Day 52 伊斯法罕: 伊瑪目清真寺, 阿里卡普宮, 大巴札, abbasi hotel

關於司機夏搣.
我竟漏寫了其中一段很爆的對話.



搣: 伊朗人屋企唔方便扑野個陣, 就會車震, 我同條女都試過, 就係你而家坐緊呢架的士!
我: OH!
搣: 不過今日我屋企冇人, 陣間條女會黎同我扑野
我: GOOD!
搣: 你陣間要唔要黎我屋企飲茶?
我: 下, 你唔係要扑野?
搣: 係啊, 但你都可以黎飲茶, 你可以參觀我地扑野!
我: 下 (心中的OS: 你講乜撚野? 你知唔知自己講緊乜野????)
搣: 你仲可以影相!
我: 下 (心中OS: 做乜撚野啊? 參乜野觀影乜野相? 動物園嗎? UP乜春啊??)



我真的很想表露出成蟲的表情, 並直接用廣東話問他做乜鳩, 但為免他以為我激動就是興奮, 興奮就是有性趣, 繼而作出更熱情好客的邀請或舉動, 所以我全以少說話無表情來回應.

圖片來源: nownews

還有昨日下車告別時, 他突然光速執起我的手, 像紳士般吻下來豁出去, fine, 如果那不是濕吻的話。我低頭望望自己濕答答的手背, 再看夏搣的的士絕塵而去, 分不清他是真熱情還是真抽水。喂, 這根本不是濕吻, 是用脷奶好不好!

明白我為何不願再坐他車了吧. 爺我老了, 受不了這等激情款待, 怕馬上風. 不過我還有留著夏搣的電話號碼, 有性趣可以問我. 哈.



這天是在伊斯法罕的第三天, 亦是最後一個full day, 沒甚麼事幹, 在酒店吃早餐(房租包埋), 西式方包, 本地饟餅, 芝士, 火腿, 蓄茄, 哈蜜瓜, 果汁, 咖啡, 茶.



拿食物時不用客氣, 因為對別人仁慈就是對自己殘忍, 其他人會毫不留情地將大量食物掃進自己的碟子. 如果你好客氣每樣只拿少許, 就要望穿秋水等到職員終於refill時才能再吃.



這裡的哈密瓜很好吃, 非常甜, 而且切很大塊, 所以每次refill看似很多其實也不過十數塊而已, 一本地青年毫不客氣地一口氣掃走一半, 多得盛滿了兩隻碟. 我亦不甘後人, 他掃剩的我全部掃走, 坐返埋位慢慢食. 嘿.



回房間看電視, 發現伊朗除了哈蜜瓜外, 西瓜都應該好正. 因為西瓜在電視上的出現率極高, 清淡節目中, 主持和受訪者中間的茶几上放了西瓜 (而且他們真的會邊吃邊聊); 劇集裡, 男主角跟家人吵架途中, 也拿了塊西瓜來咬 (這是甚麼爛劇情...). 甚至教堂壁畫中, 畫中一班人圍埋傾計, 他們中間亦放了一碟西瓜.

電視劇裡有拎住西瓜既情節

清談節目檯上有盤西瓜 (雖然個主持訓低左, 不過呢個真係清談節目黎...)

明信片上PARTY盛況, 檯上又有西瓜, 仲有D似西瓜盅

又去左尋日間靚餐廳食野。今次食羊肉kebab同埋湯，雖然kebab好多地方都有得食，不過呢間又真係幾好味，羊肉充滿香濃牛油味，巧巧吃。

好足料, 好飽

羊肉KEBAB

每次惠顧都會送粒糖. 味道同質感跟車厘哥夫一模一樣.

間餐廳真係好靚, 靚到要去兩次. 賞心樂事.

然後又晃到了伊瑪目廣場, 去伊瑪目清真寺. 寺前有男士向我say hi. 我暗爽, yeah i am a star! 男士好親切, 東聊西聊一番後得知我來自香港, 竟用廣東話說了句'你好'. 我甚驚訝, 他說的竟然不是ni hao而是nei ho. 雖然最後發現知道他其實在sell客, 但全程毫無sell味, 真心交流, 亦無死纏爛打, 只是很靦腆地叫我參觀完清真寺可以去他的店, 伊朗人真不錯.

伊瑪目清真寺, 比星期五清真寺大得多, 但部分位置裝修緊, 唔夠清靜. 同埋環境空曠, 反而唔及星期五清真寺咁令人自動撻著六根清靜冥想mode. 原來幽閉空間先至更能夠冥想.

