涯大概不會那麼輕輕鬆鬆鄧梓峰。

工作方面不論ft 或pt，都得到很多人的照顧，讓我叩盡響頭都報不了這大地恩情。

所以關於這篇的重點，我想說的是：
識人好過識字（誤）！

大概是感恩吧。

節奏。

工作對香港人來說，究竟是甚麼形式的存在？今天看了一篇報導，大意是說去工作假期搵第一桶金。然後就有人慨嘆去wh為搵錢，有違wh的本意。但平日不是也有很多人不滿年輕人去wh玩是不事生產嗎，所以說，無論你去wh是為了玩還是為了錢，一樣畀人插到體無完膚。
總之你去wh，讓cv有空白，即是沒“正經“的工作，就不對。吹脹。

當你明白自己沒可能滿足所有人後，你更應該堅定地做自己，像賤輝那樣找回自己的節奏，儘管這條路並不易走。噫吁嚱。

辦公巴絲之今日先係星期四。

今天一起床感覺很像星期五，可是竟然只是星期四。
最近非常渴睡，每天一上巴士就訓覺，下午飯氣攻心的那小時又非喝茶不可。
本來還想說喝茶有益身體好，但昨天看了潮文腎者之石，大驚，不敢天天喝茶了（很易受驚吧...)。

譚仔的質素實在愈來愈低，昨天吃了，直情覺得浪費了我的進食quota。人隨著年歲增長，要更注意飲食，吃既不健康又不好吃的食物，真係浪費，一個quota咁就用左。
若要推薦好吃的米線，敝人會揀土瓜灣雲貴川和長沙灣麻辣川。話說，現在返工的地方有五家米線，真好。

最近距離的來信

今天一張設計很簡單的單張，吸引了我的眼球，白卡紙中間寫著“to: s小姐“，右上角印了個郵票位。拿起一看，不得了，原來我很久以前讀過的網絡小說“最近距離的來信“，被改篇成舞台劇了。非常高興，尤其在這種情況下得知，驚喜萬分，這就是緣份。明天去買票。

上了fb

最近只要是有心情寫blog的日子，都滾去utravel了，這邊有點凋零的樣子。

不過我那邊的blog也算有所表現，再度躍上utravel fb 了，大概知道寫甚麼題材比較易被推薦，但這些不能寫太多，一般還是自己愛怎樣亂寫就好。

雖然明白如何較易被推薦，但我還未掌握到如何得到更多like，讀者的閱後感有時也很估你唔到。

至於工作，大致都是老樣子，不想返工的情緒一直在滋養。人如果不以自己喜愛的識式生活，究竟活來幹嘛呢，我想了很久，都不明白這麼無聊還活來幹嘛，但我又不會自殺。

公關show。

家母話cy同老婆同女合照呢件事，唔係公關show。

我說，發放畀大眾傳媒，係公關手段；做戲扮樂也融融，係show。為建立自己一家既形象，刻意做一件違反事實既事畀大家睇，唔係公關show係乜野。

不過唔知點解我講左好耐，都冇改變到家母既諗法。問佢咁你覺得點樣先係公關show？有乜例子？佢又答唔到，淨係話總之佢覺得呢個唔係公關show。

哦。

又七一喇。

其實我願望好卑微，我希望，係有人提出疑問或者其他意見時，泛民學界左膠及其支持者們，唔駛起晒槓一副想排除異己咁款。

然後通常呢個時候就會有人話，咁叻你又有乜高見？
我建議罷工遊行啊，不過提出完冇人睬我咋嘛，返工梗係大過天啦，為左返工，可以去到好盡，就係將返工既優先次序擺得前過爭取普選喇。
假日遊行已經持續多年，都冇乜用。遊行完，大家返屋企，第二朝又繼續為老細打拚。以同一方式屢戰屢敗，其實那股勁都值得欣賞既，但如果可以試下尋求其他出路就更好。

有人趁七一去幾日旅行，係fb寫句“人不在心在“，其實如果真係咁想出席遊行，又點解會揀呢個時候去旅行？啊，我係咪知道得太多？
係喇，呢個舉動相信係fb抗爭，都不失為假日遊行以外既新手法，唔錯。

上了首頁

話說, 最近我連utravel blog都玩埋. 然後今日忽然發現我篇blog (我覺得那不太算是文章)上左首頁.

結論是題材重要過文筆, 因為我根本沒文筆可言. 雖然如此, 這也是個好開始.

邊一個發明了返工。

星期六，邊返工，邊聽著 邊一個發明了返工。
一萬元一萬元一萬元，靈魂賣給了大財團。

真係好冇癮。

好冇趣，d客要保守唔要creative，次次我想出街既野都冇出到街，D 無聊野就出左。

今日寫左個，我好滿意，但個客都係想要返保守d。我挑，咁駛乜寫個新野姐，用返舊個個咪得囉。

尋日都有個幾鍾意，又係冇用到。

呢一刻我先發現，多野做多野改既不快，遠遠不及個客唔欣賞我既大作個種失落同不滿。

真係好冇癮。

好多like

不想返工的時候，特別懷念旅行的時光。

於是我在面書寫了幾句關於復活島的感想，附我和moai的合照乙張，沒想到like數竟然破百，實在是意想不到的多，這是我面書開埠以來最巴之閉的數目啊。

唐僧肉。

難得睇左一次西遊記。玄奘成個佬咁樣，我完全唔想食佢d肉。
呢個玄奘d肉睇黎好粗糙，食完都應該唔會長生不老，完全勾唔起食慾。

六月了

已經六月，今年已經過了一半，沒做過甚麼，一月一日那天還說要春光似海盛世如花呢。

重拾書面語，打遊記，我的書面語簡直是垃圾。

之前旅行101天，有堅持打日記，是我做得最好最對的事。旅行，一定要每晚打日記。

在街上聽到自己寫的東西，跟身旁的友人說：欵這是我寫的！
感覺奇妙。

上星期，去了南生圍，原來真的只是這樣，我還以為當年是我沒深入行所以覺得沒好看的，事實上真的沒甚麼好看。之後去下白泥看日落，有灰色hehe，附近的人和情侶很有趣，人很好。走的時候拖鞋陷進泥沼，對腳是黑色的，用河水洗腳時那股黑氣好似把河都染髒了。的士司機好風趣：白泥...咁真係白黎囉。
我覺得台中高美濕地較漂亮。

