異鄉人，烽火守書人

異鄉人

1，其實普通，頭半題材新鮮但悶，講畫壇既運作，後半變左常見既生世之謎

2，插敍過多，有d亂

3，形容詞來來去去得一個，就係話人(菜穗+樹)對眼發出妖異光芒。但究竟甚麼是妖異，如何妖異，作者冇講。

4，前半冇追看性，搞到我擺低左兩個月先繼續睇，不過睇睇下又唔知點解好沉醉，完全聽唔到地鐵廣播，已經兩次搭過龍。可能本書都散發妖異光芒，令我太入迷，我真係睇到入左本書，完全聽唔到身邊既聲音

5，呢本書最正係體會到京都既風雅，好想去京都長住，事實上京都本身都係我最愛既日本地方

6，雖然據說呢本並非原田舞葉最好睇既書，而我亦都唔覺得好好睇，有d位仲幾悶，但我又唔知點解想睇埋佢其他書：我們的生存之道，畫布下的樂園


烽火守書人

1，係伊拉克圖書館當年既館長係2006-07年間寫既日記，訝異於戰火中既巴格達原來仲有文化活動持續進行緊，亦驚歎伊拉克咁多人才，好多館員都係圖書館學，英文系，外語系畢業，而且有好多女性員工

2，打緊仗既地方，除左諗都諗到會發生既事：每日有人死傷失蹤，每日爆炸綁架封路，原來人民仍然會返工返學逛街，完全唔係我想像中係日日匿埋避難，其實是我太冇常識吧，但實在好驚訝有高等過生物邏輯層既活動進行，伊拉克仍然有文化活動，有書展，有講座，館長更表明戰火中更應維持文化活動(之類的意思)，太型棍

3，圖書館仲送過好多館員去海外培訓，感覺很重視圖書館呢樣野，館亦相當具規模，打仗+政府貪污+文化部迂腐+停電，咁惡劣既環境都仲維持到運作，對守護館藏既堅持好值得鼓掌，人地咁既時勢都做多野，耽於逸樂既我有點慚愧(應該會慚愧兩天左右)

4，唔知而家伊圖乜形勢，只知呢個館長2015年離職

你愛的衛蘭

狀態大勇的Janice，今次唱返自己歌，得心應手，Live比三年前Back to the Future好太多，全身除了子宮之外都懷孕了，連bombom棒都不慎吱咗落下面嗰行，完全忘記自己忍緊尿。

澳門觀眾好high high，可惜只唱咗唔夠兩個鐘，唔夠喉。開場前我問點解個演唱會叫《你愛的衛蘭》，聽完明晒，呢個係我愛的衛蘭。

講真經過多次外地睇演唱會同埋各類show既體驗，如果我係歌手我唔會再想係香港開騷，觀眾太內儉，又唔用螢光棒(除非免費派埋)，全場又黑又靜，好似對空凳派壽桃咁。以觀眾角度，香港場地都好閪，紅館山頂位真係乜都睇唔到，star hall又側面側面側過側田，其他會展，九展展覽廳之類既場根本唔係為演唱會而設甭提(博覽館未去過唔知)。澳門北京廣州個場細d，山頂位等於紅館580位，正好多。

澳門2017年7月

- 在為即將出發的澳門之行做RESEARCH時, 回想上次去澳門的事, 感興來了就寫遊記. 想不到事隔一年我居然會補回旅行感想呢哈哈哈, 所以我的爛尾遊記都仍然有曙光的, 終有一天突然有感興就會寫~~

- 這次終於住了多年來一直想住住看的新華大旅店, 我們住的那房間是章子怡拍《2046》時待過的啊. 不過入住率意料之外的低得很, 我還早早預約怕客滿, 結果除了我們就好像只有一戶住客... 房間沒有冷氣, V熱得抱怨說要搬去酒店 (結果迅速入睡). 廁所和浴室是公用的, 殘得像宿營營地那種, 廁所板都掉落了. V抱怨說他不洗澡了 (結果第二天睡醒卻去了洗澡說也不是那麼差). 我覺得房間保留古老味道都合理, 不過廁所還是修一修比較好吧.

