Still alice, hea爆扮公室, 寄生獸, 叮噹。

嘗試每次看完戲都寫幾句。

Still alice
- 身為語言學教授, 最後忘盡曾經無比熟悉的詞彙, 發音, 最基本的溝通也做不到, miss her words, miss her rational thinking, miss herself。這種生活太難堪。

- 如果我患此病會怎樣, 如果家人患此病又會怎樣。

- 我人太躁, 需要更多耐心和同理心。

Hea爆扮公室
- 以色列喜劇。第一次看以色列戲, 好滿意。

- 幽默中有訊息, 荒誕又寫實, 這麼有趣的電影。軍旅苦悶的生活, 道德低落的社會風氣,  女性被用完即棄, 對大城市生活的追求, 友好同事成為自己上司後的友情轉變, 辦公室工作浪費光陰。see, 一套戲用誇張喜劇手法帶到咁多訊息出黎, 多犀飛利。

- 踩地雷, 釘槍, 接龍。自殘, 處女, 鬼上身, 碎紙。

- 卡夫卡曾說過, 人生最大的枷鎖, 是辦公室的文件。

寄生獸
- 唔好睇, 一味打鬥, expect佢會講既人類社會議題但講唔到。淨係開頭旁白反問幾句: 少99%人係咪就可以少99%環境破壞?
之後劇情冇再提過。
到最尾旁白再問多一次一樣既問題。
既然擺明車馬諗住拍打鬥片就唔好講呢幾句反問啦, 而家不倫不類。睇左原著既捧場客會覺得講唔到重點, 諗住睇打鬥既又唔覺好精彩絕倫。
如果呢篇係一篇作文, 我會評價佢係離題, 零分, 重作。

- 仲要睇完先知原來有第二集, 呢套野根本冇打算一集完, 又唔早響。而家睇左第一集咁唔好睇, 第二集仲睇唔睇好?

叮噹
- 開場冇播叮噹主題曲, 有所缺失, 其實可以選擇在開場不久大雄用竹蜻蜓時播。但我只想聽舊版主題曲, 不想聽新版。

- 坐後面個男人好煩, 都幾廿歲人, 喺個仔周老婆面前仲咁多廢話, 又解釋劇情, 又懶醒佔劇情, 又講無聊野, 仲食食下爆谷發現漏走晒於是係咁大聲講"你篤穿左你篤穿左你篤穿左", 我忍唔住擰轉頭用命令語氣, 同佢赤口初三開開年"可唔可以細聲d!!!"
其實想講多句"我唔想知你篤穿乜野!!"但驚自己忍唔到笑。

- 謹記呢套係卡通, 細路會睇得明, 唔駛有個老竇懶醒負責解話。一把年紀都唔識戲院禮儀。佢又唔係解釋d細路可能難明既地方例如點解長大左既大雄見返叮噹都唔過去say個hi, 只係講埋晒d廢話, 臨完場仲係咁話"完喇" "做完喇" "噢, 完lu", 係呀完喇咁你仲唔快d起身走?

- 戲都好睇既, 串埋幾句短篇, 別出心栽。