端午節，行西貢三尖之一的釣魚翁，但沒攻頂。三十一度的天氣，令人很慵懶，毫無攻頂意欲。說了幾年的蚺蛇尖，還未去。

新相識的同事辭了職，不久就可以重獲新生。

梁國雄先生.

長毛好適合用動之以情mode. 印象最深的兩次, 原來都是全民退保, 對上一次是去年五月.
這就一年了. 又, 去年這時候, xanga改版了.

人生在世得一句，就係你信既野，係你離開呢個世界既時候，行前左一步。 (梁, 2013)

一個人係打輸後話再打過, 係最無聊既事. (梁, 2014)

2013年5月

2014年5月

詞匯好貧乏。

我想不到方便有乜四字詞，結果寫了
“衣食住行方便無比“
自己都覺得呢句好廢。

阿頭改完，變左
“起居飲食配套近在咫尺“

哈。

假期來了

很久沒試過星期六放假了

一想到明天還是假期, 感覺奇妙.

連放兩天啊. 真係, 好耐未試過.

人值得命中減少幾秒 多買一隻錶

友人問我喜歡哪個女星，我如數家珍地說了一大堆，黃脆如陳髮拉糖詩詠薛海皮...
但要數男星的話，一下子實在一個也想不到。我實在喜歡看美女沒錯。

忍笑日

前幾日返工不停睇到好笑野，先是一大堆厚多士改圖，再來是這個改圖post。返緊工不能笑得太起勁，忍笑真辛苦。

[改圖] 有冇人可以幫我改走個蘋果?

http://forum7.hkgolden.com/view.aspx?message=5117627&page=1

27歲孕婦嫁基督徒 判鞭刑一百下再賜死
http://hk.apple.nextmedia.com/realtime/international/20140515/52480319

母親節

十二歲，考琴。家母特地買來麥當勞給我當早餐，說吃了就會高興，高興就會考得好。

十八歲，留級。家母躲進廁所哭了。

廿三歲，住hall。家母三天兩頭就打來說家裡煮了牛腩煮了雞，應該是想吸引我回家，這些最能令我把持不住的餸在我住hall的幾個月裡，出現率離奇高。

廿四歲，去南美。家母寫下了廿四年來第一封家書，希望我改去一些她覺得比較安全的地方。

我的家，從不會直接言愛，我不會，家母也不會，也不需要，行動更實際。要說的，藏在這篇文裡好了，母親節快樂。

剛剛看愛我請留言，黃翠如被黃浩然逗到狂笑還抱著肚子喊痛，鏡頭還故意zoom近定鏡她肚子兩秒，我和哥立馬說黃翠如一定是得了絕症啦。媽說怎麼可能這劇分明是要大團圓的，我繼續胡扯說結局一定是黃翠如抱著患癌的肚子躺在黃浩然懷裡笑到猝死啊。媽說實在幸好我沒去做編劇，這甚麼劇情。可是明明我哥我爸還有我媽自己都笑得人仰馬翻啊。

朋友反對同性婚姻合法化, 但問她原因, 她又說不出個所以然來.
其實反對同性婚姻, 同反對左撇子用左手, 不是一樣嗎.
法律要怎樣制定, 根本不需要參考聖經.

Day 1 深圳

萬眾期待的復活節假終於來了，一放工即刻上深圳，準備第二朝坐火車去韶關。當晚在八卦路吃了烤肉。

第二天一早出門坐車去火車站，然後，塞車。好塞車。後來下車換乘地鐵可是還是趕不及，火車站進站口好多人排隊安檢，如果再早十分鐘才有望趕上檢票。

復活節去廣東省的火車全都爆滿，只能去廣州（因為班次很密），但我沒大興趣去廣州，以吃和hea來說，兩地沒大分別。所以這次旅行，最終第一日就收檔，深圳止步，多謝收看！
（完）

真係好笨柒 ，去過那麼多次旅行都未試過趕唔到車，今次竟然栽在深圳手上。我承認我不夠想去韶關，不夠想去丹霞山，如果夠想去就會再早d出門，如果夠想去其實我可以即刻轉坐大巴。

其實韶關去年已經去過一次，但都唔夠時間上丹霞山。上次去唔到，今次都去唔到，應該都冇下次，下次我應該唔會再去韶關。

說起來，復活節真係一個不容小覷的假期，唔好以為大陸唔放復活節假，地鐵站火車站的人流就不多，舊年目睹成個福田口岸站逼滿剛過關的人，唔知要排幾多萬年先埋到去售票機，的士站的人龍也絕對令人絕望；今次則領教到火車站有無限個應該係香港人的旅行團，要進站也得等上好一陣子。

離開火車站後，吃了面點王，粵秀腸粉，又去東門看了魔警，吃很便宜的麻辣燙。明天繼續hea。

另外，今天成功地完成了2048。