- 忽然想要尋根，去看看家母兒時居所現在如何，因此走進了舊區，居然跟我廿年前來的時候沒甚分別，老舊得教人不敢相信僅十數分鐘步距已是閃著邪惡金光的糜爛賭場和遊客區。這邊靜靜的，街上人影也不多見，舊樓猶如已荒廢，要不是看到一個個鳥籠般的露台晾著衣服，實在一點人氣也感覺不到。

- 想不到小小的澳門，酒店工程從未休止過，三盞燈缺了三盞燈，卻還容得下一個停止發展二十年的地區，遺世而獨立，要好好珍惜這個未沾上繁囂的老地方。

- 曾經迷戀金錢餅，每次去澳門都要買；曾經熱烈向人推介大三巴餅家，默默對抗一整條手信街的鉅記和鳳城，熱情派送熱辣辣好好味的紫菜肉鬆鳳凰卷。近年後者的味道份量服務都遠不如前，倒是店面變大了。目前最愛是金燕的蟲仔餅和雞蛋糖、最香餅家的杏仁餅，老餅老店老得有性格，全神貫注做好一間小店，長留好時光。

那一年我17，香港製造

原來六月我睇左十套戲。

最近兩齣都係講青年人既戲，那一年我17就係好正路既青春片，回憶返學時既反叛熱血，好燦爛充滿色彩；香港製造格調完全相反，講一班雙失青年冇未來冇光彩。


那一年，我17

1，澳門小品，台灣青春片風格，將近年青春片既元素炒埋一碟：我的少女時代(同王大陸一樣既造型，去外國分隔兩地)+那些年(學業好既女神與頑皮既兵仔，被罰舉凳罰企直情一模一樣)+狂舞派(跳舞比賽變左做歌唱比賽)+哪一天我們會飛(主角大個左生活窩可，回味當年)


2，套戲1小時4x分鐘，頭半節奏算明快，後半太慢，特登搵野搞，又係天台吹下水，又潛入學校偷試卷，仲要兼顧(其實冇乜著墨既)kyle同馬曼莉既感情線，miss阿sir感情線又要講，人物太多，全部蜻蜓點水唔入腦。邊睇邊心諗：唔好搞咁多野，快d比賽啦 (但結果居然冇比賽到, 屌)


3，彭永琛造型同王大陸一樣，但耍帥場面太少，唔會因為睇完戲愛上佢。不過我本身都有留意佢d歌，當年咁岩去左前公司既音樂會，其中一個嘉賓係佢，完全唔識佢，以為係新人，點知發現原來佢澳門出道多年，三十都黎緊，而家都31了(但還在扮17歲...不過佢個樣都算細個既)，之前佢首《比賽歌》道出心聲。


4，我會睇呢齣戲，相信同好多人一樣，係為左袁澧林。青春片最緊要係青春，彭永琛耍帥不足，但有袁澧林可愛搭救，老老實實佢唔係真係好靚，但有氣質，清純可愛我係十萬個認同。發現佢個膝頭損晒花晒，好像是之前越南旅行摔壞的，姐姐我好心痛，唔知點解唔遮遮佢，但我又覺得唔遮其實都好，一個曳既學生妹周身傷好正常。


5，入場前已知袁澧林會謝票，於是我特登早d到，入廁所整理衣衫，企圖以最得體一面同佢合照。點知我入到去，佢已經係度，送獎品環節進行中，佢竟然係開場前就黎左。我坐低係第二行，因為我睇過晒佢之前謝票既相，佢坐第一/二排既機會好高，我買前排位就好大機會可以係全場大合照時親近佢。點知佢今次竟然攝左去全院正中間，被人群包圍，而人群不是我。影完佢就急急腳走左，見佢咁樣，我唔好意思追出去，屎忽好似釘死左係張凳上。原來我毒撚屬性咁強，見到真人時乜都唔敢做。事後我好後悔，好傷心自己咁廢，追出去有幾難？咁都唔夠膽。個晚因為太傷心，訓得唔係幾好。事隔兩日，我忽然發現佢仲未停止謝票，而且間戲院仲好近我，我望一望表，計一計時間，即刻衝過去應該仲趕得切，於是即刻又去左戲院，今次皇天不負有心人，合左照，開心豬，之前既傷心一掃而空，我一雪前恥了，開心心


6，見到有人為左袁澧林，睇左套戲三次...


