此情此刻

此情此刻
因為電影竟罕有地用舊歌做主題曲，而且是我很喜歡的沙龍(陳奕迅)，所以我進場了。

其實港產小品並沒消失，只是在這年代，少不免要加點社會性，例如集體回憶，追夢情懷，樓價問題，收樓重建，像去年的王家欣，前年的點對點，很難再是往日戀上你的床，絕世好bra式的純愛情電影(其實都有：分手100次(2014))，失戀急讓(2014)也要講地產。

不要說港產再沒有小品，也不要錯過。摘下懷念，記住美妙，多點支持港產好嗎。

下篇再詳細講內容

Day 3 蒲甘

今日打算包車去遠既佛塔兼睇日落，由於我相信自己應該好快會睇晒d景點，好難捱到日落，所以唔咁早出去。

不過人都係犯賤，又唔敢太晏先出，於是十二點就出左去，坐馬車20000k。一個人坐，好土豪，我係架車坐到好似吸鴉片咁既姿勢，不停放空，有咁多時間放空好幸福。

我本來叫馬伕載我去old bagan個邊既佛塔，點知佢路經我尋日炒車個度竟然叫我可以睇下呢度先... 咁咪又要見返尋日個守塔小弟，好撚尷尬啊屌，不過尋日都確實冇好好咁睇呢堆塔，咁睇下囉。

呢堆塔原來幾適合自拍，又冇乜人，又多位擺相機。
終於畀守塔小弟發現左我，佢同馬伕講我尋日黎過，我向馬伕展示我腳上光榮既傷痕，馬伕一臉語重心長咁話，呢度成日都有遊客炒車，其實好危險。我小人之心又猜度佢係咪想多d人坐馬車先咁講，其實揸大路真係唔算危險，車又唔多路又闊，只要唔好行沙地就得，係我廢姐。

屎忽穿崩了

路上不停發呆放空，想了很多但忘了是甚麼。我總是依稀記得自己的放空時想的都順暢可以直接變作文章，但等不到我抄下就全然忘記，算了。

在其中一個廟遇上來自廣東省(唔記得邊度)的大叔，他其實來工幹，賣翡翠，乘空檔來蒲甘看佛塔，人也挺好。其實很多大陸人都很好人，過去的旅途中受過很多次他們的照顧。


坐車無聊就看馬伕策馬，他偶爾鞭打馬匹，同時嘴裡會說出一句不明語言，語調像aoc內的村民npc。我開始猜想他平日過著怎樣的生活，是像今天那樣待在酒店門前等運到嗎，出一次車的價錢應該夠當地人吃好多餐，他會是隱形富豪嗎。然而我沒開口問他，就繼續發呆，背向車頭坐，看著路上一串串馬蹄印。

馬伕載我去了許多佛塔寺廟，我不知道它們的名字，甚至不知自己在地圖上哪一點，唯一認得的應該是阿難陀寺 (這名字每次都讓我想起預科中史讀到玄奘去的那爛陀寺)。阿難陀寺門口是賣書的檔攤，寺裡頭有幾個年輕人在看書，見了我就主動講解寺裡的裝飾，說完就識趣自己閃開，我看完這邊轉身走向別處時，他問我要不要導遊，我說不用，他笑了笑又低頭看書去。

後來綜合整個旅程，我發現普遍緬甸人都不熱衷於sell客做生意，他們一般都完全不管你，甚至很多檔攤都無人看管，東西只是擺著，即使在紀念品檔前停留摸東摸西，也不會有人撲回來顧店，他們甚至眼尾都唔望你一下，繼續幹自己的活，或hea自己的時間。這樣很好，沒有壓迫感，身心都舒暢。不知這種生活態度跟信佛教有沒有關係，生意的事都隨緣，不好強人所難。


