迷幻列車1&2，愛到世界盡頭，救殭清道夫

迷幻列車T1

1，一班好迷失既後生仔，鳩揈揈，叛逆，凡事問why not，睇落好岩，型喎，墮落咪墮落囉，choose life丫嘛，點解要局限自己？後生雷雷，大把可能性啦。

2，成班廢青好型，墮落得黎好型，即使廿年後既今日睇返，都唔老套，呢班人簡直廢青中既典範。

3，diane好靚女

4，呢套野簡直係鼓吹吸毒，吸到班人咁型，又有女可以溝

5，笑位幾好笑，瀨屎玩屎係old school，但好笑

6，結尾Mark踏著輕快腳步離開，世界咁大，出到去大把世界，青春就是用來揮霍



迷幻列車T2

1，「型」係一樣關乎「潮」既野，如果廿年後呢班中坑仲係咁型，咁叫而家既後生仔如何自處？但廿年前班人咁型，如果廿年後唔撚型，崩壞左，又好似叫人好難接受，但如果唔型，咁仲係迷幻列車？唔型既迷幻列車，同樣教人難受...

2，出乎意料，T2同T1與其話係上下集，更似係兩個故事，而呢兩個故事又有少少關聯，但就算冇睇上集亦無不可。兩齣戲既人物同故事背景都有承襲上集，但拍出黎卻係完全唔同既戲種，風格迴異，實在犀飛利。

3，T1講既係可能性不被限制，拒絕被世俗定義，結果黎到T2，已經冇野可以定義呢班中佬，因為 you are nothing。T1講Choose life時係一段VO，講完一輪最後其實wfc，有海洛英駛乜choose life姐，用輕挑態度面對choose life；去到T2，choose life由mark把口講出，想鬧醒後生女，好沉重。

4，迷幻半生，中佬們來到四十歲，有種中年既迷失，想重拾青春，但無奈已非十八廿二，呢班甚麼都不是既中佬無限唏噓，佢地唯一剩下既可能性，係折墮兜茂的可能性。

5，mark同sickboy成日圍埋就係想當年，講只有佢地年紀先明既笑話，回味從前光輝歲月，係車上一講當年，成架車直情識發光，佢地仍然活係過去，呢個係整個時代既迷失。呢班佬成長於九十年代，偏偏成個九十年代都係興返七、八十年代既野，九十年代本身冇乜代表性，只係成日主張要突破框框，但結果搵唔到要乜，只知道唔要乜野，於是廿年後既今日，若然要懷緬九十年代，其實係冇乜野可以拎出黎懷念，就同九十年代成長既呢班佬一樣。

6，於是中佬去左做件本質上好唔型既事：跑步減肥，注意健康重視運動呢種行為非常之咁中年，已經唔再好似後生時咁乜都唔理玩左先算，而家要為年輕既揮霍埋單，將唔健康既生活撥亂反正。雖然我覺得mark跑上山頂依然係型既，但呢件事既出發點同本質係非常之唔撚型。

7，呢個故事相當警世，話畀你知人生唔係真係咁浪漫，人生唔係你諗到咁多可能性。型到盡頭便是柒，你要為後生既型所帶黎既後果負責。但兜茂之中又會話你知其實仲有轉機，可能你會好似薯嘜咁發掘到其他潛能，或者mark咁回到最初的起點再出發。但結論都係你必須醒覺，好似franco咁執迷不悟係沒有好結果，人生亦冇進步。

8，diane老左殘左好多，正正經經返工實在唔撚型，鳩揈揈廿年反而頹得黎仲係有浸型味滲出黎。

9，愛丁堡好似廿年都冇乜變，仲拍到個味道，香港的話很難了。

10，廿年前既鋌而走險係走粉，而家既鋌而走險係寫proposal搲funding。廿年前係刺激叛逆突破框框，而家係社會失敗者。



愛到世界盡頭

雖然明白套戲係講溝通，但全程淨係見到成家人不停鬧交同發癲，劇情又冇乜推退，實在好悶。


救殭清道夫

1, 睇得出好有心去拍, 懷緬當年殭屍片之餘, 亦暗示呢類片種青黃不接, 但換個形式包裝後同樣可以繼續發光發亮.