香港製造

1，睇完之後，我終於明白點解當年前上司話去睇紅van係因為陳果，香港製造太有魅力


2，畫面好靚，好有味道好有意境。個種草根味，公屋景，牛頭角，瀝源邨，仲有d香港電台味，正正子

3，墳場個幕經典，有人既青春係熱血歌唱比賽，佢地既青春係墳場嬉戲。比起陰暗公屋代表冇將來，呢個墳場比喻有代表性好多，公屋個d象徵意義後來好多電影劇集都有用過(之前唔知，舊戲我唔熟)，例如《點五步》，《踏血尋梅》。但講開心墳場，《香港製造》真係數一數二。


4，死亡＝墳場＝開揚＝開心。
生活＝屋邨＝侷促＝冇希望。
中秋佢地=香港。詳細解讀唔寫了，大把人寫過。就算唔講象徵意義，都係一部好好既青年墮落片。


5，然而v竟然話唔好睇，好悶好無聊，冇劇情。對佢好失望，咁撚好睇既戲，閱片無數既佢竟然會唔識欣賞。迷幻列車仲鳩揈揈啦，佢like個套唔like呢套，我真係百思不解。呢套咁多劇情推進，中秋由頹廢到拚搏到絕望，自我毀滅大爆發，點會係冇劇情？


6，人地係（當年仲有公信力既）金像獎最佳電影，除左有少少長之外，真係好好睇。又有學生妹跳繩波彈彈，又有形象化既打飛機，又有協和小學，弱智阿龍個樣又好似真係弱智，又有美好既九十年代街景，邊忽唔好睇？如果係唔睇開cult片/indie既人話唔好睇都可以理解，但一個鍾意cult片同迷幻列車既人話香港製造係鳩拍既鳩戲，我實在無法接受。


7，香港關於年輕人既戲似乎都係歌頌追憶青春多，描寫殘酷青春既少，慘極頂多都係類似早熟，骨妹個種程度，真係去到絕望，風格陰沉既實在少，我暫時淨係諗到《墨綠嫣紅》，但呢套應該算短片，同埋《烈日當空》，朋友話仲有《古惑仔》，《伊莎貝拉》，《三五成群》應該唔算，諗唔到其他了。台灣有《牯嶺街》，日本有《青春電幻物語》，仲有好多湊佳苗。我終於明白點解睇《香港製造》個陣我會覺得有香港電台既感覺，因為我接觸呢種氛圍既片，主要途徑係港台。

8，香港青春片都係愛情輕喜劇最多，校園戲都少，畢竟香港校園冇空間亦冇生活，近年《初戀日記》應該算(我冇睇，鳩估)，舊d就《愛出貓》，再舊係《逃學威龍》，反而電視有時都會拍校園劇，《親親我好媽》都算啦，《青出於藍》深入民心，仲有《尖子攻略》。

鉄拳 振り子

之前想搵返呢條片, 但唔記得左名, POST係呢度方便日後翻睇.

呢條片完美示範乜野係橋唔怕舊至緊要受. 老套野只要PRESENT得好, 一樣好有力量, 估到晒結局都仍然感人, 鐘擺既巧思我尤其欣賞, 神檯級, 經典級, 殿堂級, 世界級. 每隔幾年睇一次仲有唔同感受, 幾年前第一次睇覺得係SAD END, 而家睇覺得其實開心.

成個鉄拳系列都好正, 鏡頭視覺好有意思.
鉄拳 パラパラ漫画

六月演唱會馬拉松

第一次看蔡健雅演唱會是去年十月在北京，帶給我滿滿的滾動，看完就有生活下去的勇氣(前天我這樣深情地說時卻遭到朋友的白目)，事後還繼續天天聽蔡健雅聽了一個月，偶爾還會單曲循環一整天，好想跟著她巡迴世界。

然後這天終於來到香港站，依然好好睇，這次添了夕陽之歌，也同樣以beautiful love收尾充滿盼望，蔡健雅還是蔡健雅，但我找不回當初的感動，不知道是因為沒有那英做嘉賓、沒有cover平凡之路、star hall盞燈成日射鳩住我隻眼、還是因為被吉凳包圍。我不知道哪裡出錯，有點傷心，若有所失。不過還是很棒的演出。

