Day 34 邁阿密：american airlines arena，bayside marketplace

兩個幾鐘由紐約飛到了邁阿密。

邁阿密給我的第一印象很好，設施很新，人很友善，車站的地圖也很齊全。

藍天白雲，到處都是棕櫚樹，很有陽光與海灘的感覺，這果然是度假勝地。

American airlines arena ，熱火主場場館，只能在外看一下。唔知幾多年後會有占士銅像？

來到美國最後一站，但仍未一嘗鋸美國牛扒的滋味，今天我就豪一次，地點還要是holiday inn （其實因為行過見到holiday inn 同出面價錢差不多），大大塊厚厚的安格斯牛扒啊啦啦啦。

飯後偶然發現了海邊的購物廊bayside marketplace ，個度d扒平d。仲有部引人倒錢落海既機，類似夾公仔，但獎品係iphone 5, ipad mini, galaxy tab, psvita。都唔明點會有人玩，咁容易一蚊拎到部ipad返屋企既話，呢部機仲會唔會存在係度？偏偏就係好多人玩，仲要玩唔只一次。

Day 33 波士頓：哈佛，麻省理工，唐人街

凌晨四點幾抵達波士頓，天黑黑的，但地鐵已在行駛，明明條街漆黑一片人影冇隻，唔知點解地鐵車廂好多人。

哈佛大學，紅磚牆，很典雅。麻省理工就cyber好多，但沒了哈佛那種人文氣息。

來到大學還是要做大學生會做的事：爆房訓覺，仲訓左個幾鐘。

實在太睏，在車站附近的唐人街找了間茶樓坐他兩個鐘，很頹廢。

話說美國一向有小費文化，tips 係默認會畀，但我地成日側側膊。今次埋單時部長竟然企正係度話要收小費，一直企住係度睇我翻銀包直到我多放兩元在桌上才願走，面皮真厚。後來跟舅父母說起，他們說這很正常，有些侍應還會追小費追到出門口。
不喜歡這種小費文化，點解一定要畀tips。

回到紐約，舅父母帶我們去越南餐廳，又要他們破費了，自從來了紐約，幾乎餐餐免費食好野，很安逸。美國食野真係好貴，餐價再加稅和小費，食六蚊野實際上分分鐘要畀九蚊，很誇張。

明天離開紐約了。

Day 32 紐約：coney island，brooklyn八大道唐人街，soho, 時代廣場

Coney island, 因近住處所以去看一下，有沙很幼的海灘，還有遊樂場。

有個機動遊戲好痴線，玩家坐在一球體內，球體兩邊連著電纜，電纜拉直時整個球被拋上半空轉轉轉轉轉再轉住跌返落黎，此步驟重覆數次，呢個設計真係別出心裁，好瘋狂。

又拜訪唐人街，上次是manhattan區,今次這brooklyn唐人街應該不是旅遊書上的景點，甚少遊客。之前去過的唐人街都是廣東移民為主，今次則是福州人居多，跟其他唐人街有點不同，整條街都很大陸，居民長相，衣著，社區格局和氣味全都很大陸，食物也不例外地很地道，又是遠遠一股孜然串燒味。

去唐人街途中經過一個墳場，名叫sunset park ，個名取得真好。

回manhattan唐人街走一走，竟然連車仔麵都有得食，味道還很不錯，唐人街太屈機，包羅萬有。好吃的店都跑到美國不留在香港了，畢竟美國賺錢較易，同樣一個車仔麵，香港賣三十幾港幣，美國賣六十幾港幣了，舖租也肯定平過香港。

