Day 1 京都

- 星期四, 放工, 回家, 沖涼, 食飯, 去機場。充實到咁。

今年的最後一個旅行, 依然是夜機. 回頭再看微微燈光, 無止境寂寥不安~ 雖然又是獨行, 但可能知今次去的地方相對安全, 是個MDC, 所以完全沒淆底 (上次柬埔寨出發前都有淆)

-  delay 1小時, 當地時間6點到了. 覺得一切都好新奇, 像跑進了RPG遊戲, 又像漫畫裡的世界. 馬上見到大量汽水機, 又有比卡超, 又有多功能廁所玩. 暖水洗屁股還有暖暖的廁板。WOW~ 這就是日本~~~ 名不虛傳! 在機場擾攘了很久, 加上排隊買icoca,  差不多八點才走.

-  其實有個icoca+ haruka列車的套票可買, 但聽說haruka班次很疏所以我只買了icoca. 結果一下月台剛好就上到了haruka, 早知買套票.

- 坐上haruka, 車長檢票,  踏進車廂和離開前都會鞠躬打招呼. 我遞出了icoca, 車長說我的icoca是empty, 我付錢另買了車票。

- 列車椅背上有個小袋, 是只放得下卡片或name card的大小。本來不知有甚麼用, 檢票時鄰座女人在車長未殺到前就將車票放了進去, 車長來到自動撿起了車票。 原來是這用途, 開始體會日本人的細心。

就係黃色個塊野上面那一格袋仔

- 大約兩個幾鐘, 到了京都, 用icoca出唔到閘, 職員叫我去增值。兩天後我才想起, 自己是否該用車票出閘, 而非icoca呢, 因為用icoca出閘時好像扣了很多錢, 再加上車票錢, 我好像花了很多錢在這程車上。而我也不知道真正車費該多少, 我沒做好資料搜集。

- 旅館在七条。途中經過神社, 大河堤, 一切真的跟我在漫畫裡看見的日本一樣, 覺得很美好. 一大群OL從京阪電車站走出來, 看看他們的衣著配搭, 發現他們戴頸巾的方式很一致, 都是尾巴在後頸打一個平結.

- 路邊有人派贈品, 每份都厚厚的, 都沒人取, 他遞來我面前, 我接過了, 因為想知道他派甚麼. 除了產品資料, 還有一本A4 size單行簿和A5 size folder, 款式精美, 媲美文具店賣的商品. 連贈品都做得這麼精緻, 我對日本人的好感又提升了.

-    旅館在一條安靜的小巷裡. 門沒鎖, 裡面沒開燈, counter沒有人. 在天台找到了正在洗床單的老闆娘, 他只會日語, 不太溝通到. 我的房間沒有鎖, 但這裡感覺安全, 應該沒問題.

-          十一點, 外出. 漫步京都街頭, 安靜得像新加坡, 但這裡比較有人氣. 吃sukiya牛肉飯, 有鐘仔. 食客全是男人, 其中有群穿校隊運動服的平頭裝小伙子, 有種香港學生少見的熱血感. 香港學生朝氣比較不足.

-          走到京都駅坐巴士去下鴨神社. 坐車時發呆, 悲自己將學過的日文都忘得一乾二淨. 原來巴士不收icoca.

-          下鴨神社, 這裡不是最熱門的神社, 但我覺得自己必須要來, 因為朋友曾送我一枚購自下鴨神社的書簽, 相信他想跟我分享, 希望我也喜歡才送我, 所以我要親自來看看這個地方.

-          我第一個去的日本神社, 只是旅館附近的小神社, 下鴨是第二個, 我覺得很大, 屋頂上雪還未溶, 人少, 偶有穿得跟火野麗一樣的神女走過; 旁邊有個拜美麗神的神社, 繪馬都是鏡子形; 神社後有片大空地, 兩旁大樹掛著半紅半黃的葉, 要是季節對, 應該可以見到很美的紅葉.

-          我喜歡這裡, 有種神聖和莊嚴. 最重要是人稀, 我很討厭人多. 作為來到日本的第一個checkpoint, 我帶著滿足離開.

-          想去二条城, 似乎沒巴士直達. 巴士轉地鐵. 在巴士下車時全車人等我笨拙地用完找換機才能開車.

-         時間尚早, 決定先去友人推介的天下一品吃個拉麵. 找不到, 問地鐵站職員, 原來近下一站. 我有時間, 走路過去. 食客都在吃套餐, 就是一碗拉麵加一碗飯沒記錯好像還有餃子, 食量真大. 我喜歡濃厚的湯底, 天下一品合我味道, 是我迄今為止吃過最杰最稠厚的湯底, 網上甚至有人誇張地說將筷子插進湯裡也不會倒下來. 但這裡的麵不是我喜歡的幼麵. 事後跟友人說起, 他說粗麵吸湯掛湯力較好. 也對. 但我還是喜歡幼麵, 像一蘭那種.

