Day 6 布哈拉

31/7/2019

早上坐酒店的車去火車站，跳錶（佢自己部手機）只係13蚊，早兩日黎個陣搭的士開價40。

火車車程個半鐘，今次到埗有民宿接送，唔駛畀人開天殺價。

民宿開業僅一年好新淨，正正子。坐落於清真寺旁，轉個彎就到個隻，好高大的清真寺突然就出現在眼前，心裡叫了一聲哇，驚喜。

午餐，羊肉串粒肥膏係香得黎燶邊入口即溶個種，aryan乳酪鹹鹹地太頂肚飲唔到好多。明明呢餐食得唔係好多，但又飽了，似乎開始失去食慾。

布哈拉同之前兩城一樣都係39度，但體感熱好多，可能因為呢度冇乜樹？我今日對熱有新體會，與其話係熱，㷫應該更精準，感受到地面既熱氣慢慢由下而上爬升，好似畀人擺左落鑊咁。個人冇乜汗，雖然熱但並無好想除衫，而係想搵塊布笠住自己，與陽光隔絕。

呢個trip搽左我一年份量既防曬，個頭都曬到痛痛地，百密一疏搽漏左耳仔，甩皮了。

而家對規模細d既清真寺已經看不上眼，公園的樹樹冠好細，好曬，都冇人既。上左個觀光塔，然後返酒店，頂唔順了，條街冇人係有原因。

五點九再出動結果仲係好熱，行超市，食左個好食既doner，爆汁。

晚餐食乜冇所謂，最緊要有冷氣。

再逛清真寺，晚上情侶約會勝地，每晚在千年古蹟約會真有意思。

早兩日開始追《仇老爺爺》，一口氣睇左好多集，劇本有心思，好多in jokes，莫名地多大卡士，好睇。