我想吃掉你的胰臟

幾個月前我曾激烈推介，嚴重推介呢本書(重溫)，如今套戲上左，我梗係要睇下。

唔得，唔撚得，簡直係差。

1，戲應該係想拍大路穩陣既絕症純愛路線，即係一公升眼淚，在世界中心呼喚愛，太陽之歌，新不了情呢d，絕症冇未來個位會好開朗樂觀咁鼓勵身邊人努力活下去活埋佢個份，呢個路線通常都大賣。

2，弊在胰臟拍出黎好似觀音收兵，淨係覺得條姣西霸王硬上弓，逼條仔同佢玩，但係唔多睇到男方有愛上佢，做唔到書裡描寫既內心活動與轉變，實在無法說服我呢兩個人係相愛。我淨係覺得條女撚狗，條仔被撚狗。

3，套戲捉錯用神。男女主之間唔只係愛，仲有種互相仰慕，想成為對方一部分既情感，已經超越左愛，唔只係愛，大概係戀人+摰友+soulmate既關係，即係想吃掉你的胰臟。可惜套戲拍唔出呢個感覺，解釋何謂「我想吃掉你的胰臟」太過倉卒，匆匆用獨白帶過就算，冇睇過書既人應該唔會覺得好觸動。

3，書裡面女主臨死前，男主send左個sms畀佢，由於女主死左，男主送出既訊息得唔到回應，所以好想確認土主是否知道自己既心意。於是男主去搵女主媽媽拎女主部手機睇下佢read左未。我覺得呢個舉動係相當重要，係好牽動情緒既一段，但係電影竟然冇呢段。

4，呢段之所以重要，亦基於男主性格設定。書裡男主係個冇感情冇喜怒哀樂，視人類如死物，好抽離咁去睇世界既人。大概呢個設定比較超現實，所以電影就將男主簡單化，係個低調內向唔鍾意同人溝通既宅男。亦因為咁，當電影中男主坦言覺得開心時，女主甚感欣慰；男主睇完共病文庫後，亦問左女主媽媽一句：「我可唔可以喊」，呢兩個情感流露對男主呢個角色其實係好重要，不過電影簡略晒呢d細節，冇睇過書唔會覺得係重點。當男主既電影性格簡單化，成套戲就變得好平凡了。

5，拍親純愛絕症片既女主通常都爆紅，例如澤尻erika，長澤正美，綾瀨遙，yui，袁詠儀。濱邊美波都靚既，但奈何笑得好肉酸，成日港女式微笑咁抿住個嘴笑，條法令好核突。唔夠靚唔緊要，笑得甜可以搭救，但係夠靚而笑得樣衰，真係大鑊，仲要扮開朗少女，好難頂。仲要唔夠可愛但係裝可愛，裝傻瓜，作為觀眾真係好難受，好想摑佢兩巴，問佢係咪以為自己好可愛？又講埋晒d智障野乜野圖書館索書號點解要有小數位，書唔駛跟次序擺都得啦尋下寶先有意思，之類。呢d弱能問題如果由醜女把口問出黎，一定畀人屌到反艇，但係靚女問的話，大家都比較能包容。不過我依然覺得濱邊美波將女主演繹得好智障，裝可愛以為自己好可愛，根本姣西八婆。電影前半佢未死個陣好煩，我忍唔住問身旁的v：「佢死得未？」雖然我唔鍾意呢位濱邊美波，不過佢似乎都好大可能好似其他前人咁，因絕症純愛片而走紅？拭目以待。

6，女主死後反而好睇左，比較跟據原著劇情。呵呵。

7，mr children首主題曲幾好聽，但係戲裡面冇播過，淨係最尾end roller個陣播，好似有d浪費。

8，總的來說我覺得套戲唔好睇，冇晒書中精粹，徒具其形。女主未死個陣好悶，悶到想訓。不過同場都好多人大受感動啜泣既。

笑到抿住個嘴咁唔知做乜鳩，條法令特別核突。

空手道

1，呢套值得睇，值得細味，有驚喜。

2，劇情都係大路熱血運動片formula：人生失意，去做一項運動，從中得到啟發。But！呢套戲完全唔係我想像中個種熱血運動popcorn movie，唔係張家輝《激戰》個種，艱辛奮鬥打擂台既部分其實唔多，唔好諗住黎睇動作睇打戲，套戲偏向文藝多過popcorn。

3，成套戲氛圍都好內斂，明明係講好熱血沸騰既故事，硬橋硬馬既運動，但拍出黎居然以柔制剛，好多留白，多做事少說話，甚至連對白都唔多，回歸電影語言用畫面說故事。呢種細水長流，細緻淡雅，好有日本片feel，我見識少，近年好少睇到咁樣既港產片。

4，有日本片韻味之餘，又仍然都港味濃郁。83分鐘短短地，同舊時港產片既片長差唔多，唔會拖好長好似某些日本片咁長氣，講完要講既野就收工，因為呢套戲劇情簡單到冇乜野好講(陳強同師父關係可以講多d，咁就唔駛好似而家stephy頹廢太耐柳俊江戲份太多)，而家算恰度好處。間中又彈個冇深度鳩噏(但係好笑既)gag等你笑下輕鬆下，保持港片風格。當然大師級稱唔上，但係呢個日本crossover香港既平衡做得算好好，扮大師級扮得相當用心，絕對唔難睇，合格有找。

4，入場前睇過少少杜導fb，知道《空手道》係抄《柔道龍虎榜》，不過我未睇過後者，無法比較，所以我用近年「因失意而做運動繼而振作」既港產片《激戰》黎類比。《激戰》商業大路，有晒sound bite，「怯就輸一世」個d，又多打鬥動作畫面，穩打穩紮，好易入口。《空手道》係杜導拍黎比自己睇，係打飛機片，唔係從主流觀眾喜愛既角度出發，睇得出套戲好多野想講，好有創作人既堅持，加上杜導包攬大量崗位，擺明係要打飛機，所以有點翹口杉手。但我仍然覺得好睇，杜導同陳靜打飛機都好叻，真是令人感動，我都好想可以打飛機打得咁好睇。

5，睇杜導fb見有句slogan「在艱彌厲 戰鬥到底」，睇完戲忽然醒起，呢句野竟然冇出現過。有別於《激戰》memes式拋金句「怯就輸一世」個種，《空手道》真係好內斂，唔會講到出口畀你聽，而係將呢句宗旨演繹出黎，用行動用畫面話讓你心領神會。

6，配樂都很棒，classic的巴哈。成套戲感覺清新又decent，實踐電影開場不久醉酒梁栢堅講沉默個段，很好，值得欣賞，值得支持，值得細味，值得咀嚼。

7，聽講stephy左眼底原來有粒癦，真係喎，點解睇左佢咁多年都唔覺有？stephy係真靚，淡掃蛾眉已很好，不是很有星味但是個美麗的鄰家女。

8，以前唔知邊度睇返黎，話stephy當年因為拇趾外翻而冇再打排球，所以我係咁睇佢腳趾，發現佢雖有外翻，但其實不算嚴重，嚴重過我少少姐。

9，杜導話一直覺得stephy識做戲，所以開部戲畀佢，睇下係佢睇錯人，定係其他導演走寶。

10，呢篇野寫到一舊舊，還未組織好就寫下來了，sor9呵呵。同埋唔知點解打空手道，上擂台變左打拳？戴拳套？係咪我無知人地真係咁？聽朝查下先。