但也有例外，正在參觀某個廟時一名老伯熱情地向我打招呼兼搭訕，然後忽然蹲下，將袋裡(聲稱是自己畫)的畫全都攤在地上，當然就是想我買。畫看起來真的像人手畫而非印刷，可是我沒有想要買畫，走的時候好像隱約聽到老伯在低聲罵空氣(或我)。我覺得緬甸似乎不是個很商業的國度，許多紀念品都不是遊客向。想起那年在吳哥窟，很多小販賣書，厚厚一大本講吳哥窟的書，才usd1，其實超平但甚少人買，而另一小販賣磁石，同樣usd 1但生意好多了。

後來去了一個好大的廟，但因為地震震壞了不能進入，連走近也不能，只能遠觀工人們在廟頂爬來爬去在維修 (其實睇佢地將d建築材料搬黎搬去都幾好睇)。


最後去了一個可以爬的佛塔，是真的在塔的外牆手腳並用那種爬，太好了，之前還擔心地震完冇得爬塔。緬甸的古蹟真是超親民，任踩任摸任坐任爬。太正了，呢件事好岩我，好鍾意爬，我還想過報爬樹班。


爬上大約兩層樓高的塔蓋坐下，眺望平原，遠方的佛塔都看得清清楚楚，是個讓人看了好舒服好平靜的景色。這位置很好，不曬不熱，又靜，只有零星遊人。清風徐來，送來塔蓋另一端的薯條味，此情此景真的很應該食薯條。

網上圖片：人多時就要排隊爬塔，冇晒意境了。聽說日出日落時會超多人，幸好我來得不是時候所以才得到安寧，我這兩天也因而甚少碰上遊人。

在塔上無所事事坐了成粒鐘，其實這裡很適合看日落，但還要等兩個鐘，作罷。

肥腳。我d拍技術真係愈來愈好，無處不自拍。

臉上的是Thanakha，參觀某個廟時被一當地女人拉入店裡表演我睇如何將植物磨成這些thanakha汁液兼幫我畫面，實際係sell我買野(最後我乜都冇買對方都冇乜野)。當地女人喜歡塗在臉上美容防曬驅昆蟲，她們覺得臉上塗一撻野好靚。

回酒店，又繼續無所事事，地點轉換為床上。旅行就是要做平日不會做的事，例如全天候窩在床上。


晚餐跟昨天一樣在酒店附近吃，今次試秦國菜館，有緬甸名物春卷，一客竟有十條之多，懶係慳錢冇叫野飲，食到口都乾。

樓下的房客，羅生門，屍殺列車，謎之時空

樓下的房客

1，我好鍾意本書，應該睇過三次左右。戲都拍到偷窺，惡作劇，穎如好陰森既感覺，但結局改晒，我不能接受，unacceptable, totally unacceptable 。

2，我要劇透。
電影結局解釋左點解任房東會做出變態行為，書就冇解。點解每件事一定要畀個原因佢？唔可以係冇原因/純粹無聊貪玩？仲要個解釋係話房東做完臥底後精神分裂，喂，港產片黎既？終於明白點解搵任達華做呢個角色。首先將件事講到咁白，就失去左個詭異離奇既感覺，第二個解釋仲要咁平庸，本身我睇到好入戲但一知道結局都即刻抽離晒萎縮晒，冇癮。

3，事後睇返早幾星期講樓下的房客首映既娛樂新聞，vo話"今次新戲入面任達華扮演精神分裂..."根本已經大劇透，好彩我睇戲之前唔知。

4，仲有呢個穎如只係房東死左既女，係房東想像出黎，其實所有事都係房東做。唉，夠了好嗎？話房東精神分裂都算，仲要話其實冇穎如呢個人，電影世界唔可以異想天開一點嗎？咁同我細個作文開頭寫到天花龍鳳，最後話原來係發夢有乜分別？屌

5，老老實實，我份人好公道，是其是非其非，應讚既野我會讚。呢齣戲演員演得好，尤其穎如; 配樂亦非常好，管弦樂同齣戲超級夾，又好聽，仲有黑色星期五，選曲一流，好好。


