Logically Ridiculous: Day 5 河口湖, 富士急, 鎌倉, 江之島

睜眼，望著陌生的天花板，吸一口異地的空氣，確定自己仍在日本，安心了。早起的我和瘋先去來一個晨浴，泡在無人的露天風呂，微風輕送，望著遠方，又啟動冥想模式。

回房，瘋正獨坐窗台前唔記得食緊麵定飲緊茶，那背光的身影是一絕，剪影的你輪廓太好看，加上身處和式房間，完美演繹茗閒情的感覺(冇影低喎BYE)。遙望屋外樹影湖泊，頓覺內心穢垢全消，心靜如止水，俗事全部拋諸腦後。

吃茶喝麵，屙屎，啟動廁所的洗屎忽功能，啊，這是凡人能享有的生活嗎？每次按下洗屎忽掣後，忍不住收緊括約肌，究竟這陌生馬桶預設的水溫是暖是冷，水力是剛是柔，都要待到噴水一刻才揭曉。那種又怕又期待，坐立不安的愛，太令人上癮。

not bad

向富士急進發，難得今次一班人來，去遊樂場最適合。自駕遊真好，去downtown以外的地方都方便，又便宜，而我這負責做乘客的，更可以肆意腦殘，任由保母車管接管送。離開河口湖時才發現河口湖很美，平靜的大湖，背後是安靜的大山，感覺像瑞士，好想在那裡耗一個午後。太遲才發現河口湖的美好，今次又冇時間，又留條尾巴。

來到我好撚驚好撚緊張的環節－－號稱史上最長最恐怖的富士急鬼屋，900m路徑，60分鐘以上的體驗時間，我人愈大膽愈小，但又要驚又要玩，人就係咁矛盾(菸)。

鬼屋佈局劇透注意。

鬼屋是一幢兩層高的建築物，要整幢走完才能重返人間，唉痴撚線咁撚大間，我的人生可能要到此為止了...掉那媽頂硬上...

入屋，先坐下看短片，我們剛巧坐最後排，身旁的舉不停向後望怕有鬼，害我也心緒不寧疑神疑鬼。然後有個影相位，快門按下一刻會有好大聲的怪聲，嚇到我鳩縮咁樣的一刻就被capture！屌，這設計好撚仆街。不過由於我高聲鳩叫，竟達到了尖面效果，日本人真係設想周到，世上有甚麼是他們不能掌握的？地球好危險！

我們四人行，除了領頭的瘋，其餘人士皆甚恐慌，以人形蜈蚣的姿態碎步移動，本人深切體會何謂草木皆兵杯弓蛇影風聲鶴唳，每次(疑似)有風吹草動即刻鳩叫！終於，出事了！真係有鬼！人形蜈蚣光速解體，鳩叫聲中各奔前程，蓮仆倒了 (佢話feel到有條仆街推佢)，倒地的他不但無人理會，還要目送我們的車尾燈，完美演繹大難臨頭各自飛！丫丫丫～～～～由街尾跑到街頭，跑到去梯間位置算是達陣，鬆一口氣。唉吔慈愛的父啊，雖然我不敢說廿幾年來沒做過虧心事，但罪不至死，祈求天父放過小人，怕發生的永遠別發生！

重新合體上路，繼續緩緩蠕動，我眼不敢到處看，只敢盯著前方阿蓮的熊腰虎背。度秒如年，每行幾步都好想問是咪已經進來1小時了，是咪終點在望了...接下來每行一段，就奪命狂奔一段，上落樓梯，又行一段，又受驚飛奔一段，上落樓，行，跑，上落，無限輪迴，有次隻鬼還跟著我們跑！慈愛的父啊...日本人真係好敬業！

重覆的震撼，餘震未停止

好不容易，歷盡滄桑鉛華盡洗的我們來到了一條特別寬闊的大直路，大概是有了輪迴的經驗，蓮嚇出了慧根，說：呢條路咁樣，係咪代表準備要跑？

說時遲那時快，話音尚未完全落下，後面就撲出鬼！我們驚叫狂奔，爭相逃亡，跑到路的盡頭，推門－－屌你老味竟然出了屋外！所有正在屋前排隊的人望著我們驚叫著撲出來，皆人仰馬翻，屌好撚尷尬。號稱全球最恐怖的鬼屋，以瘋狂笑聲送客，真係好別出心裁好攻心計好恐怖好仆街！呢個出口既設計，仆街指數滿分，日本人真是一個可怕的民族！