 -          店裡一名食客, 老伯年紀, 邊吃拉麵邊大剌剌地看H漫, 看得那麼旁若無人, 那麼悠然自得, 那麼滋滋有味. 我相信要是有人過去搭訕, 他必定滔會滔滔不絕地分享讀後感, 展開一場歡欣愉快兼沒完沒了的H漫討論. 原來日本這麼開放, 我想.

 - 二条城. 對面已是民居. 每日一打開窗就見到世界文化遺產, 地價會否較高? 唉我很現實. 二条城雖大, 但佈置還是樸素. 見到兩名操普通話的男子用自拍神棍, 感覺很怪. 有D野男人做同女人做真係好唔同.

覺得這種日本拖鞋很難穿, 每行一步都就甩就甩咁.

-          探訪過德川家, 又走回頭路(已經第三次行這段路了) 回到天下一品那邊, 行超市. 腳很累, 沒心機行, 隨便逛逛, 試食了兩舊三文魚魚生便走了. 魚生都有得試食. 日本真是個不拘小節的國度.

- 甚麼新京極, 錦市場, 我不懂分辦, 隨意亂行, 我統稱這一帶叫四条河原町. 我對買野冇興趣. 就不停吃. 吃唐揚, 吃章魚燒, 其實這章魚燒好吃, 質感比香港的好, 只是我一個人要獨力吃完八粒, 好飽.

- 睇初中生打太鼓, 位位都是高手. 真不得了, 我覺得太鼓是日本國粹.

- 夾公仔店. 我一走進去職員哥哥招呼我, 話畀我免費玩一鋪. 其實我只想自己靜靜地夾下, 但佢係咁跟住我, 於是我順他意玩了, 夾不到, 打算走. 佢又七情上面好肉緊好hyper好energetic咁話爭少少, 鼓勵我再試下(自己畀錢), 見佢咁落力, 於是我畀錢又玩了一鋪還是夾不到, 又打算走. 佢又再激勵我但不果, 便開埋隔離部機畀我免費玩一鋪, 我再次夾不到, 他又再激勵我, 我不玩, 不想再投資在這裡. 他又再激勵我說他負責對準左右位, 我只需負責前後. 我還是不玩. 終於他送我一個動漫印仔作安慰獎目送我離去. 其實我真係只想自己靜靜地鳩夾, ,而非在職員哥熱情招呼下花幾百yen, 跟想像中有出入, 覺得駛大左. 同時佩服日本人的精力充沛與敬業.

- 突然發現一蘭, 掙扎吃不吃, 因為很飽, 但又想吃. 最後還是吃了. 以往的旅行經驗告訴我, 千萬不要抱著明天會再來的心態, 這樣會錯過很多東西. 世事總是千算萬算都算不準.

- 明明選了濃厚但湯底還不及香港一蘭般厚. 我失望. 加上真的飽, 沒有覺得很好吃, 甚至覺得香港一蘭更好. 事後跟不只一位友人分享, 他們都說日本一蘭比香港一蘭好味. 我dum心口, 我很喜歡香港一蘭. 來日本朝聖卻沒好結果. 認為自己吃到了一碗不濃厚的錯體.

- 旅館房間很小, 就照片裡那樣. 對我來說美好的廁所還有窗戶較重要. 訓tatami是其中一項我想試的體驗, 現在完成了. 其實跟打地鋪差不多, 沒甚麼感想.

- 浴室在天台, 因為是另外搭建的小屋, 牆身很簿, 超級冷. 而且天台露天, 風簫簫, 更冷. 每晚洗澡都像寒冬起床一樣是一項挑戰. (而我到最後一晚沖完涼後才發現ground floor有另一個浴室! 顯然地下浴室比天台浴室溫暖多了. 只怪我入住時聽不清楚老闆娘介紹設施.)

- 話說, 我用鹹水洗手洗面刷牙足足三日. 真是柒到爆開. 這裡廁所很新奇. 只有馬桶, 沒有洗手盆, 沖廁時馬桶水箱上的水喉會出水. 我覺得日本人是乾淨的民族, 如廁後必會洗手, 於是我用馬桶頂的水洗手洗面刷牙. 唯一問題是要不停沖廁讓水喉keep住有水出. (本來一直覺得沒問題, 直至去到下一間旅館, 又遇到這種設計的馬桶, 馬桶頂上有張紙寫住"please don't use this water", 我才意識到這水可能是鹹水. 

