Day 3 吉隆坡：十號胡同，b time square ，p plaza，茨廠街

為左等個肚可以食得落兩次早餐，晨早六點幾起身食酒店早餐，再返房眠一眠，再出動食第二餐。

結果返房一眠就眠到發左個夢，夢中我遲唔知醒，一醒已經下午三點半，真是惡夢。點知訓醒原來係十一點半，雖然都遲左，但都好過三點半。

由於太熱，人都hea左，今日本來係去獨立廣場之類既歷史地方，結果變左食同行商場。好頹廢，但真係太熱。

十號胡同：
金蓮記福建炒麵，感覺類似濃味的上海粗炒，我幾鍾意。

何榮記雲吞叉燒麵。有撈麵同湯麵之分，佢餐牌分別有雲吞麵同雲吞面湯，我睇錯以為前者係湯麵，後者係淨雲吞。落錯單，收銀阿姐又醒喎，知我其實係想要湯麵，佢表露出一副冇你咁好氣既樣so9sad。媽，好柒啊。

麵質較稔唔太彈牙，唔係香港個隻鹼水麵。雲吞亦唔係香港咁，細細粒肉，冇蝦。叉燒燶左，有一忽是黑色的。還是比較喜歡港式雲吞麵 。

炒鴨蛋粿條，有鑊氣，幾好味，但同想像中有點不同，我以為係鴨蛋黃碎炒粿條。不過也挺好吃。

南洋咖啡。我們問coffee c同coffee o有乜分別，服務員好似聽唔明。然後想要classic hot coffee 和南洋ice coffee ，結果溝通了很久他還是不明我們說甚麼，冷熱倒轉了。可能我英文太難聽。咖啡味道跟新加坡的差不多，classic 那杯是咖啡溝奶茶溝美祿，美祿下得很重手有點蓋過了其他味道。

十號胡同個廁所要收錢。

仲諗緊點解咁似古巨基, 原來真係古巨基

B time square ，好大，可能係我見過最多商戶既商場。

好飲, 同香港涼茶唔同味, 又平

Kfc雞肉冇咁大浸雪味，好食過香港，服務員個樣好誠懇，想畀tips佢。

有條樓梯設計成鋼琴咁，每級唔同琴聲。又有另一條樓梯旋轉形成棵樹咁。呢個商場既樓梯設計都幾有心思。

商場裡面仲有個遊樂場，有過山車，唔係西九龍那個咁雞，係會反轉再反轉，好似好好玩，仲有其他機動遊戲。其實我想玩那過山車，入場費rm100左右(應該入場後任玩)，但廖冇興趣機動遊戲，冇理由我自己玩佢睇我玩，只好作罷。

商場裡面有遊樂場

P plaza，今日個function 有個叫lee min ho既嘉賓，係咪李敏鎬？好多人逼晒係度睇lee min ho，人多得水洩不通。

廖漏左部電話係商場廁所，幾分鐘畀人拎左了。慘慘。但佢表現得(好似)好冷靜，冇呼天搶地。

下大雨，廖買了ipanema拖鞋，幾平，rm3x。

茨廠街，即係唐人街，有好多女人街咁既檔。因為落雨斯濕，又覺得都係女人街咁姐，所以冇乜心機行，連野都冇心機食，熱到冇乜胃口。結果食正餐，淨係買左一小袋芒果同菠蘿返去食，成個減肥港女咁。

仲有食晏晝係超市買既芒果，雖然已經熟到稔，但都係唔甜。究竟邊度先買到甜既芒果。