山口百惠自傳，關於莉莉周的一切，啪上雲霄

山口百惠：

- 其實兩個月前已看完，只是一直忘了寫。早陣子愛上中森明菜，剛巧家母執櫃拿了她珍藏的這本陳年老書出來。百惠是明菜的偶像，我愛屋及烏也就揭一下，結果出乎意料的好看。


- 成書時百惠才21歲，內容完全不像21歲少女的所思所想，不只成熟還有點看透世事的出世感。


- 其實她不算靚女，身材也很一般，但當年依然紅到發紫。閱畢此書，我馬上明白箇中因由，她的敢愛敢恨敢急流勇退敢歸隱收山敢真係到而家都唔復出講得出做得到，令人沒法不愛她。明菜真係有品味。


- 文筆唔錯，寫得好也譯得好。


- 書裡好多泳衣寫真照，尺度好大仲大特寫，我係地鐵睇好尷尬。原來當年尺度咁大，飛晒釘又咁少布既相都可以出街。



充滿古早味，封底還有廣告



關於莉莉周的一切

- 就是岩井俊二青春電幻物語的小說版。


- 開首是forum格式，看下去感覺像追post，但問題是我平日上高登也不會每個post每個回覆都看啦，中間夾雜太多無謂野。這書也一樣，很多forum式的無謂野，所以我飛晒，飛了超過一半。雖然如此，剩下來的部分其實挺好看。


- 看封面看戲名我還以為是青春純情回憶小故事，青蔥草地綠油油，豈料事情發展竟然灰暗殘酷無助醜陋不堪。日本青少年問題存在多年，至今仍未改善，其實也不只是日本，想來我能順利度過學生生涯也真的值得感恩。


- 從劇照看來，大概電影會比書吸引，有一大片的草地，又有初出道的蒼井優，又有意境。但很多comment 說劇情太沉重，不願再看第二次，我睇書都覺得沉重，所以不睇戲了。





啪上雲霄

- 澳洲瘋狂喜劇，用誇張爆笑手法描寫幾個關於特殊性癖的小故事，雖屬三級但樂而不淫，好好笑而且富教育意義，讓大家知道有性癖並非正常，很多人也會有，而且是各種意想不到的性癖，所以不必感到尷尬。