望一望錶，竟然只過了25分鐘，我們25分鐘就將本應玩40-50分鐘的路跑完了！明明昨天才走完富士山，都成了傷健人士，一進鬼屋便瘸子會奔跑，神蹟啊。我飽受驚嚇，心臟仔仍噗噗噗噗瘋狂跳躍，我不甘，自己柒左都想其他人一齊柒，就拿出相機對準出口，準備捕捉下一批柒頭皮的醜態。等了很久，終於門開了，連拍啟動，咔嚓咔嚓咔嚓咔嚓咔嚓咔嚓咔嚓咔嚓咔嚓咔嚓咔嚓咔嚓咔嚓！只見幾個人施施然步出，一臉氣定神閒，悠哉如銅鑼灣行街...why！why佢地唔驚？！

剛剛睇返先發現, 原來都有人係驚既

點解出極都仲有人

仲有

屌仲有

講到氣定神閒，諗起最近高登一個旅行post
source: 我要同港女家姐MK細佬左膠老母去倫敦

講返鬼屋。團友表示從未聽過我把聲咁女人，屌你我真係驚到屎都瀨唔切呀！瘋11年前來過，表示失望，佈置道具仍跟當年很相似，鬼又少了很多，當年連我們喘息用的梯間位置都會有鬼，最尾大直路更會有一大堆鬼衝出黎追你，聽到都驚驚，好彩今次冇。雖然驚慌，但我也覺得鬼確實是少，就連一些擺到明應該會有鬼掃你隻腳既位置，都冇鬼。或者是我們表現得太膽小，鬼也給嚇到不敢出來了。千祈唔好問我鬼屋裡面既佈置同設計，因為我全程淨係盯住團友背脊，眼尾都冇梢過其他地方，有咩問返阿瘋，條撚屌仲話"由於朋友們一入鬼屋已相當害怕，伊娃鬼叫，所以我就行最前(其實D鬼係唔會嚇最前既人囉！) 我一路行，D回憶一路湧現，所以其實唔係好驚。回頭望到團友驚惶失措的樣子，反而令我會心微笑。"幾咁泯滅人性既comment。

驚魂未定，魂魄唔齊，食薯條定一定驚，嚇死寶寶了。轉攻逃離密室遊戲絕望要塞，企圖挽回在鬼屋失去的面子，只要在迷宮避開狙擊，完成指定任務過關，通過全部關卡就算逃出成功。每人獲發避彈衣模樣的背心一件，成件事好似好隆重咁。入場只見一大堆人在跑來跑去找線索，我其實不太知道要幹嘛，就跟著團友左跑右跑，還煞有介事的貼牆行走。所謂避開狙擊，就是避免燈光照射，以及避開像自動吸塵機般行來行去的機械人，所以我常貼著牆行，每逢轉角位又懶係伸個頭出黎裝下，幻想自己拍緊英雄本色。第一關蓮又立功，輕鬆找出隱藏圖案過關。第二關我又繼續沒頭沒腦的跟著跑，限時幾分鐘，瞬間夠鐘，即時死亡。第一關幾分鐘，第二關幾分鐘，即係玩得幾分鐘就玩完，分數極低。眼見好多人都係第二關就輸，關卡都幾難，唔多抵玩。

source: yahoo奇摩旅遊

D人著晒雨褸, 嚴陣以待

小學雞已經可以成班朋友一齊去遊樂場, 好羨慕, 左路仲有絕對領域添

Fujiyama過山車，我最期待的項目。講到好巴閉咁：號稱全球最長的過山車，最高時速130km／h、最大落差70m、最高頂點79m等。good，雖然我驚鬼屋，但過山車完全冇問題，我瀨屎的可能性是零。過往總是嫌過山車太短，才剛興致起便到終站，不夠喉。坐過FUJIYAMA，我覺得這長度才像話嘛，希望可以再長再長點，Fujiyama才剛剛好而已。我們玩得非常開心暢快，舉和瘋都叫得好爽，唯獨不合群的蓮，雙手全程緊握扶手，一臉便秘，一系列淆底的表情動作值得傳頌千古，將來我會跟他的子孫話當年，說你伯yeah當年呀，係個過山車上面驚到成個人硬晒，面都青埋，有相為證呀，笑到我地假牙都甩，不過畏高都肯玩過山車，係勇者黎既。