在時代廣場路邊攤吃了串燒，見佢大大舊先食下，點知就係衰太大舊，舊雞竟然唔熟，真係好食到曉飛都冇用。

坐十二點幾的夜車去波士頓，車程四個鐘，又係唔夠訓既一個晚上。

地道福建味的魚丸和鹵水拼盤

Day 31 紐約：帝國大廈，大都會博物館，中央公園，時代廣場

星期日，舅父舅母繼續帶我們出去。

帝國大廈，附近太多摩天大廈，使得帝國大廈看起來有點其貌不揚。是湯唯在北京遇上西雅圖的觀景台啊。由八十六樓俯瞰紐約，高樓大廈極多，比香港更密密麻麻，幾乎整個Manhattan都是商業區，只有這付費區才能見到廣闊的天空。

另有一百零幾樓更貴的觀景台，其實高幾十米而已，景色都差不多吧，只是有錢人用來顯示身份的地方。

帝國大廈內的指示牌都是多國語言，唯獨一個牌只有中文簡體字，連英文也沒有，上面寫著 '證明書可到地下櫃檯索取' 。 我覺得奇怪就去拿一張來看看，嘖，美國證書竟印有中文簡體字，這張東西顯然是為中國人而設，勢力大到人地特登印一疊證書來應酬，強國果然是強。登上一個旅遊點都要用證書來證明嗎，太可悲了。

美國政府終於開始局部復工了。

大都會博物館，四大博物館之一，果然名不虛傳，光是超求其走一層已經花了個多小時，一旦走進去就沒回頭路只能向前走像ikea一樣。只是館內世界各地的藝術品包羅萬有，卻極少美國本土的作品。

以我鑑賞藝術品的能力，隨意走一下看看館內格局和規模就行了，所以很快便走完，結論是西方多是為藝術而藝術，東方則為宗教或實用而藝術，另外東西方都很喜歡標榜大胸。

中央公園，好大，好多樹，有個湖，是跑步放狗散步休息的好地方。用途就如大陸的人民公園，都是民眾休憩處，但這邊是添了分外國氣息，少了分熱鬧。

時代廣場，倒數勝地，原來平時電視影住倒數個條bar唔係想像中咁高。這裡五光十色，到處都是閃動的廣告燈箱和店舖招牌，很繁榮，也很熱鬧。

舅父特地開車帶我們去queens區食好野，很貴的韓燒，牛肉好味過香港的，泡菜湯也很濃，還有很多前菜。又讓人破費了，舅父母太好客，唔係佢地，我呢d窮撚唔會有機會餐餐食好野，仲飽到捧晒肚。多謝啊。

Day 30 紐約：唐人街，世貿遺址，華爾街，炮台公園，自由神像，soho，nba

翻看了一下自己的日記，食物相好像比風景相還多，因為我很少用手機影風景相啊，將就一下吧。

星期六，舅父舅母帶我們出去走走，他們很好人很熱心。

唐人街午餐，海鮮河粉加鹵水鴨，餐餐都食咁好仲幫我畀埋錢，太唔好意思了。

唐人街超市真係乜都有，久違了的夏枯草，甚至有香港超市也沒有的貨品，例如維他山水豆漿，好耐冇係香港見過。

幾乎去到每個城都要拜訪一下唐人街，始終都係有情意結。

起緊新世貿，今次唔敢起咁高了吧，其實如果係咁高既新世貿返工，再諗起911，應該會驚。

世貿遺址，竟然要入場費，雖然不多，但我不喜歡這種發死人財的行為。反正我就跟這地方無緣，排隊入場的人極多，多得快把場地繞幾圈，我才不排，也不願付費，沒進去。

華爾街，一條滿是商業大廈的街，這裡的天空很狹窄，遊客也多，都團團圍著那隻地標金牛，人多到咁，影出來有甚麼好看的, 唔明有乜好影，又是那種摸摸隻牛會發達的傳說.

