[三省吾身系列] 警惕自己唔好係咁。

等等等等我鳩up到開場。

第一次電影節睇戲，買左個閪時間，成夜晚九點九，大會堂，好夜，等極都仲係好早。


七點收工，慢慢食完個飯先七點九，又暴雨冇地方好hea，搭地鐵睇書，丫又咁岩睇到尾聲話咁快睇完左，去到中環先八點四。



係地鐵站搵下有冇書店，悶到想買本書黎睇，點知得個d譚木匠tony moly。



上地面，原來已經停左雨，舊立法會有人影結婚相，我企係度睇和平紀念碑，成個遊客咁。轉身發現好多銀行大樓，我發現自己雖然耐唔耐會黎附近，但已經好耐冇黎過呢邊，用呢個角度睇樓。對上一次好似係朋友大學畢業，係個時仲係立法會大樓既立法會大樓影相。


再上一次有記憶既，我淨係諗到中三仲做緊童軍個陣，做一個project，要影幾個著名中環地標，以前叫康樂大廈既怡和大廈之類。


再向海行，摩天輪好刺眼，雲霧太多，睇唔到ifc個鳩頭，對岸icc得返凱旋門咁高。望返近d，海皮堆帳幕好似邪惡組織秘密基地。


再望返中環d樓，棟棟都邪到出汁，真係好似黑暗組織總部。而事實上商業野確實係好黑暗，毫無懸念。







都已經呢d時間，依然有好多西裝友走過。我成個遊客咁百無聊賴影影相。大會堂前個吉地無啦啦有一個裸體銅像，好奇怪。有d聯想剎那間唔知點形容。

我真係恭喜你呀

- 浪子般的朋友結婚了，婚禮上大家都覺得一切很不真實，因為他竟然要做人夫了。

- 因為本人貪玩兼朋友結婚，又因為本人另一友人貪玩想玩我塊面，所以我破天荒(被)化妝了

- 新郎哥似乎很開心，拍照時他跟老婆說：呢個係xx呀，佢讀咁耐大學都冇化過妝但係佢今日化左呀 (雖然佢覺得我對眼化得好兇狠)

- 散席時於門口碰上新郎哥及他的一眾兄弟，新郎哥對兄弟們說：呢個係xx呀，佢讀咁耐大學都冇化過妝但係佢今日化左呀

- 兄弟說：佢個禮封畫得好靚，你記得睇

- 後來新郎哥表示不太捨得拆我個禮封

- 我真係恭喜你呀

- 新郎哥剛表示其實佢見到我化妝真係好感動, 如果可以佢想開咪講

- 哈哈, 開心就好啊

吶喊

每句屌你老母都是絕望的吶喊，只有無計可施時才會說這種空詛咒。

屌你老母
高你老母
鐵你老母

人微言輕

這年代，不要斷定自己人微言輕，在fb出個status可能都會被瘋狂share，推上報，向政府施一點點壓。例如醫護人員感嘆急症室冇床位一事，這位朋友，功德無量。

撩事鬥非系列：c君，軍佬，的士哥，電器舖店員

雖然好無聊，但想記低。嘻嘻嘻。

==============

放題，叫了二十塊燒菠蘿，貌似c君的服務員問我們是否真的要二十塊

我：係啊，一啖都食左一舊啦

C君：(笑)應該都要兩啖

菠蘿來了，我十舊，朋友十舊。我食完，c君來收碟。

我：睇下，我食晒喇

c君：(指著朋友)但佢未食晒喎

後來我去了拉屎(不是肚瀉或肚痛)，回來朋友說剛才c君問我是否去了扣喉。哈哈。

埋單，我畀銀聯，c君話唔收銀聯。

我：(指住隔離檯個椅套)個度寫住歡迎使用銀聯喎

c君：嗰個假架

我：哈？我冇錢喎

朋友：留低洗碗啦

c君：暫時冇空缺喎

我：我可以幫手燒菠蘿，其實幾好味

c君：係好味，但好少有人嗌二十個...

眾笑。

完！

=================

飯聚，餐廳有個服務員外型似街頭霸王個軍佬。我那面皮厚得不知廉恥既朋友即場施展無恥技撩軍佬講野 (雖然結果無恥的好像變成我)。

朋友：(指我) 佢話你好似軍佬

我：係啊，你好似軍佬

軍佬：(保持冇表情) 我有玩開cosplay

我：你cos乜？cos軍佬？有冇相？

軍佬：(保持冇表情) 返緊工唔係咁方便既

朋友：(使出能力加成) 畀我地睇下啦，我地好想睇呀，睇一睇丫

過左一陣，軍佬主動走過黎我身邊，遞上手機，畀我(唔知點解淨係畀我睇...)睇佢cosplay 相

我：wow~你cos邊個？認唔到...