好正既poster

咁大部相機提住, 但我都唔記得擺pose

排隊時見到隔離架高飛車，幾乎垂直跌落黎，但佢就跌就跌個陣係龜速，好仆街既設計，媽，我鍾意啊。千祈唔好得罪日本人，係個好可怕既民族。

高飛車
source: http://kisokisodiary.blog.fc2.com/blog-entry-224.html

我地好鍾意呢塊板, 搵左對小情侶幫手影, 個日本妹妹baby fat, 笑得好甜, 好可愛, 好想畀幸福佢.

富士急係好地方，又唔駛點排隊，好想玩埋其他過山車，無奈時間關係，要撤退了，又留條尾巴。

點解有中文

臨走又食粒桃桃, 尋日生果檔買

坐保母車去鎌倉，愉快的車程。每次我們一坐進車廂，便會瘋狂鳩噏，盡說一堆無意義無營養無質素無品格的鳩話，比平日再鳩廿倍，簡直是深層人格的釋放。工作都通通放下，談東說西，多多說話，陪著摯友嘻哈放假，笑掉了牙。why呢首歌歌詞可以咁配合我心境？而家回憶住咁打blog，記憶又返晒黎，呢首歌根本係為我地而寫，林振強unbeatable。暑天過了卻憶起也笑，雖飄遠了每一分每秒，現仍然活在我心中把我亮照。

老麥汽車外賣店, 一嘗用對講機落單 (最後都係講唔掂要面談) 同係窗口交收既滋味.
日本乜都係好既, 蝦堡都特別好食.

能見度

途經休息站，停車歇歇，剛好有幾個短裙promotor靚姐姐找人做問卷送薯條。她明知我們不是當地人，也送了我們每人一份薯條，好敬業啊 (她們更會體貼地蹲在受訪者身旁啊)，而這也成了我們食薯條的轉捩點。蜜瓜味驚為天人，我們深深愛上，連多年品薯經驗的舉也從此轉口味，好不得了。有空必定要寫信去總公司表揚靚姐姐們，並要求將蜜瓜引入香港！

休息站竟有德國手信店, 有紅綠燈人仔賣

對鎌倉滿有幻想，一受陳綺貞和slam dunk影響，好想沿著湘南海岸走走；二看過海街日記，覺得鎌倉是四季分明，遠離繁囂的鄉郊地方。無奈當日煙雨濛濛，傳說中的湘南海岸又灰又濛，沒有波光粼粼，而鎌倉也沒有很鄉下，至少我們去的那邊不是。但無容置疑，鎌倉是令人舒適的，下雨加上太晚，小町通人流稀疏，好些店都關了。在雨中漫步，藍色街燈漸露，自在又愉快。鳩嗚Boss阿舉好介紹，毛巾名店"伊織"，齊齊入手富士山毛巾做隊巾，好靚，質地軟熟，好舒服，吸水力又強，零瑕疵，已戀愛。

返香港使出隊巾隊棍，咦呢個咪係mount fuji？

靚巾配靚人

去North Face尋找北面紫，空手而回，鳩嗚boss依然買到野，又係帽，似乎失去血滴子帽一事對他造成了永難磨滅的烙印。North face有兩層，我和瘋以殘廢的姿態挨著扶手拐下樓梯，親切的女職員問我們是否大丈夫，得知我們剛行完富士山後，她眼神裡馬上流露出仰慕，嘿，不要迷戀哥。

去白飯魚刺身名店，但太遲，人家要關門，明天請早，鎌倉的店都很早收檔。沿途阿蓮不停嚷著要屙屎，還說要去airbnb屙，但無人理會，睬佢有味。