- 其實西人也很忌諱性癖，不是想像中開放。


- 坦白還是比較好


- 原來初來報到自我介紹時要講明自己犯過甚麼罪


- 順手帶出對種族歧視矯枉過正的問題


- 看不出結局有何喻意，難道只為故事完整才這樣拍？

美心西餅提倡食狗肉。

美心西餅提倡食狗肉。

先週勉強是嗎腥的說ta。

成個星期冇溫書，又懶又累，好眼訓。


雖然咁多年黎都係咁過，但而家真係一年熱過一年，我其實都想做家裡日日開冷氣既港豬，我唔涼就唔能夠心靜，心靜自然涼個因果關係根本就錯，應該係涼自然心靜。

馬蹄爽爽 <3

消失多年既馬蹄爽，今日終於畀我搵到。天空忽然放晴，麥明詩突然疑似淚奔，馮敬恩拍拖都變新聞，人生真係好似一盒朱古力Forrest Gump英明。


又唔甜又清爽，一大堆咬落sharp sharp聲既馬蹄，真係好飲到舌頭懷孕。上楊協成網站一睇，發現雞乸咁大幅馬蹄爽圖，或許此物已經重出江湖。


我巧感動，七日不見馬蹄爽如隔一週，仲有邊度有得買，報料我給你十蚊。


真係好撚好開心
嘻嘻

單身動物園，非常盜1，sing street

單身動物園

1，近期最好看的戲，將荒唐事實推到極致放大來玩，有意思。

2，結果還是落入了戀人之間必須有共通點的條件，但也似乎可解作想更接近對方，真心願意患難與共，在戀愛中有所覺悟了。

3，靚女(原來係導演老婆)，黑絲，磨j，唔畀射，媽好狠心好變態啊。人類真係好鍾意做變態野睇人仆街。

4，反對黨大家姐好老屎忽，自己冇拖拍係度指手劃腳，係情侶去死去死團永遠榮譽會長。

5，全套戲只有主角有角色名，其他角色全部冇名，有趣

非常盜1

1，因為可能會去看2，所以我睇返1係講乜。

2，娛樂性豐富，節奏明快，所以件事有破綻你都load唔切要睇完先得閒問點解，呢方面同寒戰1一樣。

3，亦因為咁，即使充滿破綻都唔算唔好睇。

4，不過我中段都睇到訓左一陣。

Sing street

1，好睇過begin again，青春就係咁焦頭爛額

2，字幕翻譯係邁克

3，初戀無限jam呢個名真係譯得好差，娘屎，毫不吸引。應該唔關邁克事。

我正式宣佈大坑祥勝是我的canteen

- 每次去完長途旅行，必定要去兩個地方解鄉愁：南山邨雄記，大坑祥勝。前者之前已經寫過，今次說後者。

講開又係時候去一去雄記

- 每次去大坑也像得了選擇困難症，炳記豬扒順興滑蛋祥勝百搭(其實康記粥也想吃但誘惑太多總沒吃到無奈現在店已結業)(現在康記又重開了但我仍然未吃到)，嗚啊，全部很想要。終於有次旅行回來，極度渴求港式食物，去到大坑心諗why not both？於是先去炳記吃個豬扒麵，然後馬上毅然衝入祥勝食四寶方包。我夠大食，輕鬆食晒，簡直係至高無上既享受，邊吃邊覺得自己頭頂長滿了花花，是幸福的味道啊，好想每食一啖都呻吟一聲啊…啊...啊...


- 第一次去祥勝是2009年，那時在附近返工，同事大讚祥勝的豬扒巧巧食，我吃過幾次，的確好食，吉列豬扒和牛扒都正正子(不過還是豬比牛正)，可是也就只吃過幾次，因為那時乖巧的我習慣帶飯。

祥勝百搭飯

祥勝百搭飯/四寶方包

- 雖然好吃，但這幾年來也只是一年吃個幾次，每次也只吃百搭飯(午餐)/四寶方包(早餐/茶餐)。百搭飯就是豬扒餐腸蛋飯，四寶方包就是豬扒餐腸蛋方包，全部煎得香脆，將蛋轉做太陽蛋，叉爆佢d蛋汁，與豉油一起撈飯，將港式豉油西餐的滋味推到極致。因為一直覺得這鎮店之寶想必是全店最好吃的東西，所以我從沒想過吃其他餐。

蔥油百搭飯

生煎土魷肉餅飯

- 直到數月前心癮發作和v去吃，我如常點了百搭飯，他則見鄰座食客的蔥油土魷煎肉餅飯賣相可口，跟風要一份，結果出乎意料地比賣相再好吃十倍，咀嚼一刻充滿驚喜！香脆的煎邊，好狠彈牙的肉，我感受到肉隨著我狠狠的嚼在狠狠的彈，彷如廚房大哥剁肉的頻率。如果這肉餅要跟櫻木花道比彈跳力，櫻木大概也只能大吼"混帳我竟輸了給一塊肉餅！"從此，我欲罷不能，開始經常去祥勝，實在相逢恨晚啊。

土魷煎肉餅飯扣底, 完美金黃色

- 清明節那周末，我連續三日祥勝；剛過去的周末又二連發進擊，除了堂食還要了外賣，留待第二天帶飯。飯量一如所料的多，堆到山咁高，可以分兩餐食，即是連續四日都食祥勝！我竟然能連續四日食到我朝思暮想的祥勝，好感動，一定是我前世積福夠多，今世才能連續四日食祥勝啊。

蒜蓉揚州炒飯, 一盒等於兩餐份量

蔥油

- 講飯之前不得不提蔥油。蔥油的助攻，令整碟飯更上一層樓。煎洋蔥和蔥跟祥勝的菜色出奇地夾，令飯少一分dry，自從發現有加蔥油這個玩法後，蔥油百搭飯正式全面取代百搭飯在我心中的地位。雖然蔥油很油膩，但我還聽過有"多蔥少油"的玩法。

鋪天蓋地的蔥油

好有厚度的蔥油(和肉餅), 堆到山咁高既格局, 完美地令你對碟飯無從入手, 點樣可以食到下面D飯而唔令上面D餸跌落黎? 要搵層層疊高手解答

生煎梅菜肉餅飯

- 梅菜肉餅和土魷肉餅可謂一柔一剛，前者鬆化，後者彈牙。半肥瘦豬肉裡夾雜一條條梅菜，剛好中和肥膩感。一想到師傅為食客又剁又撻費盡工夫做肉餅，就覺得很感動，呢挺餸真係食手工。