炮台公園，可以遠眺自由神像的公園，但距離還是太遠，所以還是坐船去繞一圈靠近去看看。舅父母說平時沒有這種遊船活動，是因為政府shut down, 自由神像不開放才造就這些私營boat trip 。其實自由神像明天就重新開放，但坐船繞一周應是最好觀賞方法，我也省得明天再來。雖然撞正政府收皮，但都算不幸中的大幸。

船上，我走到船邊看風景，忽然後面有個洋妞話我阻住佢睇景，車，佢自己坐係位唔起身，畀人阻住怪得邊個，要睇景咪企起身行去船邊囉。或者佢文化唔同我，佢地睇景係坐係位？但觀乎成架船d人都係逼晒係船邊wor。

Soho區，很熱鬧，都市的感覺，比較有人氣。食pizza，餅底脆脆的，幾好，大大塊才十幾蚊港幣，香港貴很多。

NBA pre-season ，其實冇睇波好耐，但還是對籃球比賽有興趣，這場雖只是pre season不及season精彩，但已夠我這門外漢開眼界了。籃網對活塞，我認識的活塞球員全都不在隊中了，唏噓，運動員總是如流星一閃。主場之利超誇張，每次主隊入球全場會歡呼，客隊入球時全場卻一片死寂完全被無視或被喝倒采，要有多強的心理質素才能抵抗作客的壓力呢。說起來，一般球迷都對很支持自己主隊，可是皇馬曼聯等勁旅來港作賽時，甚少有香港人支持香港隊，很沒歸屬感。

美國麥記的蘋果批跟香港的不同，是焗的不是炸的，一蚊兩個，窮人恩物。

Day 29 費城：history museum of american jewish, 獨立廣場，自由鐘

倒塔咁早五點半起身，坐七點車去費城。

Megabus 幾好坐，早買（早一個月左右才超便宜，華盛頓去費城都只係三蚊美金。

在車補眠，前晚訓飛機，昨晚又只睡了幾小時，我總是將旅行搞到這樣子。六十歲時應該不會再這麼頻撲了，年輕真好呢。

久違的wendy's, 以前香港有，因為情意結而食一食，但味道一般。

又黎見識唔同城市既地鐵，今次入閘唔係用車票，係用token，個token賣畀你個陣仲要獨立封口膠袋裝住，好唔環保。講開環保，美國真係好多唔環保既地方，飲管又獨立包裝，買少少野又成日極大個紙袋裝住。

又是整天都不停下雨，加上睡眠不足，而且來費城只打算看看獨立廣場，時間很充裕，於是人也變得頹廢起來。一出地鐵站便見到pay what u want 的museum，便進去避雨順便逛逛，仲有得寄存行李，太好了，可以放下大包，因為門票是pay what u want ，我們這等囊中羞澀的窮人每人只給了一塊錢... 但這博物館的職員還挺好人的，而且這館的廁所也很一流，真沒來錯（重點啊，美國廁所不好找呢）

後來在紐約見到american indian, American asian 的博物館，似乎美國的各式人種都有個博物館。

獨立廣場，自由鐘還是沒開放，政府繼續停頓中。遠觀了一下，因為下雨所以不久留了，鑽進cafe，忍不住買了chocolate brownie 和蘋果批，很好吃，連我這個不愛吃麵包的人都讚不絕口，麵包糕點們都閃閃生輝的向我招手啊（雖然brownie和apple turnover 不太算是包，但美國的麵包做得真不錯）。

在星巴克坐了很久，避雨。美國星巴克沒有green tea latte，綠茶的茶味很濃，一元多點，美國物價來說很便宜了。

費城也是古色古香的城市，但沒華盛頓那麼殘。費城到處都寫有freedom的字樣，感覺真好，我能離開香港站在這裡就是因為有一定程度的自由，要珍惜旅行的機會。我這種自由跟一個國家一個民族的自由比起來還是太渺小。

五時坐megabus，終於去紐約了，跟舅父一家會合，一起到唐人街晚餐。貴妃雞，炒通菜，粟米魚肚羹，椒鹽鮮魷，還有雙龍蝦，啊，太奢華了，舅父一家都冇乜食那兩隻龍蝦，都是我們吃，好耐冇試過咁大魚大肉。中國人真好客，仲要請得體面，明明自己唔多食龍蝦都要整兩隻擺出黎，不禁又想起王力的請客。