2, 不過太多野想講, 得愛情主線較深入, 其他例如師徒情, 打殭屍, 打BOSS都簡單帶過唔夠喉.

3, 我入場係為左支持港產, 支持TONICK, 第一次聽到主題曲長相廝守, 係新世紀UA睇其他戲等開場個陣個場狂播, 個陣唔知係乜歌, 只覺得幾好聽幾上腦, 後來睇《燃燒吧我們的小宇宙》演唱會, 先知原來套戲係TONICK恆仔執導, 個首好上腦既歌係TONICK, 所以入場都期望會聽返首歌, 但係PLUG個位好怪同好短, 竟然唔係小夏消失個陣PLUG?

4, 林明禎幾可愛, BABYJOHN麻麻地.

5, 節奏明快, 都算好睇, 但故事好大路, 冇乜驚喜.

6, 曾志偉都真係好支持新導演, 呢個行為相當值得尊重.

7, 我曾經介紹人睇, 對方竟然一聽見係殭屍+愛情, 就話「即係Twilight啦」, 然後馬上將套戲當正係Twilight, 即使我講左好多套戲同Twilight既分別, 帶出既訊息又唔同, 佢都一句車埋黎「咁係咪人殭戀丫? 係咪即係Twilight囉」. 佢又好重視戲中殭屍造型, 究竟係喪屍定殭屍定點. 唔係咁啊, 大佬你同樣題材唔同人拍唔同人演都唔同啦, 各有風格各有味道, 如果劇情主線相似就係一撚樣就係唔值得睇, 咁西遊記, 射鵰個D, 一早收晒皮啦, 幾十年前拍過一次咪夠囉, 救殭清道夫雖然係殭屍片但殭屍造型其實唔係重點, 點解造型唔細緻又唔值得睇? 乜野標準啊? 雖然我介紹得唔係咁動聽, 但對方個種自我封閉, 拒絕接受新事物既態度都令人太失望. 好多戲就係畀呢D人釘死晒, 未睇先判.

春嬌救志明

1，其實冇睇春嬌1同2，唔特別鍾意彭導甚至覺得佢經常賣弄小聰明，但莫名其妙地我唔抗拒睇佢既戲。

2，讚左先，雖然唔覺得好睇但都係合格線以上。戲保留到香港味道，經典香港情壞地標：信興酒樓，龍華酒店，桑拿，街市；新興文青打卡勝地西環碼頭，大潭水塘，白紙工作室。再加埋導演私心：小雙俠，raidas。雖然覺得raidas首傳說plug得好突兀，但能夠畀年輕一代聽下咁正既舊歌都好。

3，彭導實在係個好神奇既人，多次將自己親身經歷擺落電影而又有效果，例如今次志明買dali一幕。但也實在太愛玩小聰明，佢好知道觀眾鍾意乜野，講下粗口，搞下食字gag，他們就開心了。有d位我都覺得好笑既，但大部分觀眾笑得更多，好撚開心。仲有頭先提到既香港情懷同集體回憶，相信呢齣戲可以滿足到好多觀眾。

4，客串同配角演員我好滿意，李拾壹廖子妤袁澧林連詩雅，甚至有歐鎧淳，估佢唔到，幾有驚喜。我冇乜運動細胞呢個in joke幾好。

5，講起in joke，彭導都非常鍾意玩呢樣野，不過有個位全場冇人笑，就係楊千嬅係紅十字會大使，春嬌大約意思係話志明「平時叫你捐血都冇捐啦叫你捐精又肯」，睇黎紅十字會要多多宣傳下呢位冇人知既大使。

6，有彭導最愛既奇幻劇情，今次都有，外星人空降地球。

7，最令我躁底同不爽既係，春嬌徹頭徹尾係個死港女閪女人。志明有耐性教嬌媽用fb，陪佢去街市，又同嬌爸去桑拿，仲要幫佢放埋狗，有咁多靚女都唔媾，去到桑拿都要嗌走先，擔屎都唔偷食，渾身優點都不被稱讚，只係有時買d唔等駛野同埋唔識小雙俠有時冇共鳴，就要畀人屌佢幼稚，真係好可憐。地震唔同佢攬住一齊死就畀人話乜都諗自己先，要嗌分手，陰鳩公啊。