食緊既煎肉餅飯

吉列魚柳飯

- 第一次吃這飯時正值午飯的繁忙時段，魚即炸，熱到辣口，又脆又滑，好想叫英國人來品味這真正的炸魚，保證讓他們那死去的味蕾瞬間復活。不過魚柳飯最好加蔥油，否則太dry。第二次於午市尾聲近兩點才吃，魚柳雖然還是很熱很滑，但不夠脆，所以要吃這飯，時段也相當重要。

蔥油魚柳飯扣底1

蔥油魚柳飯扣底2，扣完底都仲好大碟

鮮茄吉列豬扒炒公仔麵

- 炒粉麵最緊要夠熱夠鑊氣，祥勝奉行即叫即炒，麵底有信心保證; 鮮茄汁真的有大量大鮮茄，並非隨便亂溝一堆橙色假茄汁; 吉列豬扒一如既往的大塊，但淋了茄汁少了點香脆，或者我下次試下麻煩地叫另上。

大量蕃茄

又係玩層層疊既時候

炒貴刁

蒜蓉揚州炒飯，究竟阿姐係點樣塞咁多飯入個盒

- 又係時候睇餐牌(人家特登影低左個餐牌，就係為左得閒就拎出黎J，嘻嘻)，諗定下次食乜好。做個只管口腹之慾的戇鳩港女真好，暴食爭普選YEAH

食到痴左線暨唔想儲相，up左係度當save 左

殿大喜屋 黑毛豬柳煙肉卷

外層香脆煙肉，內層入口即溶豬腩肉，鹹香迸發而出，齒頰留香。






車品品老闆娘很樂業，總是笑咪咪，彈跳步，說話輕柔像風鈴(沒誇張)，讚店裡東西好吃她會超開心超興奮，邊吃翅邊望著她感覺很愉快(和很變態)。在香港能工作得這麼快樂真難得。而且這兒有茅廁，我很喜歡。

艾蜜莉之東京未婚妻, 艾蜜莉的日本求生記

睇左東京未婚妻原著小說，feel到電影應該改左好多。
小說好普通，去富士山又唔係為左尋找自己，佢純粹去行山。


本書似講兩條友拍拖去街回憶錄，多過想講文化差異。有評論話套戲中段有d失焦，呢個都係我睇書時既感覺。


其實睇東京未婚妻前仲唔小心睇左作者另一本書：日本求生記，因為我搞錯左以為呢本就係東京未婚妻，個日又忽然落狗屎，搞到我被困圖書館，於是成本睇晒。呢本講佢係東京返工既事，唔好睇，好長氣，我飛住黎睇。


我捱完一本竟然都仲有心機睇埋本東京未婚妻，好彩呢本好睇d，雖然都唔算好好睇。


唔好睇係關作者事定關翻譯事？
兩本書唔同人翻譯，應該關作者事。兩本既共通點係敍事之中加插大量作者天馬行空既幻想，就係呢d幻想枝節篇幅太多，搞到情節推進拖沓。(但朋友話電影將佢呢d戇鳩幻想呈現得幾好)


本來未婚妻呢個題材應該可以好搞笑好意想不到，但可能佢係當半自傳咁寫，所以較平實。


甚至佢東京打工，畀人叫左去洗廁所，呢件睇落好匪夷所思好荒謬既事，處於一本自傳裡面都即刻少左趣味，因為事件都只能忠於事實地平淡落幕。

令人想起情書的お元気ですか

決定放棄東京未婚妻電影，打算睇迷失東京，如果我的得起心肝既話。Scarlett Johansson！

唔駛$4000馬爾代夫之旅 Day 5 新加坡：牛車水

凌晨四點幾到新加坡，比預定早，虎航於準時方面真不錯，有早冇遲。

我同v都係第二次黎新加坡先發現呢個國家好多戇鳩位。


1，地鐵售票機，車資五蚊以下只收散銀，六蚊以上先收十蚊紙，但冇寫到車資5-6蚊可以畀乜。我地兩張成人飛去牛車水，車費5.2，實驗證明唔收十蚊紙。唔夠散銀又要去counter兌，counter又不售票，於是又要返去售票機買飛。好彩晨早流流唔駛排隊。