羅生門

1，1950年黑澤明的經典電影，風格真係同而家好唔同，我有種睇粵語殘片既感覺。大概以前的人比較純真，故事好簡單好直白，仲富有教育意義。演員演技浮誇，真係好似粵語殘片。

2，除左劇情同演技，鏡頭運用都同而家好唔同，呢套戲既shot得幾款，根據wiki：

《羅生門》中多採用平衡構圖法，人物多出現在畫面中央。人物單獨出現時，特別是他們在糾察署提供證詞時，不管是樵夫、雲遊和尚、衙役、強盜、武士妻子都出現在畫面的中心。即使是衙役和強盜同時出現時也是一左一右構成畫面主體，是一種對稱性構圖。

其次也採用了主次法則，在糾察署和女巫做法時，樵夫和雲遊和尚總是端坐在後面，是畫面的次要主體，構成畫面的背景。也有開放式構圖、黃金比例構圖和三角形構圖等等。

原來人物多出現於畫面中央都係一種手法...令我諗起作文既白描法...

3，節奏好慢，忍唔住訓左陣，訓醒都仲跟到。


屍殺列車

1，我好撚想嗌啊屌你，好撚驚啊仆街，屌你老味好撚恐怖，我以為自己係富士急鬼屋120分鐘，如果我唔係gum住個嘴我已經嗌左出黎!

2，兩年黎我入戲院咁多次，最多人去廁所一定係呢場，我肯定d人都驚到標尿! 我都柯左次尿，驚到好急，好撚驚呀救命，冇誇張啊屌你，唔信我都要信其他跑出去去廁所既觀眾! 平心而論，真係未見過咁多觀眾去廁所...

3，感謝主啊好不容易我終於睇完，架車終於到釜山，我中途已經忍唔住講粗口問楊做完未，仲好想起身跑。睇完我仲去便利店買左盒牛奶公司鮮牛奶，$8.5，一野乾左佢黎定驚。我描述返畀同事聽套戲有幾恐怖既時候，聲音仲有一絲顫抖，驚魂未定，佢地好理性問我點解定驚要飲奶，我鳩噏話因為飲奶有種襁褓時代係母親懷裡既安全感。

4，雖然我不停爆粗，但其實我覺得好好睇。緊湊之中會放break 畀觀眾抖下，gag亦幾好笑，連我咁嚴肅睇戲既人都笑左兩三次，所以真係幾好笑。

5，鏡頭令刺激度+10，好似打緊house of dead，我爭d想拎把槍出黎射。幾千隻喪屍衝出黎追火車個shot似曾相識，好似一個唔記得乜名既綜藝節目。

6，劇透下先：一知道感染源頭關男主事，我就知佢必須要死了。一知道個女首歌原來係唱畀爸爸聽，我就知佢遲d一定會再唱一次。本來以為會係男主死緊(dying)個陣唱，既收煽情之效又可以圓個心願一路好走，點知冇係個陣唱，然後我又被劇情牽走忘了唱歌這回事。直到最後，二人穿越隧道步向釜山，我仍未思考到究竟可以點收科，結果原來首歌呢個時候先用，咁唔怪得男主dying 個陣都唔唱了。

7，這其實是一個仗義每多屠狗輩的故事。


8，睇個陣已經覺得男主好似趙永洪，大隻佬好似古明華，估唔到網上有好多人都有同感。

9，總結，好好睇，但我唔會再睇。


謎之時空

1，為左純純先至睇，純純演出恰如其分，但戲份其實唔多，而套戲係當觀眾戇鳩。

2，又要劇透。故事講(應該都成三十歲人既)男主穿越回到小學時期，阻止誘拐殺人案發生。即係好似柯南咁，小學生既身體藏住一個成年人既靈魂。但係男主既行為同小學生冇分別，驚個女仔被殺所以將佢收埋係空置既車上？仲要佢一個人係車上訓覺過夜？點解唔直接帶佢返自己屋企，要搞咁多野仲要唔係好work？