春嬌姐心浮氣躁多疑睇人電話唔信任對方更年期唔食太太口服液，唔反省自己，佢自己咪又係凡事只想到了自己。雖然我唔信教，但聖經有時都幾岩聽，馬太福音七章3-5節說：「為甚麼看見你弟兄眼中有刺，卻不想自己眼中有樑木呢？你自己眼中有樑木，怎能對你弟兄說，『容我去掉你眼中的刺』呢？你這假冒為善的人！先去掉自己眼中的樑木，然後才能看得清楚，去掉你弟兄眼中的刺。」

誰人曾照顧過志明感受？春嬌冇樣冇身材性格閪唯一有既係一堆爛口八婆姊妹，志明為佢付出咁多，佢唔欣賞唔感恩只係要求更多，春嬌對段感情抱有咁多怨言，根本一早應該分手，佢只係驚人到中年分手冇人幫佢埋單，所以先拖拖拉拉，好心一早放開志明，志明值得擁有更好的。

8，我唔係唔明春嬌點解咁多野諗，佢對自己冇自信，又受到老豆影響，對愛情更加冇信心，但係佢依然係個閪女人，而且係個令人火都黎撚埋既閪女人。有力量既敍事方法，可以令觀眾明白佢暗底有痛苦有掙扎受煎熬的內心世界，但呢齣戲只拍出了春嬌既自撚私，無法好好呈現佢內心世界，我代入唔到佢心路歷程，睇完只覺得佢正煩膠抵撚死。

9，我知大家對世界諗法唔同，外人睇冇乜野，但春嬌本人可能感受到好大壓力，好不安，好惶恐，但sor9ry我真係代入唔到，無法諒解，只覺得齣戲一味矯情，睇到忟，火都黎鳩埋，慶過火屎。睇完之後我加深左對港女既怨憤，今鋪我撐志明，志明哥呀飛撚左佢啦屌。

10，千祈唔好誤會，我絕對唔係因為成齣戲被臭閪主導所以先話唔好睇，la la land既emma stone一樣係個自撚私臭閪港女，但我覺得la la land好睇，臭閪既出現並冇令我討厭套戲，因為人地劇本好，寫得出佢愛情同夢想間既兩難，我投入到代入到，我理解我諒解我接受呢個臭閪emma，但春嬌做唔到。我淨係見到劇情主線展現120分鐘春嬌的野蠻， 完全蓋過描寫佢內心脆弱既部分，港女到我火都黎撚埋。戲名仲要叫春嬌救志明，下唔好啦，春嬌搞鳩志明就岩。

11，志明最後話春嬌令佢長大，其實都係得把口噏，岩岩五分鐘前春嬌仲屌緊佢又做大龍鳳好幼稚，志明完全冇表現出任何長大左既成果，不過春嬌聽到愛的告白又即刻濕晒答應求婚，哇諗清楚未啊？咁易信人既阿女？最後仲要有左，埋定伏線厄觀眾入場睇第四集嗌離婚的怪獸家長春嬌？不了。

12，香港仔既楊千嬅覺得自己得不到父愛，又唔接受老豆有第二春；春嬌既楊千嬅同樣受老豆的花心所困；伊莎貝拉杜汶澤則係一個對個女感到歉疚既老豆。似乎彭導對於爸爸呢個角色好負面，心理陰影好大。

13，彭浩翔近年既戲唔太係我口味，理智告訴我以後都係少d睇，但我難保自己下次又忍唔住睇，我無法解釋呢個矛盾既表現，係戲種吸引？宣傳吸引？聽落吸引？多人討論吸引？我唔知。彭浩翔真係個好奇妙既導演。

[去西藏復活] DAY 2 拉薩：八廓街，轉宮，甜茶館，牦牛火鍋

起身諗住check in, 點知原來要去隔離個terminal, 話就話行15分鐘到, 大陸人信唔過, 次次問路都講到好近, 結果冇一頭半個鐘都唔到, 所以今次貪快貪方便的士算. 0615飛機, 冇delay, 9am已到拉薩. wow, 又cancel又delay又夜機駁早機, 折騰一番, 終於踏足夢寐以求既土地. 開心, 興奮.

