謝謝你，在世界角落中找到我

(1)

唔係《你的名字》嘅愛情，唔係《再見螢火蟲》嘅慘情，呢套係賣希望，艱難中點樣繼續開心。套戲大部分時間輕鬆活潑，見得最多嘅畫面係女主笑笑口>v<咁樣嘅表情，邊睇邊諗點解處於二戰呢個亂世，佢仲可以笑得出？仲搵得到樂趣？女主簡直完美示範乜嘢係小確幸，大時代裡嘅小人物故事，特別動人。

劇本唔商業，導演年過五十但令人印象深刻嘅作品已經係廿年前《神犬拉西》，冇人肯投資，要搞眾籌先有4000萬yen(約270萬港元)。上映時全日本得幾十間戲院上，負責配音嘅能年玲奈被打壓，仲要同《你的名字》撞期，聲勢完全被蓋過。票房僅靠口碑維持，咁艱難嘅情況下依然full house加場，早前仲拎埋日本電影金像獎，刀仔鋸大樹，非商業小品不輸商業主流，幾咁鼓舞啊。

戲裡戲外都充滿盼望，End roller一個個眾籌者嘅名彈出黎好感動，我好想企起身拍手，呢齣戲絕對值得鼓掌。2017最需要靠口碑推介嘅電影：《謝謝你，在世界角落中找到我》。

附：睇早場被老友meme包圍，老友記全部好安靜好專注，睇到拭淚，完場不斷話：「要細味，要細味; 係感受，係感受。」



(2)

最深刻一幕，係女主喺糧食短缺時仍然每日煮出唔同菜式。唔係求其白烚或者炒埋一堆咁簡單，而係研究咗「戰時食譜」：蕃薯焗飯再焗到佢發脹好飽滿，蘿蔔皮野草蒲公英根又好講究咁撈埋一齊，魚骨磨粉煲粥之類。戲中畫面仲要係女主哼住歌，配上輕快背景音樂，好詳盡咁影佢點煮，好似拍飲食節目咁，整出嚟好似好好味。

明明係講緊打仗食乜餸，竟然都可以拍到food porn咁勾起人食慾，亂世之中日本女人依然維持料理力，嗰種艱難中都要認真生活嘅勇氣令人歎為觀止，欽敬欽敬。睇完戲我即刻去食咗兩碗白飯，頓時感到美好事物仍未離棄呢個世界，白飯(？！)真係好東西啊。