3，又點解身體係小學雞既男主要趁自己同疑兇獨處一車時揭發佢？呔盤係疑兇揸緊，佢車你去邊你冇得say no，而男主又小學雞軀體冇可能打贏疑兇逃走，所以男主就好順利咁畀疑兇車左去無人之境然後從高處掟左落河。唔抵可憐喎，自取滅亡，呢d鳩緊張情節。可能有人會話，日本人唔想長輩難過，所以就算踢爆佢都唔公開踢爆，等佢保留樽鹽。如果想子為父隱，係咪應該乾脆視而不見就算？私底下揭發長輩，係想佢自首定自動收手前事不追？前者既話咪一樣傷害左長輩樽鹽。三十歲人喇，頭腦清晰點好不好，雖然我知年紀同理智程度唔一定成正比，但一而再再而三咁表現到成個小學雞咁，咁既劇情實在零說服力，當觀眾白痴。


4，又點解男主畀人咁樣掟落河都冇死到？算了算了，小學雞時代的事我不計較了，但戇鳩劇情仍未終肯放過我。男主穿越回到18年後成人狀態，繼續保持戇鳩，佢畀人掟過落河都未識死，再次單挑長輩兇手，兇手本來想自盡，男主鳩英勇上前阻止結果死左。自作自受，又玩單挑，又係呢d鳩緊張劇情，男主一生皆為戇鳩所困，在戇鳩中度過，善哉善哉。

5，兇手行兇既理由，係想細路哥仲係純真潔淨冇機心(類似啦)既時候死去。唉又係呢d論調，睇到厭了。

6，男主既小學同學為左做正義朋友，所以長大左做左律師，18年來佢一直有跟進呢個未落網既誘拐殺人犯，而跟進既方法係剪報。除左剪報，佢冇追查亦冇做其他事，淨係剪報...咁樣就算係正義朋友...

7，劇情不合理既戲可以分兩種，一係寧要不通莫要平庸依然好睇，一係既不通又平庸到令人扯火。呢套係後者。不過有村架純還要演得恰如其分，好彩有佢頂住我先冇咁嬲，雖然佢戲份唔算多。條trailer 唔錯，厄得下人既。

8，成年人解決唔到既事，就搵藉口扮晒野咁交畀細路去做，好過分。香港何嘗唔係咁，搞唔掂政治就要學生黎背負重任。

今年我想同你去

喜愛的樂隊出了新tee
我要趕去入手新戰衣
左腳步出公司
右腳踏上的士
無奈去到已經沒有細size屎

我照樣課金當冇事
抱著tee聽自從看了太宰治
或許我老了不再un身un勢煞有介事
只是在意旁邊女仔涼鞋露腳趾

突然朋友吹雞食返支
我們在炎熱與憂鬱的夏天無法停止
Save me tonight please
Save me tonight please

Day 2 蒲甘

坐八半的飛機去蒲甘，安全起見六半出門，結果七點已經順利現身機場。飛機沒太多人坐，齊人就馬上關門，早左三個字起飛，吉位很多，我又是獨霸一行，好彩有飛機餐，快餓死了。

要畀25000k蒲甘景區費先可以離開機場，馬上跳上的士5000k，又火速抵達酒店攤係床hea，好順利。

Hea足兩粒鐘，一事無成，十二點出發，5000k租架ebike，胡亂自駕。原來酒店附近已經有佛塔，後來發現佛塔周圍都係多到唔睇。入佛塔範圍要赤腳，我本來以為除鞋就得，點知係連襪都要除。不過我本來就係踢拖，冇襪。當地人好嚴格，你著住拖鞋踩過一格磚佢都即刻叫你除鞋，反而我著短褲係冇人理(supposed no shorts)。