坐巴士出市區, 都成個鐘. 開始見到藍藍的天, 色彩斑爛既經幡 (開車冇耐見到一次, 後來發覺市中心極少有經幡), 車上已見到布達拉宮, 落左車仍然見到布達拉宮. 一早睇過好多布達拉宮相, 但親眼睇到仍然覺得震撼, 好大一座龐然巨物, 坐落係鬧市中央, 抬頭總能見到, 無處不在. 對於宮前車水馬龍表示驚訝, 一座咁有歷史既建築, 底下就係現代化既大馬路, 有點不協調.

剪影的你輪廓太好看

藏獒

隨便在車站附近找酒店，第一間竟說系統壞了，無法為外賓登記，這理由真是第一次聽聞。第二間能登記了，但要將證件交低整整一小時才能完成手續，不知搞甚麼要搞這麼久，職員說西藏對此特別嚴謹。


走到風轉，可能太早還未開門。隨意進了八廓街一間甜茶館，多人到嚇親，張望一下便退回出去（後來才知道這家光明甜茶館很出名）。有德克士，而且在播chilam的祝君好。可能太早，很多店都未開，終於找了一家吃藏餐，酥油炒疙瘩，唔知乜野糕(好似叫糌粑糕)，手抓羊肉，牛肉麵。酥油茶原來一買就買一壺，不是一杯，幾好味，酥酥地油油地，聽說多喝可以防止高反。疙瘩和乜野糕都好吃，但始終重口味，吃不了太多，反而平平無奇全國都有的牛肉麵最對胃口。其實不算吃了很多，但那時怎會想到這已是我在西藏吃得最豐富，也幸好吃得夠飽的一餐。

唔知點解餐廳裡面好多樹

回房補眠，醒來就弊了，頭有點痛，似乎開始高反，但還是去布達拉宮那邊逛逛，宮的對面是和平解放紀念碑，明明當年搞到達賴喇嘛流亡，還說和平解放，仲要擺正係布達拉宮前面，真是仆街。

說起來，西藏一直是我好想去的地方，當初說過來的時候就一定要轉山，後來過了幾年都未去到，西藏卻一直變得愈來愈大陸 ，才造就今次得個幾日都要照黎，唯一目標是看一眼布達拉宮，現在看到了，我看到了，開心。


圍著布達拉宮走，跟藏民一起轉宮。藏民們手上年著轉經筒，邊走邊揈，嘴裡唸唸有詞，路旁也有零星幾個藏民五體投地拜宮殿。有人雙手穿著人字拖，站在石壆前順勢sir出去，挺有智慧。

宮殿下有個小公園，一班人載歌載舞好不快樂。後來才知道這公園也是個景點，叫做宗角祿康公園。

之前上網見到有人說轉宮途中被怪風吹來的大鐵板打中入院，差點冇命，我邊走邊想，就是這條路嗎？處處都是祈求積聚功德的轉山人，被打中的話應該是天大的詛咒。

我愈走愈眼訓，愈走愈想嘔，去了甜茶館休息。幾乎睡著，但因為想嘔，頂住頂住咁所以冇真正訓著，唯有釣魚中下中下咁。甜茶像是好甜的奶茶，包子類似餃子，其實好飲又好吃，但我實在吃不下，茶喝了幾口，包子吃了一啖。

甜茶一大壺咁上

好味

回房補眠，醒來還是不適，於是再訓，卻愈訓愈不適，嘔了。V沒事，拉我出去走走，說困在房內會更不舒服。


去附近吃牦牛火鍋，我感覺好了一點，吃了少許肉和飯，牦牛肉好似較牛肉濃味，其實我都不太有印象，冇乜胃口同心機食野。逛超市，沒甚麼好買，生果很醜樣，揀唔落手，勉強買了少許。沒心機逛，趕快躲回房休息。