- 然而我後來check過, 呢個設計係想洗完手既水入返落水箱用返黎沖廁, 環保又慳位. 所以D水係用得既. 原來我冇柒到. 香港單位咁細, 都可以考慮下整個咁既馬桶.

腐敗。

自從日本回來一直過著腐敗的日子, 吃很多也不飽, 昨天連續幹了兩份茶餐廳早餐(大坑來說我覺得祥勝的豬扒比炳記好味啊),但不想吃精神食糧。有句經典金句如此說: 不讀書的人走萬里路也只是郵差, 這顯然在說我無誤。

說到這, 想起吳哥窟裡, 有些小販賣吳哥窟書, 厚厚一本才一塊錢美金, 也乏人問津, 賣其他紀念品的小販生意好多了, 或許想深入了解吳哥的人其實不多, 大家都是來繞個圈而已。又或許有心認識吳哥的人, 出發前已做好資料搜集, 不用老遠買本書回家。

事實上只想食買玩的人還是較多, 卻又認為以此為宗旨的旅遊節目俗不可耐。此等人俗也要俗得比人高尚, 他們於山之巔俯瞰我這小如塵埃的走地郵差, 我也仰望他們, 連塵土也沒見到, 只有nothing。

(真臘風土記) day 7 金邊, 新加坡

今日晏晝先飛, 其實可以唔駛咁早起. 不過自動波醒左, 即管去睇下皇宮今日有冇開.

係有開既! 金碧輝煌, 見證高棉興盛的曾經. 同場好多大陸人.

比起皇宮, 印象更深的是皇宮附近有學生做義工執垃圾, 佢地唔係就咁拎住個垃圾袋隨便hea, 而係一見到有垃圾就狗衝過去執左佢, 非常賣力. 諗起自己以前去沙灘執垃圾, 垃圾都畀人執晒, 我求其倒D沙入垃圾袋等個袋有D重量, 真係好曳.

行完皇宮, 仍是晨早流流, 看看洞里薩湖和湄公河, 睇人拆送水節燈飾. 沿河走回旅館. 途經一家在小巷擺檔的麵檔, 吃個咖喱牛肉麵, 這大概是本趟旅程最後一餐柬埔寨餐了. 根據連日經驗, 真係食街邊檔仔好過食餐廳, 或者係我唔識搵好味既餐廳. 入親餐廳D野又貴又唔特別好食, 街檔反而時有驚喜. 今次呢檔, 又唔係話非常好食, 味道像即食麵, 而且挺油, 但桌上一整壺茶是免費任飲, 也甚貼心.

連張凳都有公司名, 廣告/sponsor無處不在

時間仍尚早, 在旅館旁CAFÉ喝了個只有香蕉味的士多啤梨香蕉奶昔.

然後, 終於坐tuktuk去機場. 候機時間相當充裕, 無驚無險回到新加坡.

一到新加坡機場, 滾進亞坤, 咖央多不夠脆太令人失望.

本來還想再吃一次肉骨茶, 但吃完亞坤已經飽了, 而且唔見有賣, 就將全部錢都拿去買了班蘭蛋糕. 真係難得有手信畀家人, 好不孝.

餘下時間不停遊走於三個terminal之間, 大係大, 但我覺得禁區外其實冇乜好行. Hea了很久, hea到保安都認得我, 笑說我個背包seems heavy. 終於有得checek in(我不是轉機, 我買的是兩段式機票). 凌晨機真係難等. 禁區內找到了賣肉骨茶的店, 但那是即使我沒買班蘭蛋糕也不夠錢吃的價錢. 沒緣了.

原來禁區裡還有個蝴蝶館, 不過外面下雨, 而且時間太晚關門了.

一星期過得真快, 轉眼又滾回香港了. 回到家樓下才八點多, 順手買個麥叔叔早餐諗住畀家人食, 點知佢地竟然未起身.

獨力完成一次旅行, 感覺非常良好. 下個月又有下一次, 好野. 但在這之前, 第二日又要返工. 嗚呀.

聚焦香港，放眼世界/ 總結全年要聞，掌握時代脈搏

2015了, 我的真臘風土記尚欠最後一天未寫, 然後剛過去的日本上海十天行又未動工. 在踏入水瓶座時段前要寫好. 本來日本Day 1在旅途上有寫, 旅行前也寫了一篇近況略記, 但, 兩篇都因個app hang左而沒了, 狀態一直是saving沒能再開出來, 所以, 再寫吧.