赤腳行，吉到飛起，d路又多碎石又硬，加埋猛烈太陽，辣到跳舞。本來求其見路就行，後來發現d人個個都行鋪左磚既地方，磚路就冇咁辣腳(好曬個陣都係辣)。

其實等自拍個十秒，腳底燃燒緊，度秒如年

蒲甘同我想像中好唔同，首先佛塔多到冇人理兼冇乜人睇，唔似吳哥窟咁遊客集中，守塔小弟話通常日出日落時間先多人。

其次呢度作為旅遊重鎮，但完全聞唔到商業味，我住娘烏，街燈沒一盞，街道都是黃土大地，連小鎮都稱唔上，頂多算小村。

雖然好難hea，但少遊客始終係好，耳根都清靜。為左kill time，我自拍，反正冇人，唔駛怕醜。


途中已經小炒左兩次，沙地一轉彎就訓低，車牌白考。去到一個無人之境，忽然有個12歲既細路踩單車黎sell我買佢畫既畫，佢既畫充滿童真，猶如幼稚園小朋友既作品，佢拎出黎個下我心諗哪來的自信... 同時又諗佢連咁樣既畫都要拎出黎賣，係咪代表佢已經窮途末路？between 口味獨特的我其實好想買晒黎做明信片，但又唔想佢沾沾，又要提防可能遲下又有呢d自信細路要應付，所以象徵式買一張算，臨走佢仲叫我take care，可能我停車個樣太柒掛，想不到他一語成讖。


前方有個守塔小弟，負責開鎖畀人睇佛像，我覺得返呢份工人生好無聊，係呢個不毛之地等遊客黎。不過好快我就覺得佢份工好有意義。

離開守塔小弟，我沿路駛向另一邊既佛塔，點知條路開始唔對路，巔跛地落斜，路也愈來愈窄，最後已變成兩塊田之間既小路。呢個時候掉頭都相當麻煩，唯有頂硬上繼續向前。無奈兩旁耕過既土地特別鬆軟，車一巔跛，條呔就陷入鬆軟土壤然後完美地炒車，整張凳連電箱全部飛晒出黎。


個下都冇諗自己有冇事，淨係心諗仆街了，係呢個不毛之地炒，我又唔識砌返架車，點搞(唯一好處係冇人見證我柒既一刻)。即刻走返轉頭搵唯一一個有可能出現係呢個不毛之地既人：守塔小弟! 先前去左咁多個塔都冇守塔人，唯獨呢度有，都算不幸中既大幸。但無奈佢唔識整返架車。其實架車結構好簡單，雖然我咁都唔識，但估唔到佢都唔識。啊。唯有請佢幫我打電話去車行搵救兵，好彩有佢，唔係真係好濕滯，我連自己係邊都唔知。


救兵黎到，砌返架車(但張凳爛左)拖返去大路畀返我揸，我估唔到佢仲敢畀我揸... 又或者反正架車都爛左咪畀我玩多陣...

救兵英勇的背影

我炒車個度雖然鳥不生蛋，但風景相當優美，箭咀指住個度就係我架車(既殘骸)。

大炒完都冇乜心情，步步為營，驚弓之鳥，本身行緊50km，而家急降到30，冇車大直路都繼續30，之後求其食個飯(屌又係咖喱，唔想再食了)就打道回府。後來先知食飯個度係old bagan，車行話由酒店揸過去七分鐘就到，我左磨右磨搞左成三個鐘。

