29/7/2019
坐火車去撒馬爾罕,三個鐘,我應該訓左兩個半鐘。 火車站坐的士去酒店,司機叫價40,大豪客v沒還價。 不過司機駕駛技術超卓,冇倒後鏡但完美倒車( 話說烏茲別克人泊車技術麻麻,但好似好鍾意倒車, 係畀重油倒足成條街咁遠個種)
覓食,有間餐廳門口掛住kfc牌,我地以為係kfc, 原來只係一間有炸雞賣既店( 烏茲別克既menu上kfc就等於炸雞)。 店員面對唔識俄文既我地,方寸大亂,然後有個年輕店員走埋黎, 深呼吸好認真咁講:konichiwa。 結果我一句hello又打亂左佢陣腳搞到佢好慌張。哈哈。
炸雞好好食,肉質竟然係爽口但好嚼,炸漿也剛剛好,好香, 完全同(全盛時期)kfc係兩回事不過亦好好食。
撒馬爾罕是古城,我以為會似摩洛哥馬拉喀什,點知呢度都好新, 不過確實比塔什干有古老味。
頂著暴烈的太陽步行前往市內最大景點神學院,熱死, 熱氣由地面沿著雙腳上升,頭頂又無遮無掩,好難受。 發現樹蔭真係好重要,只要企係樹蔭下即刻舒服好多, 未必有風但真係突然陰涼左兩度。
由一個樹蔭走去另一樹蔭,終於去到神學院,真係好大好宏偉。啊。 面對咁珍貴既建築我應該感到震撼並且仔細欣賞, 但我個腦已經熱到迷糊,例行公事地影相和逛逛。同樣地, 一個個穹頂內都是手信店,馬賽克瓷器瓷磚餐具地氈絲巾都好靚, 我明明鍾意買磚,但呢一刻突然唔想買,覺得買左返去都唔知擺邊, 去年摩洛哥買的東西還在膠袋裡。呃, 希望我呢一刻既理性唔會成為日後既懊悔吧,呵呵。 然後見到好靚既磁石,模仿清真寺牆上的圖案,藍色,木製, 品質還不錯,點知叫價45, 仲係檔攤前擺左幾支畫筆係度聲稱係handmade,親, 這顯然不是handmade啦,扮晒野。唔買。
V行前面,我在後面慢慢影相,一落單就有當地鬼仔求合照, 見佢幾靚仔就影下,點知佢捉到好緊,下次唔影。 此時一個滿口金牙既肥大叔見到我地合照,於是又想影埋一份, 我覺得如果同鬼仔影唔同佢影好似好衰,於是影左, 然後佢再叫埋妻女黎一齊再影。之後見阿肥叔逢外國人都影, 有個鬼佬畀佢摸到怕,肥叔放過鬼佬後發現了v,求合照慘食檸檬。
發覺烏茲別克人最常見既工作係剪草同淋草, 淋草係淋到花圃變左水稻田咁。
前進去下一景點帖木兒之墓,途中入cafe涼冷氣回血。 烏茲別克的可樂總是超有汽,d汽強到頂親心口。
墓係靚但規模不及神學院,審美疲勞了。這邊一樣有「 handmade」 磁石賣但只售20而且也沒自稱handmade,屌了, 唔屌磚屌個磁石開心下囉。
四點半回酒店避暑,叔叔不行了。五點再出來,很多餐廳沒開門( 或者未開門?),最後吃了俄國菜,等左好耐,上菜都係法國速度。 呢度d餐廳經常都超大間華麗裝潢但係得一兩檯客, 作為客人係愜意既。
超市,有個年輕職員觀察左我好耐, 然後調整呼吸chok聲講anyong hasaeyo,哈哈
酒店外就是公園,夜晚好適合散步,好多當地人踩單車、談情、 聊天,仲有好多人睇書,個樣似溫書,咁黑都睇到書,真勤力。
是日步行15公里。
沒有留言:
張貼留言