林敏驄
1，好睇但唔夠好，卡士弱，09年有陳奕迅，03年有張學友，今次encore都只係中基。不過嘉賓既野牽涉因素多，我唔怪佢。


2，反而係technical太差，鏡頭追唔切，又成日影背脊，個mon太扁見到個頭見唔到身，收音又擦，中間個台仍然係全晚唔用得。


3，糖妹同薛凱琪表現幾好，後者live好左


4，d嘉賓唔係唱得唔好，但實在太奀，第一班嘉賓係太極，緊接住係全力扣殺d人，有幾多人睇過套戲呀


5，中段c allstar，胡琳，胡琳仲要兩首歌，嬸嬸們識佢地老鼠


6，林敏驄仲要話譚伯打電話問佢攞飛，令人期望會有譚伯，點知等到完場都冇，成晚狂唱譚伯既歌但本尊唔現身，爭d野咁。舊年潘源良encore都有譚伯愛情陷阱啦。(後來先知原來譚伯係杭州開緊演唱會黎唔到)


7，林敏驄淨係會同有返咁上下年紀既嘉賓吹水，唔會同後生個d同台，唯二兩個有幸同佢吹水既後生女係薛凱琪同苟姑娘。可以見到苟姑娘，我好開心

徐佳瑩

其實想會唱多d自己歌，今次cover好似仲多過自己歌，但都冇計，因為佢新碟係輯錄我是歌手參賽cover。

嘉賓楊乃文好寡言，徐佳瑩真是做主持的料。

竟然有李克勤做嘉賓，表示驚喜，氣氛好好，合唱紅日，高妹

今次徐佳瑩練左舞同鼓，好睇。

唔想聽失落沙洲，聽厭左。

Encore係突然好想你。

還是覺得去年比較好看，唱多點自己的歌，冇嘉賓冇所謂，粵語唱下一站天后，由徐佳瑩唱特別有意思，喜氣洋洋又係意想不到，好驚喜。

七月與安生，想死冇咁易，訪嚇

七月與安生

- 我又看了一次七月與安生，還是跟第一次看時一樣感動，每個場景每句對白都有意思，扭橋扭完再扭，畫面唯美，兩個女主角很好，編劇竟然有林詠琛，這樣一切加起來在金像獎才竟然只得一個最佳原創音樂，簡直離撚晒譜。淨係講電影拍攝技巧，呢個扭橋再扭橋既故事要用畫面去呈現，已經難度甚高，最佳新導演怎可能不是曾國祥！


- 女仔都係多野諗，太多閨蜜電影係你厄我我厄你但其實係想你好，近期例子就有骨妹。但係七月與安生拍出左「你中有我，我中有你」既感覺，安生要面子又愛裝，扮不羈扮豁達，其實脆弱又敏感，但佢想將最好既野讓畀七月，寧願自己繼續扮浪子。而佢認為最好既野就係安穩，有人愛。


- 七月一樣要面子又愛裝，佢知安生鍾意家明，最後都叫家明逃婚，一來想成全二人，讓安生得到心底渴求的家/愛，二來倔強要維持尊嚴，順便解放自己，去過飄泊生活。


- 七月安生好愛對方，又好恨對方，「我恨你，但我只有你」，一凹一凸，冇你冇我，同時有你就冇我。女人真係好複雜，但其實又好簡單，講到尾個引爆點都係因為男人，如果世上不存在家明，七月安生大概可以相安無事的繼續一起洗澡(至少到27歲)吧。


- 相較起來還是喜歡兄弟式的直腸直肚，有屁直接放，不用顧慮太多。女人太多計算，無論想你好定想你死，都是滿腹的計算，這樣做人很累啊。


- 楊老屍說的bug我看到了，chapter名跟內文不符，哈哈。還有更多劇情上的bug：七月一早知家明同安生有野，但送別安生時睇落仍然好難離難捨零芥蒂，直到見到安生頸鏈先呆左，喂你不是一早知道了嗎還裝甚麼(果然很愛裝)？目送安生坐火車明明都算係不歡而散，但轉個頭七月又前事不計，狂寫明信片畀安生？女人心真係海底針。


- 不過仍然瑕不掩瑜，好好睇，非常好睇，好睇到我真金白銀買票入場睇左兩次。如果要幫套戲搵一首點題歌，我會揀庾澄慶《缺口》：你就是你，我才能是我，彼此都是彼此的缺口。(之前寫《我想吃掉你的胰臟》同《白夜行》都好似引用過呢首，出場率極高，冇計，呢首歌太好，凡是糾纏不清的關係，不論愛情友情親情，都可以套用，萬能key是也)


- 改名的重要性，如果主角叫小美與阿娟，成件事就柒晒


想死冇咁易

- 呢個戲名好難記,買飛個陣我講錯左做「點解死唔去」...