軍佬：(保持冇表情) ...... (佢講左d野，但環境太嘈，我聽唔清楚，好似聽到佢話cos軍佬)

我：啊？你真係cos軍佬呀？(佢既服務員樣同cos樣太似... 都係軍佬咁樣，佢cos緊我都以為佢做緊自己)

朋友：(繼續能力加成) 望過黎丫，幫你地合照丫

軍佬：(保持冇表情) 唔好喇，畀人見到唔好

軍佬走了。

良久，軍佬又來我身邊兼繼續無視我朋友。

軍佬：(保持冇表情) 今年動漫節都會出cos，你黎會見到我

我：(唔好意思呢件事太耐以前了，我唔記得左自己當時講左乜)

(真是個外冷內熱的軍佬啊。)

完！

=====================

難得富貴搭的士。司機大哥在播老歌，我竟首首都識(而且有我細個好鍾意但近年好耐冇聽過既摘星的晚上(李國祥))，跟著旋律用走音的方式吟唱，並跟v評論起九十年代的歌曲。司機大佬冇搭嘴，但我見到佢嘴角微微向上彎。

到達目的地，我邊畀錢邊拎袋好頻能，司機大佬柔情地叫我唔駛急慢慢黎，仲round down零頭而非round up！我覺得佢一定係覺得我係識貨之人，所以對我好柔情好容忍！

我：你播d歌好好聽！

司機大佬：多謝~嘻嘻~

完！

===========

於電器舖買電話，店員幫我將舊機data過落新機。店外有大媽唱老歌賣藝，大部分歌我都識。我閒著無聊，又厚顏無恥地跟著吟唱。

後來一枚大叔出場取代個大媽，大叔接連唱出多首尹光。我興奮，變本加厲，每首歌intro響起就騷擾身旁的v。

我：數毛毛呀！

V：唔識

我：爆金爛呀！

V：乜黎

我：雪姑七友呀！哎呀點解唔唱鹹濕版呀！

店員忍不住：點解你首首都識...

完！

關於亞視

曾經，我差點就成了亞視員工。那年亞視請了我，我很心動，明明當時還有其他公司向我招手，人工較高，工時較穩定，公司知名度不亞於亞視，上班地點也較近我家，又沒那麼親共，我卻竟然仍會為亞視動心。事有蹺蹊。

亞視大樓大堂很新，不過上樓就發現裝修老舊，都是歲月的痕跡，大概只有大堂有幸得到翻新資金。雖然我見工那個office 有點舊，但空間很大，可以用空曠來形容(或許因為員工已不多)，其實這也沒甚麼不好，沒那麼壓迫，更舒服。

整個見工過程很愉快，很輕鬆，跟導演東拉西扯亂聊一通，看他連面對我這應徵者也粗口無誤(一般adverb用途，非罵人)，我也毫無戒心大解放，然後他說：會講粗口，正喎。他也老實說，份工得閒個陣好得閒，忙個陣忙到星期一至日都要返，人工不高，他曾問下屬，怎不轉工，得到的回覆是：唔知啊。結果一年又一年，就這樣做了好幾年。

筆試也是隨心，寫甚麼都可以。或許之前聊開了，我寫的很順心，行雲流水，迅速交稿。導演邊讀邊大笑，笑到gap gap聲個隻。然後稿傳到另一人手上，我隔著partition都聽到"掂~喎" "得~喎"。我沒有讚自己寫得如何的意圖，那刻我覺得受人認同，得到尊重，同時心諗，呢間乜公司黎，可以casual到當係自己屋企咁，大聲講大聲笑，直腸直肚冇陰謀，人少但充滿元氣，滿載了歡欣，正喎，掂喎，得喎。

這個"掂喎得喎"的人來in我，劈頭就讚"你文筆好好喎!" 然後老實又無奈地表示人工未必符合我預期，但會為我爭取。

一兩天後他傳來捷報，成功爭取提高人工，但仍跟我要求待遇有點距離。後來拒絕offer時我也覺得很抱歉，像辜負了別人的賞識。

光是見工的一瞬，已教我如此一個外人愛上亞視內部的氣氛，感覺到職員間都friend底一家親(甚至連保安也很熱心，當日見完工打算等廠巴出大埔，保安竟說下班車要等半小時，還乾脆教我行去搭小巴便利許多)，更以人係生制度係死為方針。真的令人心動。

所以亞視直到最後一刻仍有員工堅守崗位，欠薪也願仆心仆命，我覺得有著戇鳩奴性重以外的原因。香港地，多少公司能做到家的感覺？一  定  唔  係  大  台  囉。

永遠懷念亞視給過我的快樂時光。包青天，再見艷陽天，穆桂英，肥貓正傳，縱橫四海，影城大亨，百萬富翁，少年英雄方世玉，還珠格格，庶務二課，同班同學(日本動畫，主角名豆豆和勇之助)，怪盜st tail，紅頭巾cha cha，小甜甜，亂馬1/2，蠟筆小新，天地無用，魔劍美神，魔法騎士，近所物語，遊戲王，最遊記，金田一...