(剛發現, web版開到個draft, 太好了, WOW)

年底覺得自己寫稿忽然明顯好左, 多聽903可得到啟蒙.

一年伊始, 去添好運飲個早茶添好運, 行山上釣魚翁, 登高見博.

雖然本年的一月一日錯漏百出, 出門冇帶八達通, 紙巾, 手表, 又去左毫無誠意冰雕好粗糙搭車時間又耐既冰雪節, 好彩我係揸免費飛(雖然特殊日子還是要補30蚊).

然後著爛左對boot. 都算如我所願既, 爛左就可以買對dr marten或甚麼.

然後然後, 來到一月二, 順利趕到巴士返工但繼續錯漏百出忘了戴眼鏡.

2013時希望2014春光似海盛世如花, 雖然這年過得相對平凡(因為2013的南美之行太無可比擬了), 還是去了四次旅行, 其中兩次自己去; 六個國家, 其中四個第一次去. 都為我好好充電. 尤其獨自上路不能依賴, 經驗值增加不少.

2014冇乜睇書, 少左行山, 堅持晚晚踩單車同做七分鐘fitness堅持左一陣咁大把(可能是一個月?).

仲有開始學電單車, 上左兩堂.

今年還不知會幹嘛, 可能會去working holiday? 再算. 總之目前先考好電單車牌, 其他的, 無悔驕傲就好.

歲晚, 繼續節外生枝。

還欠最後一日柬埔寨未寫。

最近終於開始學電單車, 上了兩堂, 第一堂覺得好難, 架車又重, 我成日停車企唔穩跌腳, 第二堂卻好多了, 因為原來我之前冇踩腳break, 搞到剎車好chok。

(真臘風土記) day 6 金邊

今日冇乜非做不可既事, hea 到十一點幾十二點先出門。

話說尋日tuktuk司機問我今日會去邊, 佢想我今日都包佢車. 但我尋日已經覺得貴, 加上我想自己行下, 所以拒絕, 我仲話自己第二日會有朋友黎搵我所以唔駛tuktuk. 雖然我咁講完佢都應該唔信, 因為佢繼續游說我包車.
然後今日一步出旅館就見到佢係門口, 佢仲笑騎騎咁問我 "你個friend呢?"
嗚啊, 完全感受到佢個股恥笑味. 媽, 好柒啊!

皇宮冇開門, 應該係因為假期, 送水節連放三日。

皇宮隔離就係博物館, 有開, 但入場費五蚊, 覺得貴, 冇入去。加價加得咁快, 早兩年旅遊書寫兩三蚊咋嘛。

行去中央市場, 途中好受tuktuk司機歡迎, 沿路不停揮手問我要唔要坐tuktuk, 通常笑住話no佢地就微笑住咁收聲, 唔會糾纏。就黎行到中央市場時,又有司機向我招手。
司機: tuktuk?
我: no~
司機: no? Where are u going?
我: (指住前面中央市場的方向) there!
司機: ha? There?
佢個表情話畀我知佢覺得我係一樣好新奇既生物。

又去中央市場, 又平又好味, 鑊氣即炒貴刁, 好足料仲有隻煎蛋, 蔗汁都好味, 燒魷魚都想食但要三蚊。

炒緊貴刁

好香好大的魷魚, 但要USD3

中央市場隔離就係六層高大型商場sorya shopping centre, 講係咁講其實也不大, 香港人見慣大商場。商場有超市, 仲有好多間炸雞店, 我在暹粒吃的lucky 炸雞也有。

商場電梯口經常擠了一堆人, 第一次見時以為有甚麼意外例如電梯壞了, 走近才發現d人係唔敢企上電梯, 他們好不容易壯了膽子跳上去, 安全著陸後還會跟朋友笑作一團, 似乎沒甚麼用電梯的經驗。我在暹粒都遇過這情況。我本來沒想到柬埔寨人會覺得電梯是新鮮事物, 後來想想也明白, 金邊作為首都, 暹粒作為旅遊重鎮, 商場和高層建築也這麽少, 民眾接觸電梯的機會的確不多。

