Day 2 豐島、小豆島

第二天

早餐：wyman表示令人不能自拔的Family mart蛋治。我第一次食，確係幾好，香滑。

八半便早早出門的一天。本來打算小豆島一日遊，為了感受一下《第八日的蟬》和《為了n》，但鑑於某程度上認同友人對高松的感想，而他又力推豐島同時力踩小豆島，所以臨時改行程，先去豐島再（堅持）去小豆島。又話說，我係前幾日見朋友去，先知呢期有瀨戶內藝術祭，仲要原來係三年一度，我真走運。不過本來就算冇藝術祭我都（堅持）會去小豆島，嘻嘻。

高松去豐島的船不多，及早出門先去看高松港旁的高松城和玉藻公園，原來高松城一早冇咗，得返石躉。

怕客滿上不到船而早早去到港口，結果載客量幾十人的小船都坐不滿。

天陰，瀨戶內海灰色，海不常藍。想起年初去濟州牛島，海也是灰色。上ig碌一碌，都是加filter變藍的海，這樣好嗎？

十一點已到豐島美術館，派籌竟已派到1245，原來真的應該預約。

餐廳也全都full booking，有間頹飯但不想吃，沒料到島上連便利店也沒有（我沒見到，小豆島也是），應該買定family mart啲嘢黎食。

路過一藝術品但沒進去，是一眼望晒那種很小的房間，藝術我又不懂。

去了徒步20分鐘山路距離的藝術品，名叫「竊竊私語的森林」，原來是深山裡掛了一堆風鈴叮叮噹噹那樣。感想：⋯⋯

行20分鐘山，完全遠離其他景點是為了這個？其實風鈴聲又不是不美妙，都有feel嘅，大概是想先要你行廿分鐘勞其筋骨然後累了之際就聽到這精靈的聲音吧。但我心裡期待更強的彩蛋。藝術真是⋯

開始構思以後行山掛個風鈴喺袋。

午餐：蕃薯雪糕

豐島美術館，因為我事前完全冇search呢個館係咩黎毫無概念就去左，所以入到去好驚喜。雖然網上圖片很多但我不穿橋了。

有令我諗起清真寺，都係好舒服嘅放空地方。然後覺得日本人平時好繃緊好慘，要特登起個建築出黎先有機會放空，伊朗啲人唔需要美術館，已經日日都過住呢種do nothing嘅生活，係公園就地訓覺同野餐。

小豆島

雖然友人對小豆島作出嚴重指控：藝術祭啲藝術品好散，交通配套好差，很出名但配不上，雷聲大雨點小，好少去日本會嬲，但今舖堅失望。

不過我還是要親自去去。本來我還想在小豆島住一晚欣賞星空，但看到價錢後我就很廢地卜返住高松算。又，本來打算去寒霞溪行山，但花了半天在豐島所以不去了。

港口旁的手信店很好買。

小豆島沒想像中荒蕪，人口似乎不少，是個安靜的小鎮。

果然很不遊客向，要穿過住宅區才到景點但沿途沒甚麼指引，人影也沒有。要是沒有gps我一定會以為行錯。

見到名為「天神神社」和「放哉紀念館」的地方，相信是可逛的景點，結果原來都是墳場。

地圖寫到「迷路之町」好多野食咁，但幾乎全部午休。放棄午餐了。

本來打算潮退時份才去天使之路，但唔食嘢的話Hea唔到咁耐，小豆島又真無冇乜野做，還不如早點完成行程回高松。本來打算去高見山，不去了。

比預定時間早到很多，一個人出門總是會這樣。天使之路仍未露出海面，但遇上夕陽，也不錯。

小豆島作為無甚目的隨處閒逛的地方其實不壞，也沒有想像中荒蕪，島上產業和公司也不少（豐島就真係荒蕪喇）。但如果想去超出徒步距離的地方就真的太不便，我行咗咁耐都冇乜見過巴士經過。不難想像年輕島民對大城市的嚮往。

回到高松，連鎖烏龍麵店-めりけんや(Merikenya)，吃名物讚歧烏冬，幾煙韌，想要湯烏冬點錯了撈烏冬，用生雞蛋撈幾有趣（後來才知道應該加埋醬油落去撈）。天婦羅很普通。

趕在八點收舖前衝入loft和tiger，沒有斬獲。反而遠遠望見loft旁的扭蛋機時，突然想起同事幾個月前想要的chucky扭蛋，走近一看竟然真的有。很奇妙，之前一直都有看扭蛋但沒想起同事也沒見到chucky，一想起就找到了，之後也再沒遇到chucky了。

今天還是想吃烤肉，但今次呢間pikopiko精肉店係自己燒，燒來燒去都覺得不完美，上網查晒點燒燒幾多秒都唔係我心中嘅效果。下次都係搵返師傅燒埋嗰啲烤肉好了。不過都係好食嘅，件牛就是靚，糟蹋唔到。店內可食薯，可惜忘了買。

想再挑戰骨付鳥，去了「蘭丸」，雖然店是1am收，但十點半去到已經完售。改去天下一品，令人懷念的味道。

日本好似已經冇蜜瓜薯賣，遍尋不獲。

回hostel梳洗執袋後研究明日行程，原來金刀比羅宮上山要兩個鐘？琴平去機場的巴士兩個鐘一班？我三點登機，咁我咪要五半起身，六點出門，七點開始上山，九點開始落山，預鬆啲食飯亂逛蕩失路時間，一定要搭上1220的巴士？

呢一刻已經係凌晨一點半。