當年亞視買動畫真的很有眼光...還有很多我都沒看
新世紀福音戰士，地獄老師，北斗之拳，怪醫秦博士(我堅持他不叫黑傑克)，男兒當入樽，鬼太郎，星河滿月，不思議遊戲，頭文字d，海賊王，生肖奇緣...

(點解呢篇文結尾會變左數動畫...)

敬重敬業的人，衷心祝福亞視員工，你們會有善報的

雄記粉麵 南山邨

1，每次長旅行總有想念香港美食的時候，回港後定必去幾間食肆解鄉愁，其中一間，是南山邨雄記。

今日只要了四款淨餸，冇要麵底，睇落唔夠豐富

(後補圖) 呢次要左八淨餸, 山咁高, 開心

2，雄記賣車仔麵，於我而言這裡有四寶：柚皮，辣醬，雞翼尖，湯碗。坊間已經很少車仔麵店賣柚皮，買少見少，因為工序繁複：浸水換水出水重複幾次再煲到林，如此大費周章還只是賣幾蚊，沒人願意弄也可以理解，但雄記還有，還在堅持做著這工夫菜。值得欣賞，值得支持。


3，(應該是沙嗲辣醬的)辣醬：自家製的味道，不完全是沙嗲醬，說它是辣醬又太片面，總之很複雜。雖然吱出來那刻感覺總像柯爛屎，呠一聲迸發而出，但吃起來的快感也如同柯清爛屎般舒暢。這(應該是沙嗲醬的)辣醬，有著君臨天下的姿態，令那大大碗的車仔麵更上一層樓，辣得刺激，辣得過癮。每次我除了將(應該是沙嗲醬的)辣醬噴進湯裡拌勻，還得另外向湯匙再一大噴，用來直接食。

((應該是沙嗲醬的)辣醬(啡色)放在檔口右邊，開瓶器旁，其他桌上的辣醬(橙紅色)是純正辣醬)


4，咖喱翼尖：從來覺得食翼尖好傻豬，吮骨頭咁，何不乾脆吃雞翼。直到朋友高度表揚雄記的翼尖，我才破天荒一嚐處女翼尖。一啜一妹之間，翼尖立馬骨皮分離，即溶於口，連我此等不擅lun骨的廢青也能將雞骨妹乾妹淨，根本連牙也用不上。那次處女翼尖帶給我極大的震撼，原來翼尖是炆到咁林咁入味咁不需要咀嚼的，原來妹下妹下是這麼有樂趣的。此後，我試過其他店的翼尖，卻也找不到雄記的感覺，我才知道我一食就食左最好味既翼尖。

對我來說已經算妹得好乾淨...

5，湯碗：雖然吃麵不會連碗吃，但要吃車仔麵就不能無碗，所以碗非常重要。雄記的碗上全都刻了個蒼勁有力的雄字，不是寫上去，是刻上去，筷子筒亦用人手拮出了雄記。連對待食器也如此一思不茍，難怪東西這麼好吃。

連碗仔都有刻字

6，今日我使出了笨柒技，付賬時五毛於指間漏出飛墮地上，老闆(一個男人，應該係老闆黎掛，我從沒確認過)豪邁說"唔好執喇五毫子，由得佢啦。" 不拘小節，爽快直率，我深信豪邁的碗上雄字，奔放的爛屎辣醬，統統出自他的手。



7，食過好多次，但我從沒認真研究過每款餸賣幾錢，因為無論怎樣吃也只是廿幾三十幾，早前朋友六餸連玻璃樽裝汽水也不過三十幾蚊，真正平靚正，米芝蓮懂甚麼。

明報咁樣樣。我都係個句，選舉係有競爭有輸贏，唔係唔投a就一定會投b，唔好再講鎅票。

立法會議員、民主黨主席劉慧卿今早出席DBC數碼電台節目《早晨八達通》，談論新界東補選、高鐵會議佔領主席台、版權條例修訂案等議題。

《明報》報導劉慧卿於節目中指民主黨不怕9月的立法會選舉被本土派「鎅票」，並引述一句「鎅咩票，啲票喺我度，我相信大部分人都反對暴力」，引起網絡熱議。

（更新︰《明報》已更正報導，並向民主黨、劉慧卿及讀者致歉。）

http://hk.thenewslens.com/post/291310/