- 都唔係創新既topic, 講一個社區裡面有條友同大家相處唔黎, 之後有新鄰居係咁撩佢(而呢條好事之徒往往係non local例如印度中東之類), 再經歷一d事, 之後大家就開心快樂咁生活落去. 外國人特別鍾意描寫鄰里關係, 大概因為好多人都係住小社區吧.

- 呢套戲特別在佢多左一個設定, 就係男主係個阿伯, 老婆死左之後佢生無可戀, 所以尋死. 這又令我諗起舊年年尾睇個本《無緣社會》, 是唏噓是寂寞卻又是無可避免. 而阿伯結果都係無緣死, 不過有好多鄰居送佢最後一程, 無緣死之中算係完滿.

- 阿伯係個正義撚, 但事實上佢又冇錯, 只係而家太多人得過且過, 劣幣驅逐良幣之後先至顯得阿伯係個矯枉過正不合時宜既死老野.

- 結局最後一幕拍得好好好, 阿伯個靈魂回到當日遇上老婆既火車車廂, 老婆對住佢笑, 二人終於再次在一起. 好撚感動, 我又想失禁了. 如果我一年前睇到呢個畫面, 我冇咁易會失禁, 弊在我而家認識左薛之謙, 聽過《你還要我怎樣》, 講既exact7ly就係呢種scene, 一諗起首歌, 教我如何不掉淚! v都有諗起呢首歌, 證明呢個scene真係好match到個意境. 嗚嗚, 好感動啊. 好好睇啊. 最近睇既戲唔錯啊, 都好好睇啊嗚嗚.

有一天晚上 夢一場

你白髮蒼蒼 說帶我流浪

我還是沒猶豫 就隨你去天堂

不管能怎樣 我能陪你到天亮

訪嚇

- 因為損友三木盛讚呢齣戲, 又話等同我討論. 本身我唔係好睇呢d驚慄片, 但係佢講到咁正, 搞到我心動, 唯有冒住生命危險去睇, 掉那媽頂硬上.

- 真係嚇死寶寶了, 但係真係好好睇, 低成本, 高質素, 條basic大橋其實唔新, 仲要係玩到爛晒個隻, 不過加左好多有意思既細節位, 諷刺種族歧視, 仲要觀點立場相當罕見, 驚喜度滿分!

- 睇完第一感想是: 黑人的基因果然很強大, 智慧值和hp值都非常高. 黑人看這個戲一定很爽很暢快, 因為白人豬真係好撚蠢.

- 催眠抓人去改造基本上是老梗, 但這次稍微改一下, 是白人想要變成黑人, 是白人要將自己個靈魂塞入去黑人肉體, 係直接捨棄自身軀殼, 而唔係一般橋段既白人將自己身軀加強到黑人咁強, 整個感覺馬上很嶄新,這個念頭真有意思

- 女主機心超重, 交個黑人男友, 將他bingo掉之前還可以吃大黑腸, 可見白人方方面面都葡萄黑人, 我極度欣賞導演這方面的巧思, 大黑腸萬歲! 看資料發現導演原來係黑人, 而且還是第一次執導, 再次證明黑人強基因, 大黑腸萬萬歲!

- 很多細節都好值得慢慢妹慢慢嗒. 棉花救了黑人男主, 而故事地點正正係alabama--當年黑奴採棉既地方, 這樣就能理解點解要係棉花了. 整齣戲一直流露詭異氣氛, grandpa跑步、賓客話男主大隻, 細佬話佢野獸, 盲佬話佢影相有sense等, 知道謎底後馬上一理通百理明, 恍然大悟!

- 當然要數bug的話有排數, 與其搞咁多野又催眠又盛, 何不直接將目標黑人扑濕? 擺明故弄玄虛搵戲做. 男主強勁到近乎開外掛的程度, 打極都唔死, 又有腦筋. 可是不要緊啊, 好睇既戲唔需要駁故, 瑕不掩瑜, 有bug唔會減低觀賞價值同趣味.  導演的心思太值得細味, 是個可以二刷的電影, 再看大概可以找到更多有趣的暗示吧. 很好很好, 黑人真係好正.

- 我明明係外貌協會主席, 今次竟然掛住讚劇情讚導演, 唔記得讚靚女主角. 女主好靚女! yeah!