寒冷地方特有的傍晚天色

看起來飽歷風霜

回房以後又是愈來愈不適，頭痛頭暈又想嘔，好似又嘔左。好彩午餐食得夠，如果唔係我維持唔到生命。

聽說到埗第一天不要洗澡(剛剛才發現原來是頭三天都不要洗...哈哈哈)，因為會加速血液循環增加耗氧量，容易引致高反。我沒洗，v沒甚麼事(他一直以來都比我更少病更少高反)所以照洗。後來他頭痛得要死，不知是否因為洗澡洗頭，痛到睡覺也輾轉反側，給他吃紅景天也沒用，最後要吃必理痛，好了一會轉頭又痛過，半夜仲起身去嘔。

其實我今次好乖，明知自己通常都會少少高反，出發前幾日已經食定紅景天，諗住黎到可以開懷大吃，但都冇用，黎到都係高反，頭痛想嘔，訓得好差。希望聽日會更好，根據經驗，訓醒覺就會冇事。

在牛池灣轉角遇上彩虹, 沙田四世代

1，費事倒米，呢d說話落左畫先講。當初之所以對呢齣劇有興趣，係因為劇名，作為附近街坊，好高興見到有人發現牛池灣既好，仲以此為創作題材。後來知道呢個更係慶祝牛池灣文娛中心三十周年既劇目，更期待了。


2，睇完好失望，非常失望。雖然我唔係每一幕都睇得明，但全劇大致方向同綱領我能夠理解，係講尋找愛，勉勵人唔好作繭自縛，要努力掙脫牢籠，搵屬於自己既彩虹。

文匯報：「本劇將透過一個尋人故事，一方面追蹤牛池灣的變遷，另一方面展示現代人生活中關於「名」和「實」的矛盾，最終是要探索一個人生的重要課題：做人應該「執着」還是「放下」？」

Am730：「既然都來了塵世，不如出力的找愛，也嘗試從你的世界裡，去找你的彩虹，每人，都一定可以找到他們獨有的彩虹的。」

但係呢個故事並未獨特到必須要係牛池灣發生，一開頭至到阿媽去拜三山國王廟個度都算連結到牛池灣既，但後面已經全情投入於隻船上面，如果唔係對白中seldom提及「牛池灣」，「三山國王廟」呢兩個詞，同埋最後講返個牌坊，我幾乎忘了這裡是牛池灣，完全無法體現牛池灣既獨特性。究竟why呢個故事要發生係牛池灣而唔係筲箕灣？同樣有海why要擺隻船係三山國王廟前面？唔通係因為牛池灣係獅子山下，一班同處海角天邊既同舟人，放開彼此心中矛盾理想一起去追？


3，故事發生係牛池灣，咁彩虹呢？彩虹(choi hung)除左開場一句「next station rainbow呀唔係choi hung」之外，根本冇係呢齣戲出現過。後來劇中再出現既所有「彩虹」都係rainbow，唔係choi hung。講「在牛池灣轉角遇上彩虹」既故事竟然唔提choi hung？我迷惘，我困惑，我不解。牛池灣同彩虹呢個咁好既題材，咁獨特既地理環境，冇好好運用，好可惜，而且無論係劇名定係媒體介紹，都令人覺得呢齣劇會講城鄉發展與變遷，但我就唔係好睇到有，就算有都一定唔係主線。


4，am730話呢齣係時代寫實劇，我覺得開頭果檔街市麵店都係既，但隻船出現左之後仲算係寫實？係船上擺陣天地玄黃宇宙洪荒，好荒誕啊。又，如果呢齣係寫實劇，咁史實方面更加要有根有據以史為本。


5，劇好唔好睇、睇唔睇得明，好主觀，史實則係客觀既fact，而呢齣劇有關現實既設定，令我有d混亂。朋友楊老屍話個牌坊係佢初中先起，我check過，牌坊確實係2000年牛池灣鄉公所成功爭取於華池徑豎立，上面既對聯：「牛斗之墟巍然見滄桑，池中難囿火中觀鳯凰」，概述該鄉變遷。

