Day 1: 栗林公園、瓦町

Day 1 栗林公園，瓦町

因為預計到今年的假會早早用光，但又想散心，所以早於五月已經買了十月去高松三日。結果時機真對，這局勢下真的需要離開抖抖。

一直無心去查究竟有乜景點，只記得健吾話多好野食，但我連食乜都冇查。

機場搭無人駕駛時狀態只是「預備登機」，去到閘口竟然已經得返地勤在叫final call。

我又唔記得帶筆。

帶了原田舞葉《歡迎回來，旅人》，很適合在路上看，原田舞葉一直有描寫人物太片面的問題，這本算比較有血有肉，雖然劇情很狗血兼肉麻，但我覺得是她暫時最好睇的作品，還看到傷風。

歡迎回來，日本。

得三日時間緊迫，前一日諗咗第一日行程，一下機就迅速柯尿洗屎忽（很重要這是回到日本的儀式），馬上搭巴士，售票員找錢給我時溫柔地輕托我手背，可惜我洗完手是濕的，我自己都覺得好嘔心，希望他不要留下陰影。

去栗林公園，四點半（好彩唔係四點）最後入場，我四點零四分到。

超少人，因為下著不小的雨。回想過往我一個人去日本園林經常都是下雨，不知是因為日本本來就多雨，或是因為我堅持下雨都照去。

要小心泥濘的關係沒法好好賞，而且下雨天灰灰的景色大打折扣。大雨關係只挑了西區（因為大啲），選對了邊，看到我想看的風景，我就是為了飛來峰的景色而來栗林公園。

芙蓉峰景色也好，呢個峰因為樣似富士山而命名，不過我站在峰上其實就睇唔到山的形狀。飛來峰亦是為模仿富士山而建，太多翻版富士山令人納悶，明明他們都是正版的自己。

Hostel就在商店街旁，設施又新風筒是dyson，日本而家啲床位Hostel咁正嘅，仲正過當年啲太空倉。

「夢路」烤肉店吃名物橄欖牛，師傅烤很棒棒，巧巧味牙。

另一名物骨付鳥，第一名那間「一鶴」排隊排到出馬路，唔食住。

商店街亂逛，雖然條街好長，長到我冇行晒，但明明只是八點幾很多店已經關門，人流稀少好冷清。

友人剛去完高松話其實都幾悶，果然所言非虛。

八點半回去骨付鳥，不用排長龍了，等十分鐘入座，一個人也是坐四人枱。骨付鳥其實就係燒雞髀，有分斬左（母雞）同冇斬（雛雞），斬左好似日式啲但因為我驚太大隻好飽，所以揀左唔斬。結果發現母雞與雛雞大小好似冇分別。後來上網睇啲人話斬左會好韌，想肉嫩多汁就揀唔斬，好彩。

係好食嘅，塊皮好香口，肉醃得好味，但太貴成1000 yen，雞髀在香港又不是罕見東西。「骨付鳥在華人圈看來可能沒什麼特別的。可是日本女性在1950年代前，都沒有機會在外用餐時拿起雞腿大啃特啃。丸龜市有居酒屋老板在荷里活電影中看到女星豪放地啃雞腿的模樣，便執意在日本推廣，創作了先煎後烤、風味十足的骨付鳥，成為了丸龜市知名的B級平民美食。」