好鍾意呢種isfahan blue. 朝思暮想黎伊朗就係為左睇呢D靚清真寺

阿里卡普宮. 在伊瑪目清真寺旁. 係俯瞰伊瑪目廣場最好既地方, 無奈佢同樣裝修緊, 搭晒棚. 幫一對當地情侶影相. 大量棚架加上我拙劣既攝影技巧, 都唔方影出乜野好野. 點知男方睇完張合照後竟大讚"you are professional!" 女方亦風情萬種咁對住我微笑. 哇, 伊朗人真係好.

咁樣樣個景....

唯有睇另一邊既景

頂樓既演奏廳. 細看圖案係樂器/器皿形, 別出心裁

靚得黎仲要實用, 聽講呢一個二個窿有增強音效既效果, 企係演奏廳正中心位置拍手掌, 聲音會特別響亮. 我試左. 成個白痴咁企係度瘋狂鼓掌. 好似真係大聲左. 

大巴札. 伊朗d工藝品真係好靚, 仲可以見到每間舖入面都有人係度埋頭苦幹整緊新野, 冇花冇假真係hand made, 仲要好靚. 但奈何好多都係易碎品, 好難帶返香港. 其實我好想買瓷磚, 個隻伊斯法罕藍, 真係令人著迷. 返香港後我仲試過上淘寶搵有冇類似款式既磚, 可惜搵唔到. 終有一日我會返去掃貨, 立此存照.

見到星期五清真寺個看門人走開左, 我即刻邪念起企圖唔買飛直接入內. 點知人地原來只係坐埋一邊離遠睇住. 當時我一心為慳錢, 又覺得自己早兩日已經入去參觀過, 於是今次冇再入去. 事後好後悔, 因為用剩左好多錢. 終有一日我會返去坐低發呆冥想同真主阿拉打招呼, 立此存照.



對我黎講, 伊朗都算係留低比較多遺憾既國家. 所以我他日不得不回來, 補完呢個咁美好既回憶



abbasi hotel. 在我住的酒店附近, 係伊斯法罕首屈一指既五星級酒店. 不過酒店cafe其實唔貴. 我坐低諗住歎住咖啡扮貴族, 點知坐低後冇人理我，難道呢度既落單程序唔係咁？於是我起身去櫃檯，但櫃檯個人都係指我去坐低，坐左陣終於有服務員理我，但佢叫我跟住佢，去坐室內既位，於是我又起身跟佢走，點知佢去左一個角落擺低手上既碗碟，跟手係度搞d碗碗碟碟，個度根本冇位坐，我又唔知佢搞d碟要搞幾耐，佢睇落有排搞。結果我老舉埋年走人，上等人真係唔易做，我都係安守本分算。

最後冇乜好做，返酒店，順便係櫃檯兌錢。職員好老實，話酒店兌唔抵，提議我去外面兌。其實我係懶費事煩，又唔係兌好多唔爭得好遠，不過人地咁熱心，我又有時間，就順佢意出去兌，儘管佢教左我間兌換店係邊我都唔多明。順住佢指既方向鳩行，行行下又真係見到對面街個一層高小商場有兌換店，唔知個職員係咪就係講呢間。

甫踏入商場，頭岳岳，全層店家都估到我搵乜，動作一致默不作聲但面帶微笑咁指我上樓上，場面幾有喜感。

兌錢, 伊朗D紙幣質地好霉, 媲美人民幣, 店家兌左幾張爛左但用膠紙痴返既紙幣畀我. 我問可唔可以換D靚仔D既錢黎, 對方都好樂意, 相當好.


路經雪糕店, 見到有番紅花雪條, 整支黎食下. 幾好味. 淡淡的清新花香, 每一口都是fresh的感覺, 自在又愉快. 冇影相. 雪條外型好似鳳仙雪條咁, 自己想像下.



由於晏晝食得好飽, 完全唔覺餓, 於是返酒店食桃桃啤梨當晚餐. 非常健康, 成個減肥港女咁.



此時尋日同我係餐廳言談甚歡既洋人whatsapp話佢今日識到伊朗朋友, 約左今晚去三十三孔橋附近散步, 問我去唔去. 其實我有性趣, 但夜晚同男人出街又有D淆底, 最後都係好淆底拒絕左. 正一死廢柴.