朱氏兄弟分別係6歲同8歲去公廁時經過牌坊若有所思，即係佢地而家大約係23同25歲，但睇落個設定唔似係咁後生。2000年或者仲有兒童要養活細佬呢種事情發生，但應該好少，因為已經交左畀社署跟進，連續六年無家可歸去公廁而不被社工帶走既情況好罕見。

罕見唔代表唔可以成為戲劇題材，只係我傾向相信呢個以牛池灣為背景既故事，兩小童相依為命呢個設定，應該係想描寫一脫人既生活常態，而非創造架空歷史既虛構特例。


6，三山國王廟以前係海旁，應該係因為咁所以隻船泊左係個度，但唔知有幾多觀眾知道個度以前係海？或者有幾多人認識呢個廟？後來劇情更係冇再提過個廟，浪費左船隔離就係廟呢個設定。又如果真係因為個度以前係海旁所以泊船，即係劇中設定既年份係填海前，冇可能同2000年先起既牌坊出現於同一時空。


7，講明先，我覺得呢齣劇唔好睇，唔係因為佢多bug，「寧要不通，莫要平庸」，只要夠好睇，劇情不通係絕對冇問題，而家問題係不通得黎唔好睇，劇情推進緩慢，自從隻船出現左之後就冇厘進展，糾纏左好耐，拖泥帶水，就算演員幾生動都救唔返。


8，客觀既野講完，主觀黎講我睇完好多問號。白只既角色設定係來自潮州，但點解係潮州？雖然三山國王呢個信仰源自潮州，但牛池灣人大部分都係惠陽客家人，究竟白只來自潮州有乜涵義？


9，有班學生黎文化考察，但帶出既歷史資料好少，變遷亦冇乜提及。呢班學生既出現除左唱歌之外，仲有乜野涵義？


10，300粒橙代表籮底橙？300個橙同塊白色布長期吊係上面，係咪因為舞台限制？定係為左表示成班人身處籮底？塊布除左最後用黎蓋住d野，有冇其他涵義？有諗過塊白布係咪代表船帆，但又好似唔係。


11，覺得唱太多歌，my heart will高昂唱兩次，唱得亦唔短，仲有在森林和原野、杜鵑花、世間始終你好等。唱歌除左畀年青學員有演出機會之外有乜野其他涵義？在森林和原野那幕其實有乜涵義？又假設朱兄於劇中年齡係25歲，當一個25歲既年輕人感受到關愛時，竟然會唱世間始終你好而唔係近代既歌，好少有啊。

12，my heart will高昂(1997)、在森林和原野、世間始終你好(1983)都係懷舊歌曲，杜鵑花更係1941年抗日時期寫下，唔知編劇有冇以歌曲帶出時代變遷既意思，揀呢幾首歌有乜涵義？


13，街市前叫賣一幕，修路工人換左塊地，係咪代表時移勢易滄海桑田光陰似箭日月如梭？


14，占卜、偷人膠袋有乜涵義？


15，麵檔一幕講粗口係好笑既，但之後再講已經覺得講太多，或者係想表達市井既感覺，但d粗口多得黎生硬，既冇地茂味道，講太多亦失去喜感。要讚既係講粗口講得最有效果係陳淑儀，幾好。


16，假如朱氏兄弟既設定係市井之徒，何以經常講野文皺皺，引經據典？仲會對牌坊上既對聯有興趣？係咪因為舊時個一脫人鍾意睇金庸、聽講故佬講故仔，所以肚裡唔多唔少有d墨水？


17，儘管我覺得齣劇離題，被欺騙了感情，但好欣賞班演員，好專業，劇本咁難理解都做得好好，尤其白只既對白非常艱澀難記，但佢都正經之中不失幽默，值得鼓掌，實在難怪好多人既睇劇誘因係為左朱凌凌。