搭0531第一班地鐵去牛車水。地鐵車廂也是智障，每九個座位就有三個關愛座，多到反智，簡直關愛滿瀉，人們都不管那是甚麼座位，照坐如儀。


38分鐘車程就到，天還未亮，Maxwell熟食中心已經有店家開門了。吃著真真粥品，大碗，好味，足料又便宜，三蚊幾坡紙，Size揀細碗都超大碗，有魚有雞有皮蛋，還另加了雞蛋，香港很少可以加雞蛋。粥是杰的，吃完好飽，很滿足，我一向喜歡吃粥，這碗我很滿意。

蔗汁還是當年的價錢，一蚊杯，透心涼，又沒有過多的糖。


七點未夠，天天海南雞飯的店員已來準備，要搞三個半鐘才能開舖，做飲食業真是辛苦錢。

天亮了

疑似公屋

在牛車水街市發現

卵巢護理

昨晚在機上沒睡好，V今晚又長途機飛瑞士轉機去華沙，所以他非常渴求一張床。我們孤男寡女去找時鐘酒店，牛車水果然乜都有，輕鬆找到，住一日抵玩過住四個鐘，乾脆租一天。但COUNTER阿哥將我們房的CHECK OUT時間寫為11PM，因為多口的V跟人說了自己夜晚十一點機，都叫左佢咪講咁多廢話，雖然都冇所謂，反正我地唔會咁夜先走。

外表睇唔出，COUNTER都睇唔出，一打開房門先睇得出間野好頹，好似幾年前仲係終極窮撚學生去大陸旅行時住既招待所，雖然間房有冷氣已經萬幸，但一點也不涼；有浴室，但冇廁所，我寧願要廁所，屙尿緊要過沖涼。呢個賣相已經SUPERIOR　DOUBLE ROOM，唔知STANDARD係點樣？

訓左四個鐘，發左個夢中夢，inception，主要內容係講我係呢間房一訓醒就發現幾乎全部野畀人偷晒，著緊既衫褲都冇埋，要裸跑逃亡(雖然唔明點解畀人偷左野要逃亡)，逃亡中途醒左，原來係個夢，環顧房間四周，屌那星，同夢境一樣畀人偷野，又冇著衫，於是裸跑逃亡，依然唔明點解畀人偷左野要逃亡，逃亡中途又醒左，仲訓緊係呢間頹房，熱到成身出晒汗，不過有著衫，財物都係晒度，我終於返黎現實。現實係，一張開眼就見到牆上有甲由。

落街，飲碗廿四味，行下牛車水，行左幾條街都唔見有兌換店，或者係我智障搵唔到，但照計呢d遊客區，兌換店應該隨處可見先係。有件事，真智障，有間旅行社，門口寫到明係有錢幣兌換，入到去職員一臉茫然話呢度唔兌錢，哦。最後去maxwell求其搵間雜貨店兌，雖然不是甚麼好價，但老闆娘好熱情，是但，照兌，我費事再搵，我冇時間，又同老闆娘買左袋花占餅，好耐冇食過。

作為港豬，去旅行都不外乎飲飲食食，繼續進擊maxwell。天天海南雞飯，鴨肉飯，咖啡，蔗汁，又平又好味，真係令人懷念，當年新加坡之行最鍾意就係呢個熟食中心。

排前面的人汗流浹背

另一大愛係松發肉骨茶，去到剛好午餐時間，排左一陣隊。v用普通話落單，阿姐回應"講得咁辛苦講返廣府話啦"。

肉骨茶極重胡椒味，爽歪歪；首嘗魚片湯，其實即係肉骨茶舊排骨變左魚片，魚片份量極多；油炸鬼唔脆，唔知係特色定擺太耐；馬蹄水飲落喉嚨好舒服。另外買左成盒肉骨茶粉返屋企慢用，嘻嘻。


食完就係分別既時候，自私的v自己去波羅個海，我獨自回港。我都想去波羅個海。

機場買煙超抵屌, 3x坡紙一大盒, 一大盒=十小盒, 即係廿雞港紙一盒啊

五日旅程匆匆過，為了哀自己又返黎做港豬，打算係香港機場食大力水手炸雞，點知出左閘先發現新舖搬左入禁區，算了。期望下次旅程吧，那可是本年最值得期待最不能預計的旅行啊

返到屋企先發現大背囊條帶唔知幾時斷左一截, 明明今次冇寄倉, 諗唔通佢係幾時爛點樣爛.