angry bird丸, 孤陋寡聞, 第一次見

成個貨架冇一樣野係made in cambodia

行去郵局, 寄明信片郵費不貴, 比旅館的報價便宜一半, 旅館還說他們的收費跟郵局一樣, 騙人。

郵局附近有kfc, 本來諗住寄完明信片去睇下有乜香港kfc冇既特色雞, 仲可以涼下冷氣 (因為柬埔寨冇乜餐廳會開冷氣), 可是行過龍費事行返轉頭, 冇去到。

河邊同尋日一樣好多人野餐, 好多車仔檔。

炸蟑螂

忽然有堆氣球飛晒上天

買豆奶, 有個路過既阿姐見我同小販溝通唔到, 主動用普通話同我講野, 幫我翻譯, 真好, 遇到好人。

返旅館休息一陣, 上網睇下仲有乜想做想食。

又再去河邊, 找到想吃的包子, 又買了盒炒麵(因為多本地人買)。多本地人幫襯真係好味d。

金邊連續兩晚都落左場好大既雨, 雖然一陣就停雨, 但我發現d人係唔帶遮。落雨都係得我開遮。

河邊有幾個流動廁所, 不過見到個樣已經唔想去, 排隊的人都掩著鼻很痛苦的樣子, 所以我都無謂行近。觀察左一陣見排好耐(即係臭好耐)先有得去, 真慘。

我問賣包老伯可否影他的包, 他馬上將包子疊到靚一靚畀我影. 好友善.

(真臘風土記) Day 5 金邊

早兩天金邊去暹粒，在巴士上也睡得很好，但這次倒過來暹粒回金邊，路不知怎地比去程顛簸許多，夜裡我幾次被晃到醒過來，不過精神還是充沛。

再一次，很準時地，六個半鐘就到站。其實旅館離車站不遠，就25分鐘左右的腳程，但想起昨天旅館老闆和洋女的被搶包經歷，還是淆底，覺得揹著大包在路上走太招搖，還是選搭tuktuk。司機叫價六美元，太貴，還到五元，其實我還是覺得貴，但又想起友人說可以隨便給你便宜價錢的Tuktuk有可能會跟其他摩托車約好在乘坐中途來搶包。於是我又淆底了，五元好了。

到了旅館，時間還早著，六點幾。反正時間充裕，等到九點check in，洗過澡涼個冷氣再出去。

坐tuktuk去殺人場, 門票已經漲到六美元了。

那個放著大量頭骨的塔沒想像中恐怖, 反而有點安詳, 可能因為日光日白, 個塔又新。

戴著講解機繞一圈, 看看樹, 草地, 水池, 逝者遺物, 全場遊客都好靜。我腦裡最有畫面的是揪住細路頭髮fing佢撞樹。

坐車途中唔小心訓左, 好彩冇人搶我袋。

S21監獄博物館, 可能因為室內關係, 我覺得好陰森, 好多間房仲貼滿遺照, 他們長相也很像, 看得心裡發毛。這裡本是學校, 操場那個做引體上升的架, 成了絞刑場, 人類很恐怖。這裡也有到堆頭骨, 還有一個上香紀念先人的金房間。

中央市場, 好多乾貨賣, 電子用品, 衫, 珠寶手表都多, 反而手信只有少量。我最感興趣自是濕貨街市和熟食區那邊。題外話, 話說我發現柬埔寨人好識歎, 好鍾意到處掛吊床睡覺, 路邊攤檔主, 街市檔主都鍾意係自己檔掛個吊床邊睡覺邊看檔, 好寫意。連街市好窄既檔口都會唔知點樣搵到個位訓覺。

熟食區好多野食, 又不貴, 好多野想食, 吃牛丸河還送一杯冰涼的茶, 然後又吃了用粉皮包著的春卷, 裡頭有菜和叉燒, 再吃了蛋皮包芽菜雞肉。吃蛋皮時鄰座阿叔跟我聊天, 他是公務員, 去過很多地方, 想去香港。佢仲幫我畀左蛋皮和熱情果汁的錢, 好好客。

要撈勻黎食

這個放在地上, 或許是供奉用?

最初同tuktuk司機傾價時, 我本來只打算去殺人場和監獄博物館兩個地方, 但去埋中央市場的話司機開價都一樣, 於是就去了這三處然後回旅館, 其他地方我想自己行去。

廣告無處不在

可是由於送水節封路關係, 司機在一個不知名路口放低左我, 行返旅館途中見到廣場好多攤檔, 又有試食, 像嘉年華會, 當地人一家大細咁黎, 好熱鬧, 不過冇乜野岩我買, 而且太熱, 行左一陣返旅館避暑。

兩個鐘後我又彈返落街。沿河邊走, 那段路變了行人專用區, 滿街都是人, 河邊好多人野餐。

求其搵左間餐廳坐低hea, 食左類似咖喱飯既野, 味道普通。次次去親餐廳野食都冇乜水準, 餘下日子都係街邊食算。

Hea夠, 走路回旅館, 河上忽然放煙花, 放左好耐, 半個鐘都有, 真走運, 遇上送水節。

成功曬黑, 好滿意