18，雖然友人楊老屍都覺得《牛池灣》唔好睇，但佢好堅定咁表示編劇之前既作品《都是龍袍惹的禍》係非常好睇。期望下齣劇可以撥亂反正。


19，睇完《牛池灣》第二日，我睇左《沙田四世代》，由於係口述歷史劇，所以真係講沙田，真係非沙田不可，肯定好貼題。內容亦比想像中好睇，係要由長者做先有至能夠add value，睇到佢地好認真好努力好投入，有d仲真心幾好演技。雖然有疲態，但絕對彰顯生命既活力，望住佢地台上互相扶持咁走位，搬道具，開開心心跳舞，我心情都變得好好。我仲見到有個伯伯對黑皮鞋，烏亮烏亮的，完全感受到佢既一絲不苟。


20，個位客席演員雖則係大配角，但不可或缺，猶如管弦樂團既指揮。同埋佢好chok，但chok得黎都感受到佢幾有愛心，成日輕輕摸住隔離位公公婆婆隻腳，真人應該孝順仔黎。


21，作為80後呢一脫人，我欣賞導演苦心，想帶出發展係咪硬道理既反思，雖然老友記唔係好想理。

[去西藏復活] Day 1 成都

復活節，出街玩下。今次旅程本身已經夠短，預計6日6夜，豈料未出發先濕鳩，原定班機取消左，要遲24個鐘先飛，咁咪短上加短。Agent又幫唔到忙，冇用啊，星期五同講星期二班機冇左，問佢點搞佢話答唔實，星期六日佢放假追都冇用，唉費事煩，遲24個鐘算，唔撚搞了，得返5日5夜。以後買機票咪再經agent，濕鳩到。

飛成都，delay兩個鐘，雖然唔出奇，但始終係個機場鳩等都好辛苦，好浪費生命，屌。出師不利啊。

悶到影腳

緣分天空，真心成家男

傲嬌

去到成都已經夜晚十一點幾，機場有間按摩，$160間房，貴少少仲包埋按摩，好抵屌，不過我想訓覺，唔按了。

間房就好污糟下，被同床好多頭髮，訓落去個身硬係痕痕地。後來半夜隔離房有大叔入住，扯鼻鼾扯到我間房都聽到，牆完全唔隔音。不過都係訓幾個鐘就轉機，將就下。

我想吃掉你的胰臟 (半劇透加長版)

書名很獵奇但其實是個溫暖感人的故事，頭半平平無奇，可是看到後面心情就不能平伏，在地鐵上失禁得無法再讀下去，《步步驚心》片尾曲《三寸天堂》在腦內無限循環(雖然古裝劇歌曲跟現代校園小說好像有點不搭調可是我覺得兩者感覺出奇相襯)。

（好似有劇透）

原來小說可以沒看到最後一頁就結束，太多理所當然的概念根深柢固，快將要死的人的時間沒有比較珍貴，生命可以戛然而止，誰都可能明天就死掉，所以還是真誠面對自己，坦率地過每一天吧。每個人都有各自獨有的魅力，也是被他人需要的個體，成為能認可別人的人，成為能被別人認可的人，成為認可自己的人。明明是如斯老撚套的話，怎麼我還是看得熱淚奪眶呢。

書名也改得太妙，太有意思(絕對不是點五步咁鳩流牽強)。你就是你，我才能是我，彼此都是彼此的缺口，大家性格可以完全相反而對望，互相拯救，互為一體，找出你的名字真正意義。能夠有要交換胰臟來吃的對象，這輩子便完滿了。

看到女主媽媽說「原來是你」一句馬上觸發淚腺，冷靜一下再繼續看，男主問可唔可以喊，讓我再度淚奔。看完全書卻不傷心，只覺得很甜很溫暖，生命中有點美好的缺憾，死前驕傲說一句「我活過」，多好。

不再看 天上太陽透過雲彩的光
不再找 約定了的天堂
不再嘆 你說過的人間事無常
借不到的三寸日光

華田炒蛋

四年前已經有個鬼煮意，肥媽有雞翼十食，我都有炒蛋十食。今日終於得閒試下華田炒蛋，可惜華田味唔夠出。懶得煮菜，以橙代之。好飽飽。 炒蛋既可塑性果然非常高。