摔壞了車凳，又賠了10000k。我小人之心諗，唔知佢會唔會照租架爛車畀下一個人，可能我揸個陣架車本身都爛。

又返房hea，去旅行就係要做平時唔會做既事，例如全天候攤係張床鳩揈揈。

晚餐係酒店附近覓食，呢度街燈都冇，得零星既餐廳，我係唯一客人。真係好唔似旅遊重鎮，仲頹過uyuni。


話左唔食咖喱，最後又揀左tomato tofu curry...不過唔係之前食開好油個隻咖喱，呢款幾好，豆腐仲竟然係玉子豆腐。

本來想係餐廳hea耐d，但瘋狂餵蚊，唯有極速食完返房洗腳。緬甸真係好難係街hea，係餐廳一係就烏蠅食你d餸，一係蚊食你，食慢少少都唔掂。

屌你嗎

我點會like小麗老母啊屌你，呢個時候suggests 我睇，傻撚左啊

其實唔係好明朋友點解會因為建制大勝而沮喪，因為我一直冇期望過建制能夠有幾墮馬。

只係家母平時都唔投票，今次為左踢走葉建源，順便投埋柯創盛。哎唷唷，我不爽。

我真正想屌，係羅37同屌麗都入局。不過冇乜人明白，佢地仲傷心緊建制大勝，唔通我同佢地講呢d。

Heidi chu左膠，但我其實幾鍾意佢，估唔到佢係票王，可能吸左好多新移民票，希望佢唔好再咁左膠。

游蕙楨都入到，又係估唔到，希望佢畀心機，而家仲未夠班。

最後又要講返界票論。D票本身唔係你，何來界。熱普城同所謂泛民同其他非建制，唔同路線，冇話唔投你就會投佢啊，自由意志揀射落海都得，唔好再講界票。

仲有配票。根本民調信唔過，非建制狗咬狗配票唔係咁易，雷動同掌心雷動邊個準d？分分鐘自己配錯票dum爆心口。再講，就算非建制守得住，都可能只係茍延殘喘，亦都可以禍港。既然預計唔到，不如跟隨個人本意投票，唔好再諗配票，投票本意就係投你想投那個，唔係保大局，何況保大局唔係咁保，棄選係咪有黑幕都要睇定d。

說穿了，畀得你玩呢個遊戲，就係因為搞個班人有勝算，唔係點會畀你玩。係好無力好黑暗嫁喇。啊，我咁講算唔算企左係高地？

利申：我冇投票，我唔岩。

Day 1 仰光

幾個月前突然被買機票，然後差點變獨遊，然後又確定變返二人同行，最後埋門一腳又變返獨遊，變變變變變，猶如佢家下黃色衫又變左著綠色衫。

本來真係冇mood到想改去日本，但過多幾日睇下緬甸blog，興致又返黎，身體非常誠實。

第一份工我將公司電腦桌面換成復活島，然後我就去了復活島; 第二同第三份份工我換成伊朗+緬甸，就去了伊朗; 第四份工我保持原裝xp綠草地(半公家電腦費事set到咁personal)。所以我深信我係會去到緬甸既(因果關係誤)，但xp綠草地應該唔會去。

四點機，一點半上機巴，以為自己好早時間綽綽有餘，到中途塞完車先拎張機票出黎望下，屌check in counter 起飛前一個鐘就關。呢個時候已經1440，仲係青嶼幹線收費區 (我架機1605飛)。咁都冇辦法，跳車又唔係，照計應該岩岩好趕到，趕唔到都係命運，於是我決定繼續訓覺。最後三點左右check in達陣。

機上，坐第二行，好少有得坐咁前，而且成排三張凳我獨佔，遲check in都有好處。空少基味好濃，講announcement 把聲好溫柔，私底下講野(我坐得好近佢地，聽到晒)語氣好似我一位朋友，佢同空姐好多野講好好傾，連個格都似我個位朋友，真係令我倍感親切。

坐得前，順理成章排頭位落機同入境，迅速搭的士出市區，8000k，45分鐘，好順利。

落街食個飯。酒店附近有kfc，kfc係當地似乎係高檔野，門口有兩個職員負責幫客人開門，樓底又高。呢度竟然都有亞坤，仲有百盛。

求其去左附近食traditional Myanmar food，即係咖喱。味道就是普通咖喱味。

咖喱牛，有湯有菜有飯有茶有廁紙有牙籤，4000k

話說就黎食完飯，服務員畀左杯茶我，同時擺低呢盒野，我諗呢盒野應該係丟落茶好似糖咁掛，東南亞，中東，南美人最鍾意甜。


丟左落茶之後我見到企係咖喱櫃個班少女職員係咁望住我微笑。之後佢地同另一個識英文既服務員講左d野，然後個英文服務員就黎同我講，個粒野就咁食，唔駛擺落茶。媽，好柒。