謝謝款待，未來幾天都打搞他們了。

Day 28 華盛頓：白宮，林肯紀念館，越戰韓戰紀念館

夜機四小時去亞特蘭大，之後再轉機兩小時去華盛頓。本來都已經冇得點訓，機上坐我前面條友又仲倒瀉野飲，we 哇鬼叫，一把年紀啦阿姐，倒瀉野姐駛咪叫到撞鬼咁啊。地下濕左我抱著袋睡只好。

好耐未試過坐飛機耳鳴，飛亞特蘭大個程好嚴重，就黎聽唔到聲，耳都痛埋。落機精神不振，去廁所嘔下，其實我係個成日嘔既人但通常嘔完就冇事冇人會覺得我有嘔過。

經過冇機票唔夠訓一系列身心俱疲事件後，去到華盛頓仲要落雨，真係冇心機出去行。

Hostal 老闆好mean，態度一般，人地問佢野佢唔耐煩，答d野又唔夠有用，我夠知有巴士去白宮，幾多號車先得嫁，仲有明明兩個人一齊黎住但又唔編兩張床一齊，又唔係冇位。訓多人房上格真係唔方便。hostel 老闆煮左湯畀大家飲，佢都算有好的時候。

華盛頓比三藩市殘，但較古色古香。地鐵售票機很難用，香港那種按站名買票的方法最方便，但三藩市和華盛頓都是先在圖表看要去的站車資多少，再輸入需要的價錢買票。三藩市那部還好，華盛頓這部真係唔識搞。

去過好幾個國家的首都，都不是該國最繁華的地方，華盛頓也是。

Hostal 隔壁有牙買加餐館，挺便宜，試一試別國風味，很不錯，雞肉非常入味，喜歡這個多於美國菜。總覺得美國菜不變化不大，沙律都是比食材新鮮與否，煲湯又來來去去白湯紅湯，係漢堡可以比一比塊扒，同埋薄餅既新口味可能性大d，但都係中國菜百變屈機，可能我偏坦自己人同埋對美國菜認識不深吧。只係我好奇，我地病左會食粥之類清淡既野，美國菜全部咁熱氣，究竟佢地病個陣係咪都照食呢d？

華盛頓的車站很大樓底很高，很喜歡這種設計的車站。

下雨照樣踩單車，美國路邊總有些單車畀人租，可以踩去其他地方還，華盛頓是七蚊一日。雖然租車設施完善，但單車徑時有時冇，馬路邊又經常路面不平，險象橫生，有待改善。幸好司機們都很禮讓，如果係香港仲唔畀人咇死？

冒雨踩單車到白宮，林肯紀念館，政府仍未恢復運作，只能觀賞外圍。林肯紀念館有點像中正紀念堂。美國實在很多這些紀念館，還有更多更宏偉的建築物，所以我望著白宮都沒太大感覺。

晚上去看冰上曲棍球nhl，雖然唔識規矩但都好睇，就像唔識圍棋都會覺得棋魂好好睇那樣。氣氛好好，華盛頓應該係多人支持ice hockey主隊capital多過nba主隊巫師，我黎得正好，不過太累和太夜，冇睇晒就走。

呢度係我第一次見男廁要排隊，女廁唔駛排既地方。

好痴線，呢個世界太多溜冰達人，溜得唔好，連地都冇得你拖。想起自己中學時有好一陣子想做溜冰場職員，因可以日日免費溜黎溜去仲有糧出，但明明自己溜得好平庸，哈哈，這種是說說就算的妄想。

走到唐人街吃越南河粉和春卷，自從到過越南我就不斷在各個地方想找回越南的味道，這次又失敗了，但也好吃，是香港越南河的味道,究竟係咪我記錯左越南味，點解一直都搵唔返呢個味。很想念越南，也很想去柬埔寨和老撾。